త్వరలో ఆకాశం నుంచి ఇంటర్నెట్

• మరో 52 రాకెట్లు రోదసిలోకి పంపనున్న స్పేస్ ఎక్స్
• స్పేష్ ఇంటర్నెట్ దిశగా ‘స్పేస్ ఎక్స్’ మరో ముందడుగు​

లాస్ ఏంజెలిస్:  ఒకటి కాదు.. రెండు కాదు.. ఏకంగా 42 వేల శాటిలైట్లు. ప్రపంచంలోని ఏ మూలకైనా డైరెక్ట్ గా స్పేస్ నుంచే ఇంటర్నెట్. భూమిపై ఏ ప్రాంతానికి పోయినా ఫుల్ ఇంటర్నెట్ సిగ్నళ్లు. చాలా అగ్గువకే హైస్పీడ్ ఇంటర్నెట్ సర్వీస్... ఇవన్నీ స్పేస్ ఎక్స్ కంపెనీ అధినేత ఎలాన్ మస్క్ చేపట్టిన ‘స్టార్ లింక్ శాటిలైట్స్’ మిషన్ తో సాధ్యం కానున్నాయి. ఇందులో భాగంగా మరో 52 స్టార్ లింక్ శాటిలైట్లను స్పేస్ ఎక్స్ కంపెనీ శనివారం  అమెరికాలోని కాలిఫోర్నియా స్టేట్ వాండెన్ బర్గ్ స్పేస్ ఫోర్స్ బేస్ నుంచి ఫాల్కన్ 9 రాకెట్ ద్వారా నింగికి పంపింది. దీంతో స్టార్ లింక్ మిషన్ లో ఇప్పటివరకూ స్పేస్ కు పంపిన శాటిలైట్ల సంఖ్య 1,944కు చేరింది. తొలిదశలో భూమికి 550 కిలోమీటర్ల ఎత్తులోని లో ఎర్త్ ఆర్బిట్ లో వివిధ డిగ్రీల వాలుతో 4 వేల శాటిలైట్లను మోహరించేందుకు స్పేస్ ఎక్స్ ప్లాన్ చేస్తోంది. ఆ తర్వాత దశలవారీగా భూమి చుట్టూ 42 వేల శాటిలైట్లను మోహరించాలని, భూమిపై ఎక్కడికైనా ఇంటర్నెట్ సర్వీస్ ను అగ్గువకే అందించాలని టార్గెట్​గా 
పెట్టుకుంది.  
మళ్లీ మళ్లీ వాడుకునేలా ‘ఫాల్కన్’ రాకెట్ 
స్పేస్ ఎక్స్ కంపెనీ ఉపయోగిస్తున్న ఫాల్కన్ 9 రాకెట్ తో ఒకేసారి 60 శాటిలైట్లను నింగికి పంపే అవకాశం ఉంది. ఈ రాకెట్ కు రెండు స్టేజీలు ఉంటాయి. రాకెట్ రెండో స్టేజీలో శాటిలైట్లను ఉంచుతారు. రెండో స్టేజీని ఆర్బిట్ వైపు పంపి, మొదటి స్టేజీ తిరిగి సముద్రంలో ఏర్పాటు చేసిన స్టేజీపై సేఫ్ గా దిగుతుంది. ఈ మొదటి స్టేజీని మళ్లీ మరో ప్రయోగానికి వాడుకుంటారు. ఇలా ఇప్పటివరకూ దీనిని 11 సార్లు వాడుకున్నారు. దీనితో స్పేస్ ఎక్స్ కంపెనీకి ఖర్చు భారీగానే ఆదా అవుతోంది.  
