భద్రాద్రికొత్తగూడెం, వెలుగు: సింగరేణిలో పనిచేస్తున్న కాంట్రాక్ట్ కార్మికుల వేతన పెంపు ఒప్పందాన్ని అమలు చేయడంలో యాజమాన్యం నిర్లక్ష్యంగా వ్యవహరిస్తోందని సింగరేణి కాలరీస్ వర్కర్స్ యూనియన్ కేంద్ర కమిటీ అధ్యక్షులు వాసిరెడ్డి సీతారామయ్య అన్నారు. ఒప్పందాలను అమలు చేయాలని డిమాండ్ చేస్తూ కొత్తగూడెంలోని సింగరేణి హెడ్ఆఫీస్ ఎదుట సోమవారం ధర్నా చేశారు. ఈ సందర్భంగా ఆయన మాట్లాడారు. గతేడాది 18రోజులు సమ్మె చేసిన సందర్భంగా సెంట్రల్ డిప్యూటీ లేబర్ కమిషనర్ సమక్షంలో యూనియన్లతో చేసుకున్న ఒప్పందాలను అమలు చేయకుండా యాజమాన్యం కాలయాపన చేస్తొందని ఆరోపించారు.
గవర్నమెంట్లో అమలవుతున్న జీఓ 22 ను సింగరేణిలో అమలు చేస్తామని ఇచ్చిన హామీని యాజమాన్యం గంగలో కలిపిందన్నారు. నర్సరీ కార్మికులకు ఈపీఎఫ్, ప్రావిడెంట్ఫండ్, బోనస్ చెల్లిస్తామని చెల్లించడం లేదన్నారు. కనీస వేతనాలు కాంట్రాక్ట్ కార్మికులకు అందని ద్రాక్షగానే మారాయన్నారు. అనంతరం జీఎం పర్సనల్ హనుమంతరావుకు వినతిపత్రాన్ని ఇచ్చారు. ఈ ప్రోగ్రాంలో యూనియన్ నేతలు ఎం. రమేష్, గుత్తుల సత్యనారాయణ, కిష్టఫర్, కృష్ణయ్య, రాము పాల్గొన్నారు.
