- చదువు చెప్పట్లేదని నిరసన
వికారాబాద్, వెలుగు: వికారాబాద్ జిల్లా తాండూరులోని శ్రీసాయి డిగ్రీ కాలేజీకి తాళం వేసి విద్యార్థి సంఘాల నాయకులు సోమవారం ఆందోళన చేపట్టారు. అధిక ఫీజులు వసూలు చేసి చదువు చెప్పకుండా విద్యార్థుల జీవితాలతో చెలగాటం ఆడుతున్న కాలేజీపై చర్యలు తీసుకోవాలని డిమాండ్ చేశారు.
కాలేజీలో సుమారు 300 మంది ఉండగా, గత నవంబర్‌ నుంచి అరకొరగా తరగతులు నిర్వహిస్తున్నారని విద్యార్థులు ఆరోపించారు. ఈ విషయమై ఉన్నతాధికారులకు ఫిర్యాదు చేసినా స్పందించడం లేదన్నారు. కాలేజీ కరస్పాండెంట్ మల్లేశ్ యాదవ్ స్పందించి సమస్యలు పరిష్కారిస్తామని హామీ ఇవ్వడంతో ఆందోళన విరమించారు.
ఫీజు కట్టలేదని పరీక్ష రాయనీయలే..
ఎల్బీనగర్: ఫీజు కట్టలేదని పరీక్ష రాయనీయకుండా స్టూడెంట్ను బయట నిల్చోబెట్టిన స్కూల్యాజమాన్యంపై చర్యలు తీసుకోవాలని జీహెచ్ఎంసీ కాంగ్రెస్ పార్టీ ఫ్లోర్ లీడర్, లింగోజిగూడ కార్పొరేటర్ ధర్పల్లి రాజశేఖర్ రెడ్డి డిమాండ్ చేశారు. లింగోజిగూడలోని పల్లవి అవేర్ ఇంటర్నేషనల్ స్కూల్ ఎదుట బాధిత పేరెంట్స్ తో కలిసి సోమవారం ఆయన ఆందోళనకు దిగారు.
రూ. 7 వేల ఫీజు చెల్లించలేదని స్టూడెంట్ను క్లాస్ బయట నిలబెట్టిన పాఠశాల యజమాన్యం.. గత 8 ఏండ్లుగా జీహెచ్ఎంసీకి రూ. 14.63 లక్షలు బకాయిలు చెల్లించలేదని ఆరోపించారు. ఆ పాఠశాలపై ఏం చర్యలు తీసుకుంటారని అధికారులను ప్రశ్నించారు. ప్రిన్సిపాల్ తో గట్టిగా వాదించిన తర్వాత విద్యార్థిని పరీక్షకు అనుమతించినట్లు కార్పొరేటర్ తెలిపారు.
