పంజాగుట్ట, వెలుగు: అసెంబ్లీ ఎన్నికలకు ముందు ఇచ్చిన హామీని సీఎం నిలబెట్టుకోవాలని శ్రీశైలం ప్రాజెక్టు ముంపు నిర్వాసితులు కోరారు. సోమాజిగూడ ప్రెస్క్లబ్లో సోమవారం జరిగిన మీడియా సమావేశంలో వారు మాట్లాడారు. 1986 నుంచి అధికారుల చుట్టూ తిరుగుతున్నా తమకు న్యాయం జరగడం లేదన్నారు. ప్రాజెక్టుతో ఇళ్లు , భూములు కోల్పోయామని, ఏళ్ల తరబడి ప్రభుత్వాల చుట్టూ తిరుగుతున్నా ఎవరూ పట్టించుకోవట్లేదన్నారు.
ఉమ్మడి ఆంధ్ర ప్రదేశ్లో అక్కడి నిర్వాసితులకు 2800 ఉద్యోగాలు ఇచ్చారని, తమకు మాత్రం 2 వందల ఉద్యోగాలే ఇచ్చారని కొల్హాపూర్, అలంపూర , వనపర్తి వాసులు చెప్పారు. జీవో నంబరు 68 ప్రకారం అర్హులైన వారికి ఉద్యోగాలు ఇస్తామని చెప్పిన వారు ఇంతవరకు ఎటువంటి చర్య తీసుకోలేదన్నారు. సీఎం రేవంత్ రెడ్డి వనపర్తి సభలో తమకు న్యాయం చేస్తానని హామీ ఇచ్చారన్నారు. ఉద్యోగాలిచ్చి తమ కుటుంబాలను ఆదుకోవాలని వారు కోరారు.
