గాలే వేదికగా శ్రీలంకతో బుధవారం (జనవరి 29) జరుగుతున్న తొలి టెస్టులో ఆస్ట్రేలియా తాత్కాలిక కెప్టెన్ స్టీవ్ స్మిత్ సెంచరీతో మెరిశాడు. కెప్టెన్ ఇన్నింగ్స్ ఆడుతూ తొలి రోజు 104 పరుగులు చేసి అజేయంగా నిలిచాడు. స్మిత్ ఇన్నింగ్స్ లో 10 ఫోర్లు, ఒక సిక్సర్ ఉన్నాయి. తొలి పరుగు చేసి టెస్టుల్లో 10 వేల పరుగులు పూర్తి చేసుకున్న ఈ ఆసీస్ బ్యాటర్..టెస్ట్ కెరీర్ లో 35 వ సెంచరీ చేసి ఏకంగా నలుగురు దిగ్గజాలను వెనక్కి నెట్టాడు. సునీల్ గవాస్కర్, బ్రియాన్ లారా, యూనిస్ ఖాన్, జయవర్ధనే 34 సెంచరీలు చేయగా.. 35 వ సెంచరీతో స్మిత్ వీరిని అధిగమించాడు.
టెస్ట్ క్రికెట్ లో ఆస్ట్రేలియా తరపున అత్యధిక సెంచరీలు చేసిన రెండో ఆటగాడు స్మిత్. 41 సెంచరీలతో పాంటింగ్ తొలి స్థానంలో ఉన్నాడు. ఓవరాల్ గా అత్యధిక సెంచరీలు చేసిన ఆటగాళ్ల లిస్టులో స్మిత్ 7 వ స్థానంలో నిలిచాడు. తొలి స్థానంలో 51 సెంచరీలతో సచిన్ ఉన్నాడు. ప్రస్తుత టెస్ట్ క్రికెట్ లో రూట్ తర్వాత అత్యధిక సెంచరీలు చేసిన బ్యాటర్ గా స్మిత్ కొనసాగుతున్నాడు. ఇటీవలే జరిగిన బోర్డర్ గవాస్కర్ ట్రోఫీలో స్మిత్ రెండు సెంచరీలు బాది ఫామ్ లోకి వచ్చాడు. అదే ఫామ్ ను శ్రీలంకపై కొనసాగిస్తున్నాడు.
ఈ మ్యాచ్ కు ముందు 9999 పరుగులతో బ్యాటింగ్ కు దిగిన స్మిత్.. బుధవారం (జనవరి 29) తొలి రోజు ఆటలో భాగంగా ప్రభాత్ జయసూర్య బౌలింగ్ లో మిడాన్ దిశగా సింగిల్ తీసి తన పదివేల మార్క్ అందుకున్నాడు. ఆస్ట్రేలియా తరపున పదివేల పరుగులు పూర్తి చేసుకున్న నాలుగో ఆటగాడు స్మిత్. అంతకముందు అలెన్ బోర్డర్, స్టీవ్ వా, రికీ పాంటింగ్ ఈ ఘనత అందుకున్నారు. ఓవరాల్ గా టెస్ట్ క్రికెట్ లో పదివేల పరుగులు పూర్తి చేసుకున్న 15వ ఆటగాడు స్మిత్. లారా, సచిన్, సంగక్కర, రికీ పాంటింగ్ తర్వాత వేగంగా 10 వేల పరుగులు పూర్తి చేసుకున్న ఆటగాడిగా రికార్డ్ సృష్టించాడు.
ఈ మ్యాచ్ విషయానికివస్తే వస్తే తొలి రోజు ఆట ముగిసే సమయానికి ఆస్ట్రేలియా రెండు వికెట్ల నష్టానికి 330 పరుగులు చేసింది. సెంచరీ హీరోలు స్టీవ్ స్మిత్(104), ఖవాజా(147) క్రీజ్ లో ఉన్నారు. అంతకముందు ఓపెనర్ ట్రావిస్ హెడ్ 40 బంతుల్లోనే 57 పరుగులు చేసి మెరుపు ఆరంభాన్ని ఇచ్చాడు. శ్రీలంక బౌలర్లలో ప్రభాత్ జయసూర్య, జెఫ్రీ వాండర్సే తలో వికెట్ తీసుకున్నారు.
🚨 CAPTAIN STEVEN SMITH HAS ARRIVED IN STYLE...!!! 🚨
— Mufaddal Vohra (@mufaddal_vohra) January 29, 2025
- 35th Test hundred by the GOAT. 🐐pic.twitter.com/beQF2UHKA3
