- విద్వాన్, విశారద క్యాండిడేట్లకు టీచర్ ఉద్యోగాలు ఆపిన్రు
- 2017 టీఆర్టీ నోటిఫికేషన్లో రెండు డిగ్రీల తొలగింపు
- అంతకుముందు అన్ని పరీక్షల్లో అవకాశం
- హైకోర్టు ఆర్డర్స్తో టీఆర్టీ రాసిన అభ్యర్థులు
- సెలక్షన్స్కోసం నాలుగేండ్లుగా వెయిటింగ్
మంచిర్యాల, వెలుగు: 2017 టీఆర్టీ హిందీ టీచర్స్ రిక్రూట్మెంట్లో విద్వాన్, విశారద అభ్యర్థులకు తీరని అన్యాయం జరిగింది. హైకోర్టు ఆర్డర్స్తో ఎగ్జామ్రాసి మెరిట్ సాధించినప్పటికీ ఉద్యోగాలు రాకపోవడంతో బాధితులంతా దిక్కుతోచని స్థితిలో పడిపోయారు. చేతికి అందివచ్చిన ఉద్యోగం చేజారిపోవడంతో నాలుగేండ్లుగా మంత్రులు, ఎమ్మెల్యేలు, సెక్రెటరీల చుట్టూ చెప్పులరిగేలా తిరుగుతున్నారు. సర్కారు నిర్లక్ష్యం వల్ల ఇప్పటికే చాలామంది ఏజ్బార్ అయ్యామని, తమకు న్యాయం చేయాలని వేడుకుంటున్నారు.
జీఓ నెంబర్ 25తో చిచ్చు
ఉమ్మడి రాష్ర్టంలో టీచర్స్రిక్రూట్మెంట్లో హిందీ టీచర్స్ పోస్టులకు హిందీలో డిగ్రీ లేదా ఈక్వెలెంట్(విద్వాన్, విశారద), హిందీ పండిట్ ట్రైనింగ్ (హెచ్పీటీ), టీచర్స్ఎలిజిబిలిటీ టెస్ట్ (టెట్) అర్హతలుగా ఉండేవి. తెలంగాణ వచ్చిన తర్వాత 2017లో నిర్వహించిన గురుకుల టీచర్స్ రిక్రూట్మెంట్లోనూ హిందీ టీచర్ పోస్టులను పై అర్హతలతోనే భర్తీ చేశారు. ఈ అర్హతతోనే రెండుసార్లు టెట్ నిర్వహించారు. కానీ 2017 అక్టోబర్ 10న అప్పటి విద్యాశాఖ ప్రిన్సిపల్ సెక్రెటరీ రంజీవ్ ఆచార్య జీఓ నెంబర్ 25ను తీసుకువచ్చారు. అదే నెల 21న టీఎస్పీఎస్సీ ద్వారా టీఆర్టీ నోటిఫికేషన్ రిలీజ్ చేశారు. 158 హిందీ స్కూల్ అసిస్టెంట్, 352 హిందీ లాంగ్వేజ్ పండిట్ పోస్టుల ఖాళీలను ప్రకటించారు. నోటిఫికేషన్లో ఎలిజిబిలిటీ హిందీలో డిగ్రీ లేదా సమాన విద్యార్హత ఉండాలని, దానికి యూజీసీ గుర్తింపు ఉండాలని పేర్కొన్నారు. దీంతో విద్వాన్, విశారద అర్హతతో హెచ్పీటీ చేసి, టెట్క్వాలిఫై అయినవారు టీఆర్టీకి అర్హత కోల్పోయారు. కనీసం 2014 వరకైనా కటాఫ్ డేట్ ఇవ్వకుండా జీఓ తీసుకొచ్చిన వారం రోజుల్లోనే నోటిఫికేషన్ ఇచ్చారని, అంతకు నాలుగు నెలల ముందే గురుకుల టీచర్స్ రిక్రూట్మెంట్ టెస్ట్ రాసిన తమకు అర్హత లేకుండా పోయిందని వాపోయారు. దీంతో హైకోర్టును ఆశ్రయించగా, 2018 ఫిబ్రవరి 2న నిర్వహించిన టీఆర్టీ రాయడానికి పర్మిషన్ ఇచ్చింది. ఫలితాల్లో స్టేట్ టాప్ ర్యాంకర్స్ మొదలుకొని 80 శాతం మంది విద్వాన్, విశారద క్యాండిడేట్సే ఉన్నారు. హిందీలో డిగ్రీ, పీజీలు చేసినవారు 1,0-15 మంది మాత్రమే టీఆర్టీ రాయగా, మెరిట్ లిస్టులో విద్వాన్, విశారద క్యాండిడేట్స్ కన్నా వెనకే వచ్చారు. అయితే జీఓ 25 ప్రకారం విద్యార్హతల విషయంలో ప్రభుత్వమే నిర్ణయం తీసుకోవాలని హైకోర్టు ఆర్డర్స్ఇవ్వగా హిందీలో డిగ్రీ, పీజీ అర్హతలున్నవాళ్లను మాత్రమే సెలెక్ట్ చేసింది. దీంతో ఎంతోమందికి అన్యాయం జరిగింది. విద్వాన్, విశారదలను డిగ్రీలుగా గుర్తించనప్పుడు ఆ డిగ్రీలతో పీజీలు చేస్తే ఎట్లా చెల్లుబాటవుతాయని, వాళ్లకు ఏ రకంగా ఉద్యోగాలు ఇస్తారని బాధితులు ప్రశ్నిస్తున్నారు. వివిధ కారణాలతో ఖాళీగా ఉన్న 50కి పైగా పోస్టులతో పాటు సూపర్ న్యూమరరీ పోస్టులు క్రియేట్చేసి తమకు ఇవ్వాలని కోరుతున్నారు.
