భద్రాద్రికొత్తగూడెం, వెలుగు : కేంద్ర ప్రభుత్వం అమల్లోకి తీసుకురానున్న మూడు కొత్త క్రిమినల్ చట్టాలపై పోలీస్ అధికారులు, సిబ్బంది అవగాహన పెంపొందించుకోవాలని ఎస్పీ బి. రోహిత్ రాజు సూచించారు. కొత్తగూడెంలోని ఉమెన్స్ కాలేజీలో మంగళవారం కొత్తగూడెం సబ్ డివిజన్ పోలీసుల ఆధ్వర్యంలో మూడు కొత్త చట్టాలపై ఏర్పాటు చేసిన ట్రైనింగ్క్యాంప్ను ఎస్పీ ప్రారంభించారు. ఈ సందర్భంగా ఆయన మాట్లాడుతూ మూడు కొత్త చట్టాలలో సమకాలీన కాలంతో పాటు వాడుకలో ఉన్న సాంకేతికతకు అనుగుణంగా అనేక కొత్త నిబంధనలు చేర్చినట్లు వెల్లడించారు.
ఈ కొత్త చట్టాలకు 2023 డిసెంబర్ 21న పార్లమెంట్లో ఆమోదం లభించిందన్నారు. రాష్ట్రపతి నుంచి కూడా అనుమతి వచ్చిందని తెలిపారు. కొత్త చట్టాలపై ఏర్పాటు చేసిన శిక్షణా తరగతులను ప్రతి ఒక్కరూ ఉపయోగించుకోవాలన్నారు. ఈ ప్రోగ్రాంలో కొత్తగూడెం డీఎస్పీ రెహమాన్, ట్రైనీ ఏఎస్పీ విక్రాంత్ సింగ్, డీసీఆర్బీ డీఎస్పీ మల్లయ్య స్వామి, ఎస్బీ ఇన్స్పెక్టర్ నాగరాజు, సీఐలు కరుణాకర్, రమేశ, శివప్రసాద్, ఎస్సైలు, సిబ్బంది పాల్గొన్నారు.
నకిలీ విత్తనాలు అమ్మితే చర్యలు
నకిలీ విత్తనాలు అమ్మేవారిపై కఠిన చర్యలు తీసుకుంటామని ఎస్పీ బి. రోహిత్ రాజు హెచ్చరించారు. కొత్తగూడెంలోని ఎస్పీ ఆఫీస్లో అగ్రికల్చర్ ఆఫీసర్లు, విత్తన డీలర్లతో మంగళవారం ఏర్పాటు చేసిన సమావేశంలో ఆయన మాట్లాడారు. తెలంగాణ ప్రభుత్వంచే గుర్తించిన విత్తనాలను మాత్రమే డీలర్లు అమ్మాలని సూచించారు.
ఎవరైనా నకిలీ విత్తనాలు, నాసిరకం పురుగు మందులు అమ్మితే సీరియస్ యాక్షన్ తీసుకుంటామన్నారు. రైతులను మోసం చేసే దళారులను గుర్తిస్తే వెంటనే పోలీస్లకు సమాచారం ఇవ్వాలని సూచించారు. రైతులు తాము కొనుగోలు చేసిన విత్తనాలు, ఎరువులు, పురుగుమందులకు సంబంధించి తప్పకుండా రసీదులు తీసుకోవాలన్నారు.