పలకల మాదిరిగా స్పెషల్ శాటిలైట్లు   
ఫాల్కన్ 9 రాకెట్ లో ఒకేసారి పెద్ద మొత్తంలో పంపేందుకు వీలుగా స్టార్ లింక్ శాటిలైట్లను ఒక టేబుల్ సైజు అంతటి పలకల మాదిరిగా తయారు చేశారు. వీటిని ఒకదానిపై ఒకటి పేర్చి రాకెట్ లో పంపుతున్నారు. సుమారు 200 కిలోల బరువు ఉండే ఒక్కో శాటిలైట్ లో అనేక స్పెషల్ ఫీచర్స్ ఉన్నాయి. శాటిలైట్ దిశను మార్చేందుకు థ్రస్టర్లు, సోలార్ ప్యానెల్స్, సెన్సర్ల వంటివన్నీ అమర్చారు. ఇతర శాటిలైట్లతో ఢీకొట్టకుండా ప్రత్యేక టెక్నాలజీ ఉంటుంది. చివరకు శాటిలైట్ లైఫ్​స్పాన్ ముగిసిన తర్వాత.. దానంతట అదే థ్రస్టర్ల సాయంతో కిందకు వస్తుంది. భూ వాతావరణంలోకి ఎంటరై మండిపోతుంది. అంతరిక్షంలో ఉపగ్రహాల శకలాలు పేరుకుపోకుండా ఉండేందుకు ఇలా ప్రత్యేక జాగ్రత్తలు తీసుకున్నారు.
ఏమిటీ స్టార్ లింక్ మిషన్? 
స్పేస్ లోకి పెద్ద సంఖ్యలో శాటిలైట్లను పంపి, భూమి అంతటా ఇంటర్నెట్ సర్వీసులను అందించేందుకు స్పేస్ ఎక్స్ కంపెనీ చేపట్టిన ప్రాజెక్టే ‘స్టార్ లింక్ శాటిలైట్స్’ మిషన్. ప్రస్తుతం భూమికి 30 వేల కి.మి.పైగా దూరంలోని జియో స్టేషనరీ ఆర్బిట్ లోని కమ్యూనికేషన్ శాటిలైట్లను ఇంటర్నెట్ సర్వీసులకు వాడుతున్నారు. మరోవైపు భూమిపై, సముద్రాల్లో వేల కిలోమీటర్ల పొడవునా ఆప్టికల్ ఫైబర్ కేబుల్స్ వేసి ఇంటర్నెట్ సర్వీసులు అందిస్తున్నారు. దీనివల్ల ఖర్చు ఎక్కువవుతోంది. మరోవైపు ఇంటర్నెట్ సేవల ఖరీదూ ఎక్కువవుతోంది. అందుకే అగ్గువకే హైస్పీడ్ ఇంటర్నెట్ దిశగా స్పేస్ ఎక్స్ దృష్టి పెట్టింది. జియో స్టేషనరీ ఆర్బిట్​లో కాకుండా భూమికి చాలా దగ్గరగా లో ఎర్త్ ఆర్బిట్​లోనే వేల శాటిలైట్లను మోహరించి, ఇంటర్నెట్ సర్వీసులు అందించేందుకు ప్రయత్నిస్తోంది. 
భూమి చుట్టూ 
భూమిచుట్టూ ‘శాటిలైట్ల ట్రెయిన్’
వేలాది స్టార్ లింక్ శాటిలైట్లు భూమి చుట్టూ ఒకదాని వెంట ఒకటి వరుసగా తిరుగుతుంటాయి. రాత్రిపూట ఆకాశంలోకి చూస్తే మెరుస్తూ వెళ్తున్న శాటిలైట్ల ట్రెయిన్ మాదిరిగా కన్పిస్తుందని చెప్తున్నారు. స్పేస్ లో ఒక శాటిలైట్ నుంచి మరో శాటిలైట్ కు డేటా ట్రాన్స్ ఫర్ చాలా ఈజీగా జరుగుతుందని, అన్ని చోట్లా శాటిలైట్లు ఉంటాయి కాబట్టి భూమిపై ఉండే గ్రౌండ్ స్టేషన్లకు డేటా బదిలీ కూడా ఫాస్ట్ గా అవుతుందని పేర్కొంటున్నారు. ఇప్పుడు డీటీహెచ్ సర్వీసులు వాడుకుంటున్నట్లుగా ఎక్కడైనా సరే.. యాంటెన్నా పెట్టుకుని నెట్ వాడుకోవచ్చు. ఇప్పటికే 20కి పైగా దేశాల్లో తాము లక్షలాది మందికి ఇంటర్నెట్ అందిస్తున్నామని స్పేస్​ఎక్స్ కంపెనీ పేర్కొంటోంది.