హైదరాబాద్,వెలుగు: త్వరలో జరగనున్న రెండు టీచర్ ఎమ్మెల్సీ స్థానాలకు ప్రొగ్రెసివ్‌ రికగ్నైజ్డ్ టీచర్స్‌ యూనియన్‌ (పీఆర్టీయూ) అభ్యర్థులను ప్రకటించింది. వరంగల్–ఖమ్మం–నల్గొండ నియోజకవర్గ అభ్యర్థిగా పింగిలి శ్రీపాల్ రెడ్డి, కరీంనగర్– మెదక్–నిజామాబాద్–ఆదిలాబాద్ సెగ్మెంట్ అభ్యర్థిగా వంగ మహేందర్ రెడ్డిని ఎంపిక చేసినట్టు పీఆర్టీయూ రాష్ట్ర ప్రధాన కార్యదర్శి పుల్గం దామోదర్ రెడ్డి తెలిపారు. సోమవారం హైదరాబాద్ లోని పీఆర్టీయూ స్టేట్ ఆఫీసులో సంఘం ముఖ్య నేతలు, జిల్లా అధ్యక్ష, కార్యదర్శుల సమావేశం జరిగింది.
దీనిలో టీచర్ ఎమ్మెల్సీ అభ్యర్థులను ఖరారు చేశారు. కాగా, పింగిలి శ్రీపాల్ రెడ్డి వరంగల్ జిల్లా గీసుకొండ మండలం శాయంపేట హవేలీ స్కూల్ లో టీచర్ గా పని చేస్తూ రాష్ట్ర అధ్యక్షుడిగా కొనసాగుతున్నారు. సిద్దిపేట జిల్లాకు చెందిన వంగ మహేందర్ రెడ్డి సంఘం స్టేట్ ప్రెసిడెంట్ గా పని చేస్తూ ఎమ్మెల్సీ బరిలో నిలిచేందుకు ఏడాదిన్నర క్రితమే స్వచ్ఛంద విరమణ చేశారు. ఈ సమావేశంలో ఎమ్మెల్సీ కూర రఘోత్తంరెడ్డి, మాజీ ఎమ్మెల్సీలు బి. మోహన్ రెడ్డి, పూల రవీందర్, రాష్ట్ర నేతలు బీరెల్లి కమలాకర్ రావు, చెన్నకేశవ రెడ్డి, వెంకట్ రెడ్డి, గుండు లక్ష్మణ్, ఇన్నారెడ్డి తదితరులు పాల్గొన్నారు.
