- లెక్కలు తీయనున్న గ్రౌండ్ వాటర్ అథారిటీ
హైదరాబాద్, వెలుగు: రాష్ట్రవ్యాప్తంగా భూగర్భ జలాల వినియోగంపై పర్యవేక్షణ చేపట్టాలని భూగర్భ జలాల స్టేట్ లెవెల్ స్టాండింగ్ కమిటీ నిర్ణయించింది. ఎక్కడెక్కడ.. ఎంతెంత.. నీటిని తోడేస్తున్నారో లెక్కలు తీయనున్నది. పరిశ్రమలు సహా రాష్ట్రంలోని అన్ని బోర్వెల్స్ నుంచి తోడుతున్న నీటి లెక్కలను మానిటర్ చేయనున్నది. అందుకు బోర్వెల్స్ నుంచి తోడుతున్న నీళ్లు ఎంతో తెలుసుకునేందుకు జియో (భూగర్భ) మానిటరింగ్ యాప్తో క్యాప్చర్ చేయాలని నిర్ణయించింది. గురువారం జలసౌధలో నిర్వహించిన స్టేట్ లెవెల్ స్టాండింగ్ కమిటీ భేటీలో ఈ మేరకు అధికారులు నిర్ణయం తీసుకున్నారు. చాలా పరిశ్రమలు నదులు, ఇతర వనరుల ద్వారా నీటిని సేకరిస్తున్నాయి. బోర్వెల్స్ నుంచి కూడా నీళ్లు తోడుకుంటున్నాయి. వాటి మీద ఇకపై పర్యవేక్షణ ఉంచాలని అధికారులు నిర్ణయించారు. పరిశ్రమల నుంచి సెంట్రల్ గ్రౌండ్ అథారిటీ నిర్ణయించిన ధరలకు అనుగుణంగా చార్జీలను వసూలు చేయనున్నారు. దీని ద్వారా వాటర్ డిపార్ట్మెంట్కు కొంత రెవెన్యూ వస్తుందన్న యోచనలో అధికారులున్నారు.
సెంట్రల్ పోర్టల్లో డేటా అప్లోడ్
రాష్ట్రంలో బోర్వెల్స్ ద్వారా తోడుతున్న నీటి వివరాలను సెంట్రల్ గ్రౌండ్ వాటర్ అథారిటీ వెబ్సైట్లో అప్లోడ్ చేయాలని సమావేశంలో నిర్ణయించారు. ఏయే జిల్లాల్లో.. ఎంతెంత.. వాడకం ఉన్నది, పరిశ్రమలు ఎంత నీటిని వాడుతున్నాయి, పరిశ్రమల నుంచి వసూలు చేస్తున్న చార్జీల వివరాలలన్నీ ఇంగ్రెస్ సాఫ్ట్వేర్ ద్వారా అప్లోడ్ చేయనున్నారు. అందుకు అనుగుణంగా పంచాయతీరాజ్, మున్సిపాలిటీ, కార్పొరేషన్, జీహెచ్ఎంసీల పరిధిలోని ప్రాంతాల్లో ఒక వాటర్ ఇయర్లోని గ్రౌండ్ వాటర్ స్టేటస్ను అప్డేట్ చేయనున్నారు. రాష్ట్రంలో గ్రౌండ్ వాటర్ ఎక్స్ప్లాయిటేషన్ ఎక్కువగా జరుగుతున్నదని సమావేశంలో చర్చించారు. చాలా పట్టణాల్లో నీటిని సాధారణ స్థాయికి మించి తోడేస్తున్నట్లు గుర్తించారు.
హైదరాబాద్‌‌పై ఫోకస్
20 మీటర్ల లోతుకు మించి నీటిని తోడేస్తే దాన్ని ఓవర్ ఎక్స్ప్లాయిటేషన్గా అధికారులు చెప్తున్నారు. చాలా జిల్లాల్లోనూ ఈ పరిస్థితి నెలకొన్నదని అంటున్నారు. హైదరాబాద్ సిటీలోనే అత్యధికంగా నీటిని తోడుకుంటు న్నట్లు చెప్తున్నారు. సిటీలో బోర్వెల్స్ రీచార్జ్ (భూగర్భజలాల పెరుగుదల) తక్కువగా ఉంటున్నా.. ఎక్కువ లోతుల నుంచి కూడా అవసరాల కోసం నీటిని తోడుతున్నట్టు గుర్తించారు. వంద శాతం ఎక్స్ప్లాయిటేషన్ హైదరాబాద్లోనే జరుగుతున్నట్టు నిర్ధారించారు. ఈ నేపథ్యంలోనే సిటీలో గ్రౌండ్ వాటర్పై మరింతగా ఎక్కువ మానిటరింగ్ చేయాలని భావిస్తున్నారు. కుమ్రంభీం ఆసిఫాబాద్ జిల్లాలో భూగర్భ జలాల వాడకం తక్కువగా ఉన్నట్టు తేల్చారు.
