కొత్త మోటర్ వాహనాల చట్టం పేరు చెబితే ఇప్పుడు జనం హడలెత్తిపోతున్నారు. చాలా రాష్ట్రాలు ‘నో’ అంటున్నాయి. ఇక్కడ మెలిక ఏమిటంటే, ఒకప్పుడు ఈ రాష్ట్రాలన్నీ వెనకా ముందూ చూడకుండా ‘ఎస్’ చెప్పినవే. సవరణ బిల్లును పార్లమెంట్లో పెట్టకముందు దానిపై ఐదు సార్లు మీటింగ్లు జరిగాయి. ఏ ఒక్క రాష్ట్రమూ ఈ చట్టంలో చేయబోయే మార్పులు చేర్పులపై మాట వరసకైనా అభ్యంతరం తెలపలేదు. అప్పుడు ‘ఓకే’ అన్నవాళ్లందరూ ఇప్పుడు ‘యూటర్న్’ తీసుకున్నారు. ముందే ఆలోచిస్తే ఇప్పుడీ రాద్ధాంతం ఉండేది కాదంటున్నారు వెహికల్ ఓనర్లు.
బైక్, కార్, వ్యాన్, లారీ, బస్.. వాహనం ఏదైనా కావొచ్చు. దాన్ని బయటకు తీయాలంటేనే పబ్లిక్ తెగ పరేషాన్ అవుతున్నారు. ట్రాఫిక్ పోలీసులకు చిక్కితే ఏదో ఒక వంకతో చలానా వేస్తారని భయపడాల్సి వస్తోంది. మామూలుగా వంద రూపాయలు పడే చలాన్ ఏకంగా పది రెట్లు పెరిగిపోయింది. రూల్స్ బ్రేక్ చేసినందుకు వేలల్లో ఫైన్ కట్టక తప్పట్లేదు. పెనాల్టీలను ఏ స్థాయిలో పెంచారంటే.. ‘అంత డబ్బు చెల్లించటం కన్నా వెహికల్ను రోడ్డు మీదే వదిలేసి రావటం బెటర్’ అనుకునేటంతగా! దీంతో ప్రభుత్వంపై రెగ్యులర్ మీడియాలో విమర్శలు, సోషల్ మీడియాలో సెటైర్లు, పంచ్లు పేలుతున్నాయి.
పెద్ద నోట్ల రద్దు తర్వాత జనాన్ని ఇంత పెద్దఎత్తున కంగారు పెడుతున్న టాపిక్ ఏదయినా ఉందంటే అది కొత్త ఎంవీ యాక్టే! ఇప్పుడు దేశమంతా దీనిపైనే చర్చ. హెల్మెట్, ఆర్సీ, డ్రైవింగ్ లైసెన్స్, ఇన్సూరెన్స్, పొల్యూషన్ చెకప్ సర్టిఫికెట్.. ఇలా ఏ ఒక్క డాక్యుమెంట్ లేకుండా బండి నడిపినా; ట్రాఫిక్ రూల్స్ పాటించకపోయినా భారీగా ఫైన్లు ఖాయం. కేంద్రం ఈ నెల నుంచే చట్టాన్ని అమల్లోకి తెచ్చింది. ప్రజల నుంచి తీవ్ర వ్యతిరేకత రావడంతో చాలా రాష్ట్రాలు చట్టాన్ని అమలుచేయటానికి జంకుతున్నాయి. తప్పంతా మోడీ సర్కార్దే అన్నట్లు మాట్లాడుతున్నాయి.
