మొన్నామధ్య స్పేస్ఎక్స్ సంస్థ మెరుగైన ఇంటర్నెట్ సేవల కోసం ఒకేసారి 60 ఉపగ్రహాలను (స్టార్లింక్ శాటిలైట్) నింగిలోకి పంపింది. అంతేకాదు, రాబోయే కొన్నేళ్లలో వేలాది శాటిలైట్లను పంపేందుకు కంపెనీ సన్నాహాలు చేస్తోంది. భారత అంతరిక్ష పరిశోధన సంస్థ (ఇస్రో) కూడా ముమ్మరంగా ప్రయోగాలు చేస్తోంది. జూలైలో చంద్రయాన్ 2 ప్రయోగానికి కసరత్తులు చేస్తోంది. ఆ తర్వాత మనిషిని రోదసికి పంపే మరో మహత్తర కార్యానికీ శ్రీకారం చుట్టబోతోంది. అవిగాకుండా ఉపగ్రహ ప్రయోగాలూ ఉంటాయి. నాసా 2024 నాటికి చంద్రుడిపైకి రెండోసారి మనిషిని పంపే ప్రయోగం చేయబోతోంది. అమెజాన్, వన్వెబ్ లాంటి సంస్థలూ అలాంటి ఆలోచనల్లోనే ఉన్నాయి.
గతి తప్పితే ముప్పు
అయితే, ఇప్పటికే స్పేస్లో లక్షలాది ఉపగ్రహ, రాకెట్ శకలాలు ఇబ్బడిముబ్బడిగా చక్కర్లు కొడుతున్నాయి. వేలాది శాటిలైట్లున్నాయి. అంతేనా, వివిధ దేశాలు (భారత్ సహా) యాంటీ శాటిలైట్ మిసైల్స్ను ప్రయోగిస్తున్నాయి. వాటి వల్ల స్పేస్లో జంక్ మరింత ఏర్పడే ప్రమాదముంది. ఏదో ఒక ఉపగ్రహంగానీ, ఏదైనా శకలంగానీ గతి తప్పి ఇంకో దాన్ని, అది మరొక దాన్ని ఢీకొట్టేస్తే పరిస్థితేంటి? ధ్వని కన్నా 23 రెట్ల వేగంతో దూసుకెళ్లి చైన్సిస్టంలో ఒకదాన్ని ఒకటి ఢీకొంటే అన్నీ పేలిపోతాయి. అలా అలా భూమికి దగ్గరగా ఉన్న కక్ష్యలోని శకలాలు, ఉపగ్రహాలు నాశనం అవుతాయి. వేల కోట్ల రూపాయలతో కక్ష్యలో పెట్టిన స్టార్లింక్, ఇంటర్నేషనల్ స్పేస్ స్టేషన్ (ఐఎస్ఎస్) వంటివీ అందుకు మినహాయింపేమీ కాదు. తద్వారా అంతరిక్షం నాశనమైపోయిన ఉపగ్రహాలు, రాకెట్లతో శ్మశానంలా మారుతుందని సైంటిస్టులు చెబుతున్నారు. దాని వల్ల జీపీఎస్ సేవలు నిలిచిపోతాయి. వాతావరణాన్ని అంచనా వేసే టెక్నాలజీ పోతుంది. విమానాలు గాల్లోకి లేవవు. టీవీలు, ఫోన్లు పనిచేయవు. ఇంటర్నెట్ రాదు. దేశాల ఆర్థిక వ్యవస్థ మొత్తం పతనమైపోతుంది. ఇప్పటికిప్పుడు వాటితో వచ్చే ప్రమాదం ఏమీ లేకపోయినా భవిష్యత్ తరాలకు అది పెనుముప్పుగా పరిణమించే ప్రమాదం ఉంటుందని హార్వర్డ్ స్మిత్సోనియన్ సెంటర్ ఫర్ ఆస్ట్రోఫిజిక్స్ ఆస్ట్రానమర్ జొనాథన్ మెక్డోవెల్ చెప్పారు. అంతరిక్ష ప్రయోగాల ఖర్చులు తగ్గిపోతుండడంతో ఏటా ఉపగ్రహ ప్రయోగాలు పెరిగిపోతున్నాయని, అదే జరిగితే ఇంకా కొన్ని వేల ఉపగ్రహాలు స్పేస్లోకి చేరిపోతాయని వివరిస్తున్నారు. ఇప్పుడున్న ఉపగ్రహాలకు పదిరెట్లు ఎక్కువ ఉపగ్రహాలను కక్ష్యలోకి పంపితే దాని వల్ల కలిగే ముప్పు 100 రెట్లు ఎక్కువగా ఉంటుందన్నారు. అంతేకాదు, స్పేస్ జంక్తో కాలుష్యం, వాతావరణ మార్పులు తలెత్తుతాయని నిపుణులు ఆందోళన వ్యక్తం చేస్తున్నారు. ఇలాంటి ముప్పులను తప్పించాలంటే అర్జెంట్గా స్పేస్ ప్రయోగాలను తగ్గించాల్సిన అవసరం ఉందని, దానికి కఠినమైన నిబంధనలను ఏదేశానికి ఆదేశం రూపొందించుకోవాల్సిన అవసరం ఉందని సైంటిస్టులు చెబుతున్నారు. అంతేగాకుండా అంతరిక్షంలో పేరుకుపోయిన శకలాలను తీసేయాల్సి ఉంటుందంటున్నారు. అంటే అంతరిక్షాన్ని క్లీన్ చేయడం.
