వాషింగ్టన్: అమెరికా అంతరిక్ష పరిశోధనా సంస్థ నాసా చేపట్టిన చరిత్రాత్మక స్పేస్ ఎక్స్ క్య్రూ డ్రాగన్ మిషన్ ప్రయోగం లాస్ట్ మినెట్లో ఆగిపోయింది. స్పేస్ ఎక్స్ ప్రైవేటు సంస్థ రాకెట్ ప్రయోగాన్ని వాయిదా వేసింది. షెడ్యూల్ ప్రకారం అమెరికా ఫ్లోరిడాలోని కెన్నడీ స్పేస్ సెంటర్ లాంచ్ ప్యాడ్ నుంచి బుధవారం సాయంత్రం 4.33 గంటలకు ప్రయోగించాల్సింది. కానీ, ఆ స్పేస్ ఫ్లైట్ ఎగరడానికి 17 నిమిషాల ముందు కౌంట్డౌన్ నిలిపివేశారు. అయితే, వాతావరణం అనుకూలించకపోవడం వల్లే ప్రయోగం నిలిపివేశామని, పరిస్థితులను బట్టి మే 30న మళ్లీ డ్రాగన్ స్పేస్ క్రాఫ్ట్ ను ఎగరవేస్తామని సంస్థ ప్రకటించింది. ఆస్ట్రోనాట్స్ బాబ్ బెహెన్కెన్, డగ్ హార్లే ఇద్దరూ ఆ రాకెట్ లో ఇంటర్నేషనల్ స్పేస్ స్టేషన్ (ఐఎస్ఎస్) కు వెళ్లవలసి ఉంది. వీళ్లిద్దరూ డ్రాగన్ క్యాప్సూల్ లోకి ప్రవేశించిన తర్వాత టేకాఫ్ నిలిపివేయాలని నిర్ణయించినట్లు లాంచ్ డైరెక్టర్ మైక్ టేలర్ ఒక ప్రకటనలో వెల్లడించారు. అయితే, ఈ ప్రయోగం చూసేందుకు ప్రెసిడెంట్ డొనాల్డ్ ట్రంప్, ఫస్ట్ లేడీ మెలానియా ట్రంప్ ఫ్టోరిడా స్పేస్ స్టేషన్ కు చేరుకున్నారు. కానీ, ప్రయోగం వాయిదా పడటంతో వైట్ హౌస్కు వెనుతిరిగారు.
అంతరిక్ష ప్రయోగాల్లోకి తొలిసారిగా ఓ ప్రైవేటు కంపెనీ అడుగుపెట్టింది. టెస్లా కంపెనీ వ్యవస్థాపకుడు ఎలన్‌ మస్క్‌కు చెందిన ప్రైవేటు స్పేస్ ఏజెన్సీ ‘స్పేస్ఎక్స్’ సంస్థ ‘నాసా అండ్‌ స్పేస్ఎక్స్ క్రూడ్‌ స్పేస్ లాంచ్’ ప్రయోగాన్ని చేపడుతోంది. అంతరిక్షంలోకి సామాన్య ప్రజలను ఈ వాహనంలో తీసుకువెళ్ళాలని స్పేస్ ఎక్స్ భావిస్తోంది. అందులో భాగంగా ఆస్ట్రోనాట్స్ ను స్పేస్ లోకి పంపి పరీక్షించాలనుకుంది. ఈ మిషన్ సక్సెస్ అయితే ఐఎస్ఎస్ కు వెళ్లడానికి సూయజ్ లాంటి రాకెట్స్ కోసం రష్యాపై ఆధారపడాల్సిన అవసరం ఉండదని అమెరికా భావిస్తోంది.