ఒక్కసారైనా వద్దనలేదు
మోటర్ వాహనాల చట్టంలో చేయనున్న మార్పులు చేర్పులతో కూడిన బిల్లును పార్లమెంట్లో హడావుడిగా ప్రవేశపెట్టలేదు. అన్ని రాష్ట్రాల సలహాలు, సూచనలు, అభిప్రాయాలు కోరుతూ ఐదు సార్లు మీటింగ్లు నిర్వహించింది. కొత్త చట్టానికి మూడేళ్ల ముందు (2016) నుంచే కసరత్తు మొదలుపెట్టారు. ఆ సమావేశాలకు ప్రతిసారీ దాదాపు అన్ని రాష్ట్రాల ట్రాన్స్పోర్ట్ మినిస్టర్లూ వచ్చేవారు. అన్నింటికీ ఓకే చెబుతూ పోయేవారు. ఫైన్లు ఈ రేంజ్లో వేయటం సరికాదని ఒక్క రాష్ట్రమైనా అడ్డు తగల్లేదు. అప్పుడు ఓకే చెప్పేసి, ఇప్పుడు నాట్ ఓకే అంటూ మడత పేచీ పెడుతున్నాయి. ‘మోటర్ వెహికల్స్ అమెండ్మెంట్ యాక్ట్–2019’లోని కొన్ని ప్రొవిజన్లను ప్రధాని మోడీ సొంత రాష్ట్రం గుజరాత్ కూడా తప్పుపడుతోంది. రోడ్ సేఫ్టీ సంబంధిత అంశాలపై మంచీచెడు మాట్లాడుకోవటానికి 2017లో ఈ స్టేట్లోనే అన్ని రాష్ట్రాల ట్రాన్స్పోర్ట్ మినిస్టర్ల మీటింగ్ జరిగింది. ట్రాన్స్పోర్ట్ డెవలప్మెంట్ కమిటీ(టీడీసీ)లో వీళ్లందరూ మెంబర్లు. టీడీసీ భేటీలు 2016–18 మధ్య కాలంలో ఢిల్లీ, బెంగళూరు, ధర్మశాల, తిరువనంతపురం, గువాహటిల్లో జరిగాయి. మోటర్ వాహనాల చట్టానికి చేయనున్న సవరణలపై చర్చించారు. తర్వాత కేబినెట్ గ్రీన్ సిగ్నల్ ఇచ్చింది. ఈ ఏడాది మోడీ సర్కారు మళ్లీ అధికారానికి రాగానే జూలైలో పార్లమెంట్ ఆమోదం పొందారు. దీని ప్రకారం.. ట్రాఫిక్ రూల్స్ పట్టించుకోనివారికి విధించే జరిమానాలను 500 శాతం నుంచి 1,000 శాతం వరకు పెంచారు. ‘డ్రంక్ అండ్ డ్రైవ్’, ఓవర్ స్పీడ్ వంటి తప్పులకు రూ.4,000 మొదలుకొని రూ.10,000 దాకా చలానా వేస్తున్నారు. రోడ్డు ప్రమాదాల నివారణకే ఈ స్థాయిలో ఫైన్లు వేస్తున్నామని సర్కారు అంటోంది.
సూపర్ ఫైన్ చలాన్లు
సెప్టెంబర్ 3వ తేదీన ఒడిశాలోని సంబల్పూర్లో ట్రక్ డ్రైవర్ అశోక్ జాదవ్కి ఏకంగా రూ.86,500 జరిమానా పడింది. చట్టం అమల్లోకి వచ్చాక ఇదే అతి పెద్ద ఫైన్. పర్మిషన్ లేని వ్యక్తికి డ్రైవింగ్ ఇచ్చినందుకు 5,000, అతనికి లైసెన్స్ లేనందుకు 5,000, ట్రక్ కెపాసిటీ 18 టన్నులకు మించి లోడ్ వేసినందుకు 56,000, ట్రక్ హద్దులు దాటిపోయేలా లోడింగ్ చేసినందుకు 20,000, సాధారణ తప్పుగా 500 రూపాయలు… మొత్తంగా రూ.86,500 వడ్డించారు. చివరికి పోలీసుల కాళ్లావేళ్లా పడి 70,000 రూపాయలు ఫైన్ కట్టాడు జాదవ్.
ఢిల్లీ సమీపంలోని గురుగ్రామ్లో ఒక ఆటో రిక్షా డ్రైవర్కి 32,500 రూపాయలు ఫైన్ వేశారు. సరైన డాక్యుమెంట్లు లేనందుకు, సిగ్నల్ దగ్గర రెడ్ లైట్ జంప్ చేసినందుకు ఈ ఫైన్ పడింది.
ఢిల్లీలోనే ఒక బైక్ రైడర్కి 23,000 రూపాయలు వడ్డించారు. అతని దగ్గర బైక్ పేపర్లు ఏవీ లేవు. కనీసం హెల్మెట్ కూడా పెట్టుకోలేదు.
ఉత్తరాఖండ్లోని డెహ్రాడూన్లో రెండెద్దుల బండి ఓనర్కి రాంగ్ పార్కింగ్ కింద వెయ్యి రూపాయలు ఫైన్ వేశారు. తన పొలం పక్కనే రోడ్డు మీద ఎద్దుల బండిని ఆపి ఉంచాడని రియాజ్ హసన్ అనే రైతుకు ఈ ఫైన్ పడింది.
సౌత్ ఢిల్లీలో డ్రంక్ అండ్ డ్రైవ్ కింద ఒక బైకర్కి రూ. 16,000 చలాన్ రాశారు. తాగి నడుపుతున్నందుకు 10,000, రిజిస్ట్రేషన్ పేపర్లు లేనందుకు 5,000, హెల్మెట్ పెట్టనందుకు రూ. 1,000 వేశారు. దాంతో ఆ బైకర్కి చిర్రెత్తుకొచ్చి బైక్కి నిప్పెట్టేశాడు.
