- న్యూ పీజీ, ఫార్మసీ హాస్టళ్లలో సౌలతుల్లేవ్
- విరిగిన బాత్రూమ్ తలుపులు, ఊడిన కిటికీ అద్దాలు
- డ్రైనేజీ లీకేజీతో కంపు కొడుతున్న పరిసరాలు
మహబూబ్నగర్/మహబూబ్నగర్ రూరల్, వెలుగు: పాలమూరు యూనివర్సిటీలో సమస్యలు తిష్ట వేశాయి. వర్షాకాలం కావడంతో అటు పందులు, ఇటు మురుగు నీటితో విద్యార్థులు ఇబ్బందులు పడుతున్నారు. దీనికితోడు డ్రైనేజీలు జామ్ అవుతుండడంతో కంపు వాసనను భరించలేకపోతున్నారు. దీనిపై వర్సిటీ అధికారులకు కంప్లైంట్ చేసినా పట్టించుకోకపోవడంతో స్టూడెంట్లు ఆందోళన వ్యక్తం చేస్తున్నారు.
డ్రైనేజీ లీకేజీలు..
వర్సిటీలో మూడు బాయ్స్ హాస్టల్స్ ఉండగా, రెండు హాస్టళ్లలో సమస్యలు తిష్ట వేశాయి. వర్షాకాలం కావడంతో దోమలు కూడా ఎక్కువవుతున్నాయి. దీంతో స్టూడెంట్లు ఇబ్బందులు పడుతున్నారు.
- బాయ్స్ న్యూ పీజీ హాస్టల్ను కొన్ని నెలల కింద ఓపెన్ చేశారు. ఈ బిల్డింగ్లో రెండు ఫ్లోర్లు ఉన్నాయి. హాస్టల్ గ్రౌండ్ ఫ్లోర్లో ఉన్న సింక్లు తరచూ నిండిపోతున్నాయి. ఫస్ట్ ఫ్లోర్, సెకండ్ ఫ్లోర్లలోని వాష్ బేసిన్లు, సింక్ల నుంచి వస్తున్న నీళ్లు గ్రౌండ్ ఫ్లోర్లోనే ఆగిపోతున్నాయి. ఈ సింక్లను ప్రతి రోజూ క్లీన్ చేయాల్సి ఉండగా, వారంలో ఒకటి, రెండు సార్లు మాత్రమే క్లీన్ చేస్తున్నారు. దీంతో చెత్త అక్కడే పేరుకుపోయి సింక్ జామ్ అయి, నీళ్లు బయటకు వస్తున్నాయి.
- వర్సిటీలో క్రీడాకారుల కోసం కొద్ది నెలల కింద రూ.9 కోట్లతో 400 మీటర్ల సింథటిక్ ట్రాక్ను ఏర్పాటు చేశారు. వర్షం వస్తే ట్రాక్ మీద నీరు నిలబడకుండా బయటకు వెళ్లాలి. కానీ, ఇటీవల కురిసిన వర్షాలకు ఈ ట్రాక్ మీద నీళ్లు నిలుస్తున్నాయి. దీంతో విద్యార్థులు రన్నింగ్ ప్రాక్టీస్ చేసుకోలేకపోతున్నారు.
- న్యూ పీజీ, ఫార్మసీ హాస్టళ్లలో ఇబ్బందులు ఉన్నాయి. ఇక్కడి బాత్ రూమ్స్, టాయిలెట్స్కు తలుపులు లేవు. దీంతో వీటిని స్టూడెంట్లు వాడడం లేదు. అలాగే ఈ హాస్టళ్లలోని గదుల్లో కిటికీలకు తలుపులు లేవు. కొన్నింటికి అద్దాలు ఊడిపోయాయి. వర్షాకాలం కావడంతో వర్షపు నీరంతా గదుల్లోకి చేరుతోంది. దీంతో రాత్రి పూట వర్షం పడితే స్టూడెంట్లు జాగరణ చేస్తున్నారు.
- న్యూ పీజీ, ఫార్మసీ హాస్టళ్లకు సంబంధించిన డ్రైనేజీ పైపులైన్ను ఈ రెండు బిల్డింగ్ల మధ్యలో ఉన్న ఖాళీ స్థలంలోకి పోయేలా కనెక్షన్ ఇచ్చారు. అయితే ఈ ప్రాంతంలో ఉన్న మ్యాన్ హోల్స్ నుంచి డ్రైనేజీ నీరు లీకవుతోంది. ఈ నీరంతా హాస్టల్స్ పరిసరాల్లోకి చేరుతుండడంతో కంపు వాసన వస్తోంది. పందులు కూడా ఎక్కువగా తిరుగుతున్నాయి. ఈ విషయంపై పీయూ ఆఫీసర్లకు కంప్లైంట్లు చేస్తున్నా పట్టించుకోవడం లేదు.
- ఈ హాస్టళ్లలో స్టూడెంట్ల కోసం భోజనాన్ని ఆరుబయటే వండుతున్నారు. ఈ రెండు హాస్టళ్లకు కిచెన్ షెడ్ లేకుపోవడంతో, ఆరుబయట వంటలు చేసేందుకు తిప్పలు పడుతున్నారు. వర్షం పడితే వంటలు చేసే పరిస్థితి లేకుండా పోతోంది. ప్రస్తుతం ఉన్న షెడ్కు పైన రేకులు తప్ప చుట్టూ గోడలు కూడా లేవు.
- వర్సిటీలో లైబ్రరీ ఉన్నా అన్ని రకాల పుస్తకాలు అందుబాటులో లేవని, చాలా సందర్భాల్లో స్టూడెంట్లు ఆందోళనకు దిగారు. పోటీ పరీక్షలు, అకడమిక్ పుస్తకాలు లేక చదువుకోవడానికి ఇబ్బందులు పడాల్సి వస్తోందని స్టూడెంట్లు వాపోతున్నారు.
ఏడాదైనా పరిష్కరిస్తలేరు..
హాస్టళ్లలో బాత్ రూమ్స్కు డోర్స్ లేవు. కిటికీలకు అద్దాలు లేక వర్షం పడితే నీళ్లు గదుల్లోకి వస్తున్నాయి. పందులు తిరగడంతో కంపు వాసన వస్తోంది, దీనిపై పలుమార్లు ధర్నాలు, నిరసనలు చేసినా ఎవరూ పట్టించుకుంటలేరు. ఏడాదిగా ఈ సమస్యను పరిష్కరిస్తలేరు.
అర్జున్, ఎంబీఏ, సెకండ్ ఇయర్
క్యాంటీన్ ను ఓపెన్ చేస్తలేరు..
లైబ్రరీ రీడింగ్ హాల్ రూమ్ను ఎంపీ ఎలక్షన్లలో ఈవీఎంలు భద్రపరిచేందుకు స్ట్రాంగ్ రూమ్గా వాడారు. ఇప్పుడు ఎలక్షన్ అయిపోయాయి. ఎప్పటిలాగా రీడింగ్ హాల్ వినియోగంలోకి తెచ్చినా ఫర్నీచర్ ను ఏర్పాటు చేయలేదు. లైబ్రరీలో అకడమిక్ ఇయర్స్ బుక్స్ అప్డేట్ రావడం లేదు. పాత బుక్స్ తోనే వెళ్లదీయాల్సి వస్తోంది.
కృష్ణ కుమార్, ఎమ్మెస్సీ మ్యాథ్స్, సెకండ్ ఇయర్
