హైదరాబాద్: నగంలోని పంజాగుట్టలో ఆర్టీసీ బస్సు కండక్టర్ పై దాడి చేశారు కొందరు విద్యార్థులు..ఫుట్ బోర్డు నుంచి బస్సులోకి రమ్మన్నందుకు.. మమ్మల్నే ఆర్డర్ వేస్తావా అంటూ కండక్టర్ ను చితకబాదారు. ముక్కుపై దాడి చేయడంలో కండక్టర్ విలవిలలాడుతూ పోలీసులకు ఫిర్యాదు చేశాడు. వివరాల్లోకి వెళితే..
మెహదీపట్నం డిపోకు చెందిన ఆర్టీసీ బస్సు జగద్గిరిగుట్ట నుంచి మెహదీపట్నం వైపు వెళ్తుండగా ఘటన చోటు చేసుకుంది. ఎస్ ఆర్ నగర్ వద్ద బస్సు ఎక్కిన విద్యార్థులు అమీర్ పేట్ దాటి పంజాగుట్ట వచ్చిందాక కూడా ఫుట్ బోర్డు ప్రయాణం చేస్తుండటంతో బస్సులోకి రావాలని కండక్టర్ విద్యార్థులను కోరాడు.
దీంతో ఆగ్రహించిన విద్యార్ధులు కండక్టర్ పై దాడి చేసి పారిపోయారు. ముక్కుపై పిడిగుద్దులతో విరుచుకుపడ్డారు. దీంతో కండక్టర్ విలవిలలాడుతూ పంజాగుట్ట పోలీసులను ఆశ్రయించాడు. కండక్టర్ ఫిర్యాదుతో కేసు నమోదు చేసుకున్న పోలీసులు..దాడి చేసిన విద్యార్థులను గుర్తించే పనిలో పడ్డారు.
