సైబర్​ నేరగాళ్లతో జాగ్రత్త : ఎస్పీ రూపేశ్​

• డిజిటల్​ అరెస్టు అంటూ వచ్చే ఫోన్ కాల్స్​ను​ నమ్మొద్దు

రామచంద్రాపురం(అమీన్​పూర్), వెలుగు: సైబర్​ నేరగాళ్లతో జాగ్రత్తగా ఉండాలని, అపరిచిత వ్యక్తులు ఫోన్​చేసి అధికారులమని బెదిరిస్తే వెంటనే పోలీసులను సంప్రదించాలని ఎస్పీ రూపేశ్​సూచించారు. శనివారం పటాన్​చెరు సబ్​డివిజన్​పోలీసుల ఆధ్వర్యంలో అమీన్​పూర్​లో స్టూడెంట్స్​కు సైబర్​నేరాలు, ట్రాఫిక్​రూల్స్, డ్రగ్స్​అనర్థాలపై అవగాహన కల్పించారు. ఈ సందర్భంగా ఎస్పీ మాట్లాడుతూ సైబర్ నేరాలు అమీన్ పూర్ పీఎస్​పరిధిలో ఎక్కువగా జరుగుతున్నాయన్నారు. 

వీటి బారిని పడుతున్న వారు ఎక్కువగా విద్యావంతులే ఉంటున్నారన్నారు. మల్టీ లెవెల్ మార్కెటింగ్, ఇన్వెస్ట్​మెంట్​ ఫ్రాడ్స్ వంటి ఆన్​లైన్​ మోసాలపై అవగాహనతో ఉండాలన్నారు. ఏ పోలీసు అధికారి నేరుగా వాట్సాప్, ​వీడియో కాల్స్ చేయరని డిజిటల్అరెస్ట్ అంటూ చేసే కాల్స్ ను నమ్మొద్దన్నారు. ఎవరైనా సైబర్ నేరాలకు గురైతే 48 గంటల్లోపు 1930 కు కాల్ చేసి కంప్లైంట్​చేయాలని సూచించారు.

మత్తు పదార్థాల జోలికి వెళ్లొద్దు

మత్తు పదార్థాల వల్ల జీవితాలు చిత్తుగా మారుతాయన్నారు. గంజాయి అక్రమ రవాణా, అమ్మకం, సేవించిన వారిపై కఠిన చర్యలు తీసుకుంటామని హెచ్చరించారు. విద్యాసంస్థల నుంచి టర్మినేట్ చేయిస్తామని చెప్పారు. డ్రగ్ ఫ్రీ జిల్లా గా మార్చడంలో పోలీసులకు సహకరించాలని సూచించారు.  ప్రతి ఒక్కరూ ట్రాఫిక్ రూల్స్ పాటించాలని, బైక్​నడిపేటప్పుడు హెల్మెట్, కార్ డ్రైవ్ చేసేటప్పుడు సీట్ బెల్ట్ తప్పనిసరిగా ధరించాలన్నారు. మైనర్లు వాహనాలు నడిపితే తల్లిదండ్రులపై కేసులు నమోదు చేస్తామని హెచ్చరించారు. కార్యక్రమంలో డీఎస్పీలు రవీందర్ రెడ్డి, వేణుగోపాల్ రెడ్డి, ఇన్​స్పెక్టర్లు నరేశ్, రవీందర్ రెడ్డి, లాలూ నాయక్, స్టూడెంట్స్, యువత పాల్గొన్నారు.