సీఎం పేషీలో ఫైళ్లు పెండింగ్
హిందీ టీచర్స్ రిక్రూట్మెంట్లో జరిగిన పొరపాట్లను సవరించి న్యాయం చేయాలని కోరుతూ అభ్యర్థులు 2018 నుంచి పోరాడుతున్నారు. గవర్నర్, విద్యాశాఖ మంత్రి, మంత్రులు, ఎమ్మెల్యేలు, ఎమ్మెల్సీలు , సంఘాల లీడర్లను కలిసి విన్నవించారు. అయినా సమస్య పరిష్కారానికి నోచుకోలేదు. 2019 జనవరి 28న, 2020 నవంబర్ 4న జనరల్అడ్మినిస్ర్టేషన్ డిపార్ట్మెంట్ నుంచి సీఎం పేషీకి వెళ్లిన రెండు ఫైళ్లు అక్కడే పెండింగ్లో ఉన్నాయని చెప్తున్నారు. విద్యాశాఖ మంత్రి సబితా ఇంద్రారెడ్డి సైతం సూపర్ న్యూమరరీ పోస్టులను క్రియేట్ చేసి ఉద్యోగాలిస్తామని హామీ ఇచ్చారని పేర్కొంటున్నారు. ఇప్పటికైనా ప్రభుత్వం స్పందించి వెంటనే తమకు న్యాయం చేయాలని కోరుతున్నారు.
35వేల మందికి అన్యాయం
రాష్ర్టవ్యాప్తంగా విద్వాన్, విశారద డిగ్రీలతో హెచ్పీటీ చేసి, టెట్క్వాలిఫై అయినవాళ్లు సుమారు 35వేల మంది ఉన్నారు. జీఓ నంబర్ 25 ప్రకారం భవిష్యత్లోనూ హిందీ టీచర్స్ పోస్టులకు వీరంతా అనర్హులే. ఈ డిగ్రీలతోనే ప్రభుత్వం గతంలో ఎల్పీసెట్ నిర్వహించగా, ఫీజు రీయింబర్స్మెంట్, స్కాలర్షిప్లు అందించింది. తెలంగాణలో గురుకుల టీచర్స్రిక్రూట్మెంట్తో పాటు రెండుసార్లు టెట్ కూడా ఇదే అర్హతలతో నిర్వహించింది. ఏపీతో పాటు మిగతా రాష్ర్టాల్లో ఈ డిగ్రీలతోనే హిందీ టీచర్ ఉద్యోగాలు ఇస్తున్నారు. విద్వాన్, విశారద కోర్సులను డిగ్రీగా పరిగణించి గత ఎమ్మెల్సీ ఎలక్షన్స్లో గ్రాడ్యుయేట్స్ ఓటుహక్కును కూడా కల్పించారు. వీటిని పరిగణలోకి తీసుకుని తమకు న్యాయం చేయాలని బాధిత అభ్యర్థులు కోరుతున్నారు.
జాబ్ రాక కాపురం కూలిపోయింది
నేను విద్వాన్తో హెచ్పీటీ చేశాను. టెట్క్వాలిఫై అయ్యాను. జీఓ నంబర్ 25లో విద్వాన్, విశారదలను తొలగించగా, హైకోర్టు ఆర్డర్స్తో టీఆర్టీసీ రాశాను. ఉమ్మడి నిజామాబాద్ జిల్లాలో ఎస్సీ రిజర్వేషన్ కేటగిరీలో సెకండ్ ర్యాంక్ సాధించాను. అయినా నాకు జాబ్ రాలేదు. మెరిట్లో నాకంటే వెనుక ఉన్నవాళ్లకు ఇచ్చారు. ఇదెక్కడి న్యాయం? నాకు జాబ్ రాకపోవడంతో కాపురం కూలిపోయింది. జాబ్ వచ్చాకే వస్తా అంటూ భర్త వెళ్లిపోయాడు.
– యశోద, మోపాల్, నిజామాబాద్
4వ ర్యాంక్ వచ్చినా జాబ్ రాలే
మ్మడి రాష్ర్టంలో, తెలంగాణ వచ్చిన తర్వాత గురుకుల టీచర్స్ రిక్రూట్మెంట్లో హిందీ టీచర్స్ పోస్టులకు విద్వాన్, విశారద క్యాండిడేట్స్ను సెలెక్ట్ చేశారు. కానీ 2017 టీఆర్టీ నోటిఫికేషన్లో వీటిని తొలగించారు. హైకోర్టు పర్మిషన్తో టీఆర్టీ రాసి మెరిట్ సాధించినప్పటికీ మాకు అన్యాయం జరిగింది. నేను స్టేట్లో 31వ ర్యాంక్, ఉమ్మడి ఆదిలాబాద్ జిల్లాలో 4వ ర్యాంక్ సాధించినప్పటికీ ఉద్యోగం దక్కలేదు. ఇప్పటికైనా ప్రభుత్వం న్యాయం చేయాలి.
– సలీంఖాన్, మంచిర్యాల టౌన్
