అది అమెరికాలోని కెన్నెడీ స్పేస్ సెంటర్. ఆదివారం స్పేస్ ఎక్స్ కంపెనీ తన ఫాల్కన్ 9 రాకెట్ ను ప్రయోగించింది. గాలిలోకి ఎగిరిన కొద్దిసేపటికే ఆ రాకెట్ ఇంజన్లు ఆగిపోయాయి. అప్పటికే 43 కిలోమీటర్ల ఎత్తుకు చేరిన రాకెట్ ఇంకా.. పైకి ఎగరడానికి బదులు మెల్ల మెల్లగా కిందకు పడిపోతూ ఒక్కసారిగా పేలిపోయింది. అయితే, అంతకు కొన్ని సెకన్ల ముందే.. ఆ రాకెట్ నుంచి ఆస్ట్రోనాట్లు ఉండే క్రూ క్యాప్సూల్ ఎజెక్ట్ అయి దూరంగా వెళ్లింది. తర్వాత పారాచూట్ల సాయంతో వేగం తగ్గించుకుని, నెమ్మదిగా అట్లాంటిక్ సముద్రంలో దిగిపోయింది! అయ్యో.. రాకెట్ పేలిపోయిందా? ఆస్ట్రోనాట్లకు ఏమీ కాలేదు కదా? అనుకుంటున్నారా. నిజానికి ఆ క్రూ క్యాప్సూల్‌లో ఆస్ట్రోనాట్లే లేరు. ఆ రాకెట్ దానంతటదే పేలిపోలేదు. సైంటిస్టులే దాని ఇంజన్లు ఆగిపోయి, బూస్టర్లు పేలిపోయేలా చేశారు. ఒకవేళ నిజంగా అలాంటి పరిస్థితే వస్తే ఆస్ట్రోనాట్లు సేఫ్గా తిరిగి రావడం ఎలా? అన్నదాని గురించే ఈ డమ్మీ ప్రయోగం జరిగింది.
ప్రయోగంలో ఎమర్జెన్సీ క్రూ రెస్క్యూ సిస్టం రాకెట్ నుంచి సురక్షితంగా వేరుపడి, సముద్రంలో సేఫ్గా దిగింది. దీంతో టెస్ట్ సక్సెస్ అయింది. నాసా 2011లో స్పేస్ షటిల్స్ ను పక్కన పెట్టింది. అప్పటి నుంచి ఆస్ట్రోనాట్లను ఐఎస్ఎస్ కు పంపడానికి రష్యా సోయజ్ రాకెట్ల సాయం తీసుకుంటోంది. ఈ నేపథ్యంలో అమెరికాకు చెందిన స్పేస్ఎక్స్, బోయింగ్ కంపెనీలతో నాసా 2014లో కాంట్రాక్ట్ కుదుర్చుకుంది. అమెరికా నుంచే ఆస్ట్రోనాట్లను అంతరిక్షానికి పంపేందుకు స్పేస్ క్రాఫ్ట్ తయారీ బాధ్యతలను వీటికి అప్పగించింది. ఇందులో భాగంగానే ఆదివారం స్పేస్ ఎక్స్ తయారు చేసిన డ్రాగన్ క్రూ క్యాప్సూల్ సక్సెస్ అయింది. తద్వారా ఎమర్జెన్సీ టైంలో ఆస్ట్రోనాట్లను సేఫ్గా దించేందుకు ఆస్కారం కలిగింది. ఆస్ట్రోనాట్లను వచ్చే మార్చిలో తమ స్పేస్ క్రాఫ్ట్ ద్వారా పంపేందుకు అంతా రెడీ అయిందని కంపెనీలు ప్రకటించాయి. ఇటీవల బోయింగ్ స్టార్లైనర్ ఫెయిలైన సంగతి తెలిసిందే.
