- 20వ తేదీలోగా పూర్తయ్యే అవకాశం
- వెయ్యి మందికిపైగా బదిలీకి చేసే చాన్స్
- ఇప్పటికే ఆప్షన్లు పెట్టుకుంటున్న ఉద్యోగులు
హైదరాబాద్, వెలుగు: అగ్రికల్చర్ డిపార్ట్మెంట్లో ట్రాన్స్ఫర్ల ప్రక్రియను ప్రభుత్వం స్పీడప్ చేసింది. ఒకే చోట నాలుగేండ్లకుపైగా పని చేస్తున్న అధికారులను ఈ నెల 20వ తేదీలోగా బదిలీ చేయాలని నిర్ణయించింది. రాష్ట్ర వ్యాప్తంగా వ్యవసాయ శాఖలో నాలుగు వేల మంది ఉద్యోగులు ఉన్నారు. వీరిలో వెయ్యి మంది ట్రాన్స్ఫర్ పరిధిలో ఉన్నట్టు తెలుస్తున్నది. కేడర్ స్ట్రెంథ్లో 40 శాతం మేరకు బదిలీ చేసే పరిస్థితులు ఉండగా.. 25 శాతం మంది మాత్రమే నాలుగేండ్లు ఒకే ప్లేస్లో జాబ్ చేస్తున్నట్లు గుర్తించారు.
తాజాగా ప్రభుత్వం జీవో నంబర్ 80 ద్వారా ట్రాన్స్ఫర్ల ప్రక్రియ చేపట్టింది. ఈ నేపథ్యంలో వ్యవసాయ శాఖలో వెయ్యి మందికి బదిలీ తప్పదని డిపార్ట్మెంట్ వర్గాలు అంటున్నాయి. ట్రాన్స్ఫర్ ఆప్షన్ల కోసం ఇప్పటికే అగ్రికల్చర్ వెబ్సైట్ పోర్టల్లో స్పెషల్ అప్లికేషన్ను ఏర్పాటు చేశారు. ఉద్యోగులు తమకు అనుకూలమైన ప్రదేశాల్లో పని చేసేందుకు ఆప్షన్లు పెట్టుకుంటున్నారు. ఆప్షన్ల ప్రక్రి య పూర్తయ్యాక ఉద్యోగులకు కౌన్సెలింగ్ చేపట్టే అవ కాశం ఉన్నట్టు తెలుస్తున్నది. వ్యవసాయ శాఖలో 8 రకాల సీనియార్టీలను పరిగణనలోకి తీసుకోనున్నారు.
డిపార్ట్మెంట్లో మొత్తం 36 రకాల కేడర్లు ఉండగా.. వాటిని కలిపి జోన్ వారీగా బదిలీల ప్రక్రి య చేపట్టనున్నారు. హైదరాబాద్ పరిధిలో ఒకే చోట నాలుగేండ్లు పని చేసిన అధికారులకు బదిలీ తప్పదని అగ్రికల్చర్ వర్గాల్లో చర్చ జరుగుతున్నది. ఏ స్థాయి అధికారి అయినా.. నాలుగేండ్లు ఎక్కడ పని చేసినా.. డిప్యూటేషన్లో మరో సంస్థలో ఉన్నా.. బదిలీ చేయనున్నారు. పలువురు ఉన్నతాధికారులు కూడా ట్రాన్స్ఫర్ అవుతారని సమాచారం.
