- మహబూబ్నగర్ జిల్లా నాగసాల ప్రభుత్వ మైనార్టీ బాలుర గురుకులంలో ఘటన
- 40 మందికి అస్వస్థత
- తొమ్మిది మంది పరిస్థితి విషమం
- హాస్టల్అపరిశుభ్రంగా ఉందన్న కలెక్టర్
- ఆహారం సరిగ్గా లేదని ఆగ్రహం
- విచారణ జరుపుతామన్న విజయేందిర బోయి
మహబూబ్నగర్, వెలుగు : మహబూబ్నగర్ జిల్లా జడ్చర్ల సమీపంలోని నాగసాల వద్ద ఉన్న ప్రభుత్వ మైనార్టీ బాలుర గురుకులంలో ఫుడ్ పాయిజన్అయ్యింది. ఉదయం బ్రేక్ఫాస్ట్ చేసిన తర్వాత స్టూడెంట్లు అస్వస్థతకు గురయ్యారు. తొమ్మిది మందికి సీరియస్గా ఉండడంతో స్థానిక ఏరియా హాస్పిటల్కు తరలించారు. గురుకులంలో 240 మంది చదువుతుండగా, బుధవారం ఉదయం బ్రేక్ఫాస్ట్ లో భాగంగా కిచిడీ పెట్టారు.
తిన్న తర్వాత అందరూ కడుపునొప్పితో బాధపడ్డారు. వాంతులు చేసుకున్నారు. 40 మంది అస్వస్థతకు గురి కాగా..సోఫియాన్, ఆయూబ్, అయాన్, అబ్దుల్రషీద్, సమీర్, చరన్, అబ్రార్, మనీశ్, మాసుం బాబా పరిస్థితి సీరియస్గా ఉండడంతో జడ్చర్ల ఏరియా హాస్పిటల్కు తరలించారు. మిగతా వారికి గురుకులం వద్దకే వచ్చిన డాక్టర్లు ట్రీట్మెంట్ చేశారు. కలెక్టర్ విజయేందిర బోయి, అడిషనల్ కలెక్టర్ శివేంద్ర ప్రతాప్, డీఎంహెచ్వో పద్మజ గురుకులానికి వచ్చి విద్యార్థుల ఆరోగ్య పరిస్థితిని డాక్టర్లను అడిగి తెలుసుకున్నారు. హాస్టల్ను పరిశీలించారు.
హాస్టల్ ప్రాంగణం అపరిశుభ్రంగా ఉండడంతో సిబ్బందిపై కలెక్టర్ ఫైర్ అయ్యారు. కలెక్టర్ మాట్లాడుతూ హాస్టల్లో అపరిశుభ్ర వాతావరణం ఉందని, ఆహారం సరిగ్గా లేదన్నారు. దీనిపై విచారణ జరిపి బాధ్యులపై చర్యలు తీసుకుంటామన్నారు. స్టూడెంట్లకు ఎలాంటి ప్రమాదం లేదని డీఎంహెచ్వో పద్మజ తెలిపారు. మధ్యాహ్నం గురుకులంలోనే అడిషనల్ కలెక్టర్ శివేంద్ర ప్రతాప్ విద్యార్థులతో కలిసి భోజనం చేశారు. కలెక్టర్ వెంట తహసీల్దార్సత్యనారాయణ రెడ్డి, మున్సిపల్ కమిషనర్ రాజయ్య, డిప్యూటీ డీఎంహెచ్వో శ్రీధర్ రెడ్డి ఉన్నారు.
