క్రీడాకారుల కోసం కొత్త పాలసీ

• స్పోర్ట్స్​ అథారిటీ చైర్మన్​ శివసేనారెడ్డి
• ఫుట్​బాల్​ ప్లేయర్​ సౌమ్యకు సన్మానం

పెబ్బేరు, వెలుగు: రాష్ట్రంలోని క్రీడాకారుల కోసం తెలంగాణ స్పోర్ట్స్​ అథారిటీ ఆధ్వర్యంలో రెండు నెలల్లో కొత్త పాలసీ తీసుకువస్తామని స్పోర్ట్స్​ అథారిటీ చైర్మన్​ శివసేనారెడ్డి తెలిపారు. కేఎల్ఆర్​ స్పోర్ట్స్​ ఆధ్వర్యంలో బుధవారం పెబ్బేరులోని ఫుట్​బాల్​ గ్రౌండ్​లో ఇంటర్నేషనల్​ ఫుట్​బాల్​ ప్లేయర్​ గుగులోతు సౌమ్య సన్మాన కార్యక్రమంలో ఎమ్మెల్యే మేఘారెడ్డితో కలిసి పాల్గొన్నారు. ఈ సందర్భంగా ఆయన మాట్లాడుతూ పెబ్బేరులో ఇండోర్, అవుట్​ డోర్​ గేమ్స్​ ఆడేలా మినీ స్టేడియం కోసం మున్సిపల్​ కౌన్సిల్, ఎమ్మెల్యే తీర్మానం చేసి పంపిస్తే మంజూరు​చేస్తామని చెప్పారు.

పట్టణాలు, గ్రామాలు అనే తేడా లేకుండా సాయంత్రం వేళ వాకింగ్, స్పోర్ట్స్​కు సమయం కేటాయించాలని సూచించారు. ఎమ్మెల్యే మాట్లాడుతూ జిల్లాకు చెందిన వ్యక్తి స్పోర్ట్స్​ అథారిటీ చైర్మన్​  కావడం, జిల్లాకు నాలుగు స్పోర్ట్స్​ హబ్​లు తీసుకురావడం గర్వకారణమని పేర్కొన్నారు. చదువుతో పాటు క్రీడల్లో రాణించి నేషనల్, ఇంటర్నేషనల్​ లెవెల్​కు ఎదగాలని ఆకాంక్షించారు. గుగులోతు సౌమ్య మాట్లాడుతూ.. రాష్ట్రం నుంచి జాతీయ జట్టులో తాను మాత్రమే ఆడుతున్నానని, ఈ స్థాయికి ఎదగడానికి ఎన్నో ఒడిదుడుకులు ఎదుర్కొన్నానని చెప్పారు. ప్రభుత్వం తమ వంటి క్రీడాకారులకు ఉద్యోగాలు కల్పించాలని కోరారు.

కార్యక్రమంలో కేఎల్ఆర్​ స్పోర్ట్స్​ చైర్మన్​ కృష్ణ కుమార్​రెడ్డి, మున్సిపల్​ చైర్​ పర్సన్​ కరుణశ్రీ, డీవైఎస్​వో సుధీర్​ కుమార్​ రెడ్డి, ఎస్​జీఎఫ్​ సెక్రటరీ సురేందర్​ రెడ్డి, మార్కెట్​ చైర్మన్​ శ్రీనివాస్​ గౌడ్​ పాల్గొన్నారు. అనంతరం పట్టణంలోని జడ్పీఎస్ఎస్​లో ఎస్జీఎఫ్​ ఆధ్వర్యంలో నిర్వహించిన మండల స్థాయి గేమ్స్​ను ప్రారంభించారు. మండలంలోని లబ్ధిదారులకు ఎమ్మెల్యే మేఘారెడ్డి ఎంపీడీవో ఆఫీస్ లో కల్యాణలక్ష్మి, షాదీ ముబారక్​ చెక్కులను పంపిణీ చేశారు.