ప్రారంభించిన గవర్నర్ తమిళిసై
హైదరాబాద్, వెలుగు: కరోనా సంక్షోభ సమయంలో కుటుంబాలు ఆర్థికంగా కష్టాల పాలవుతున్నాయని, ఆ సంక్షోభాన్ని దాటేందుకు మహిళలు ఆంట్రప్రెన్యూర్లుగా మారాలని గవర్నర్ తమిళిసై సూచించారు. ఆసక్తి ఉన్న రంగాల్లో శిక్షణ పొంది సాధికారత సాధించాలన్నారు. రాజ్భవన్ మహిళలకు రెండు నెలల పాటు అసోసియేషన్ ఆఫ్ లేడీ ఆంట్రప్రెన్సూర్స్ ఆఫ్ ఇండియా అందించనున్న స్వయం ఉపాధి శిక్షణను బుధవారం ఆమె ప్రారంభించారు. ప్రధాని మోడీ ప్రవేశపెట్టిన ఆత్మనిర్భర్ భారత్ స్ఫూర్తితోనే రాజ్భవన్ పరివార్ మహిళలకు ఈ శిక్షణను ప్రారంభించామని గవర్నర్ చెప్పారు. మహిళలు సంపాదించిన ప్రతి పైసాకుటుంబ సంక్షేమానికే ఖర్చుపెడతారని, ఇది కుటుంబ అభివృద్ధికి ఎంతో ఉపయోగపడుతుందని అన్నారు. శిక్షణ పొందిన మహిళలు ఆంట్రప్రెన్యూర్స్గా ఎదగడానికి అవసరమైన లోన్లు, మార్కెటింగ్ వంటి సౌకర్యాలు కల్పించేందుకు కృషి చేస్తామన్నారు. కాలనీలు, రెసిడెన్షియల్ కాంప్లెక్స్లలో కూడా మహిళలు, యువతకు స్వయం ఉపాధి శిక్షణ కోర్సలు ఏర్పాటు చేయాలని పిలుపునిచ్చారు. ఉద్యోగాల కోసం ఎదురుచూడడం కన్నా.. ఉద్యోగాలను ఇచ్చే వారిగా యువతను తీర్చిదిద్దాలన్నారు. మహిళా పారిశ్రామికవేత్తలు తయారు చేసిన బయోడీగ్రేడబుల్ పీపీఈ కిట్లు, పర్యావరణ హితమైన హ్యాండీ క్రాఫ్ట్స్ను గవర్నర్ మెచ్చుకున్నారు. రాజ్భవన్ మహిళలకు మొదటి దశలో 31 మందికి మగ్గం వర్క్స్, ఎంబ్రాయిడరీలో శిక్షణ ఇస్తామని గవర్నర్ సెక్రటరీ కె. సురేంద్ర మోహన్ తెలిపారు. తర్వాత ఫుడ్ ప్రొడక్ట్స్, పేపర్ క్రాఫ్ట్, ఫ్యాషన్ డిజైనింగ్లో శిక్షణ ఇస్తామని చెప్పారు.
For More News..
