- అపరిశుభ్ర పరిసరాల్లో పదార్థాల తయారీ
- అనుమానాస్పద మసాల పౌడర్ల శాంపిళ్ల సేకరణ
- నగరంలో ఫుడ్ సేఫ్టీ టాస్క్ఫార్స్ దాడులు
నిజామాబాద్, వెలుగు: నిజామాబాద్ లోని రెండు స్టార్ హోటల్స్, ఒక స్వీట్ షాప్, మిర్చి కాంపౌండ్లో మసాలాలు విక్రయించే దుకాణాలపై శనివారం స్టేట్ఫుడ్సేఫ్టీ టాస్క్ఫోర్స్ టీం సభ్యులు దాడులు చేయగా విస్తుబోయే విషయాలు వెలుగుచూశాయి. లహరి హోటల్ కిచెన్ పరిశీలించి, ప్లాస్టిక్ కవర్లో నిల్వ చేసిన 122 కిలోల మాంసాన్ని గుర్తించారు. రూ.30 వేల విలువగల కుళ్లిన మాంసం ఐటమ్స్, వంటల కోసం ఉపయోగిస్తున్న హానికరమైన రంగులు, మాసాల మిర్చి పేస్ట్, ఫంగస్ పట్టిన కూరగాయలను గుర్తించి వాటిని ధ్వంసం చేశారు. హోటల్ మేనేజ్మెంట్కు జోనల్ అసిస్టెంట్ ఫుడ్ కంట్రోలర్ వి.జ్యోతిర్మయి నోటీసులు అందజేశారు.
వంశీలో..
వంశీ ఇంటర్నేషనల్ హోటల్లో తనిఖీలు చేపట్టి హానికరమైన రంగులతో తయారు చేసి ఫ్రిజ్లో నిల్వ చేసిన నాన్వెజ్ఐటమ్స్ను గుర్తించారు. కాలం చెల్లిన కారంపొడి, మసాల పొడులు వాడుతున్నట్లు నిర్ధారించారు. వెలుతురు, వెంటిలేషన్ లేని అపరిశుభ్ర పరిసరాలున్న కిచెన్లో వంటలు చేస్తున్నారని ఆగ్రహం వ్యక్తం చేస్తూ మేనేజ్మెంట్కు నోటీసు అందజేశారు.
అనుమానాస్పద శాంపిల్స్సేకరించి పరీక్షల కోసం ల్యాబ్కు తరలించారు. ఢిల్లీవాలా స్వీట్ హోంపై దాడి చేశారు. సురక్షితంకాని కిచెన్లో స్వీట్స్ తయారు చేస్తున్నారని, పరిస్థితి మారకుంటే క్రిమినల్ కేసు నమోదు చేయిస్తామని హెచ్చరించారు. మిర్చి కాంపౌండ్లో మసాల పొడులు అమ్ముతున్న షాప్లకు వెళ్లి శాంపిళ్లు కలెక్ట్ చేసి ల్యాబ్కు తరలించారు. రిపోర్టు ఆధారంగా చర్యలు తీసుకుంటామని అసిస్టెంట్ ఫుడ్ కంట్రోలర్ జోతిర్మయి తెలిపారు.
