- తమ దగ్గరే కొనాలంటూ పేరెంట్స్కు ప్రైవేట్ కాలేజీల మెసేజ్లు
- బహిరంగ మార్కెట్లో దొరకని పుస్తకాలు
- స్టూడెంట్స్, తల్లిదండ్రుల్లో నెలకొన్న ఆందోళన
- జులై ఫస్ట్ నుంచి ఇంటర్ తరగతులు షురూ
ఎస్ ఆర్ నగర్లోని ఓ ప్రైవేటు కాలేజీలో ఎంపీసీలో జాయిన్ అయ్యా. కాలేజీ లోనే స్టడీ మెటీరియల్ తీసుకున్నా. నాలుగు సబ్జెక్ట్లకు సంబంధించినవి మాత్రమే ఇచ్చారు. మిగిలినవి షార్టేజ్ ఉన్నాయని.. వచ్చాక ఇస్తామన్నారు. అయితే అడ్మిషన్ కోసం నాన్నతో వెళ్లినప్పుడు మొత్తం ఫీజులో 40 పర్సెంట్ కడితేనే మెటిరియల్ ఇస్తామని మేనేజ్మెంట్ చెప్పింది. దీంతో పాటు మెటీరియల్ కి ఐదు వేలు కట్టాలని తెలిపింది. అంత అమౌంట్ కట్టాలంటే ఇంట్లో చాలా ఇబ్బందిగా ఉంది” అని
ఇంటర్ ఫస్టియర్ స్టూడెంట్ విష్ణు తెలిపాడు.
హైదరాబాద్, వెలుగు: ఇంటర్ కాలేజ్ స్టూడెంట్లకు స్టడీ మెటీరియల్ తిప్పలు షురూ అయినయ్. జులై నుంచి కాలేజీలు స్టార్ట్ అవుతుండగా అప్పుడే స్టూడెంట్లలో ఆందోళన మొదలైంది. ఇంటర్ ఫస్ట్ ,సెకండ్ ఇయర్ స్టూడెంట్స్ ఈ సమస్యను ఎదుర్కొంటున్నారు. కాలేజీల్లోనే ఇస్తున్నామని మేనేజ్మెంట్లు చెప్తున్నా.. పూర్తి మెటీరియల్స్ అందుబాటులో లేవు. అయితే స్టూడెంట్లు ఫీజు చెల్లించాక పూర్తి మెటీరియల్లో కొన్ని సబ్జెక్ట్లకు సంబంధించినవి మాత్రమే ఇస్తున్నాయి. ఎంపీసీలో 26 స్టడీ మెటీరియల్స్ ఉంటే అందులో నాలుగు మాత్రమే ఇచ్చి మిగతావి లేవని చెప్తున్నాయి. మిగిలినవి విడతల వారీగా ఇస్తామంటున్నాయి. ఎంపీసీ, ఎంఈసీ, సీఈసీ, బైపీసీ ఇలా అన్ని గ్రూప్లకు చెందిన స్టూడెంట్స్ది ఇదే పరిస్థితి. చైతన్య, నారాయణ వంటి కార్పొరేట్ కాలేజీల్లో మేనేజ్ మెంట్లు సొంత మెటీరియల్ ప్రిపేర్ చేస్తున్నాయి. బయట మార్కెట్లో తీసుకోవద్దని, తమ వద్దే తీసుకోవాలని పేరెంట్స్కి మెసేజ్లు పంపిస్తున్నాయి. పూర్తి ఫీజులో 20 నుంచి 40శాతం కట్టిన తర్వాత మాత్రమే మెటీరియల్ని అందిస్తామని చెప్తున్నాయి. దీంతో కొనక తప్పని పరిస్థితి కావడంతో పేరెంట్స్ ముందే చెల్లిస్తున్నారు. కాలేజ్ ఫీజుతో పాటు మెటీరియల్కి రూ. 3 నుంచి 5 వేలు వసూలు చేస్తున్నాయి. కొన్ని కాలేజీలు తమ వద్ద మెటీరియల్ లేదని మార్కెట్ లోనే కొనుక్కోవాలని సూచిస్తున్నాయి.
70 శాతం సిలబస్‌‌తోనే క్లాసులు
రాష్ట్రంలో జులై 1 నుంచి ఇంటర్ తరగతులు ప్రారంభమవుతాయని ఇంటర్మీడియట్ బోర్డు కార్యదర్శి ఉమర్‌ జలీల్‌ రెండ్రోజుల క్రితం తెలిపారు. స్టూడెంట్స్కు ఒకరోజు ఫిజికల్ క్లాసులు, మరో రోజు ఆన్లైన్ ఉంటాయని పేర్కొన్నారు. జులై 1న ఫస్ట్ ఇయర్ స్టూడెంట్స్కి, 2న సెకండ్ ఇయర్ స్టూడెంట్స్ కి క్లాసులు స్టార్ట్ అవుతాయని తెలిపారు. విద్యా సంవత్సరం మొత్తం ప్రత్యక్ష తరగతులతో పాటు ఆన్‌‌లైన్లోనూ నిర్వహిస్తామని చెప్పారు. ఈ నెల 25 నుంచి లెక్చరర్లు కాలేజీలకు రావాలని ఆదేశించారు. 70 శాతం సిలబస్‌‌తోనే ఈ ఏడాది నిర్వహించే యోచనలో ఉన్నామన్నారు. ఇంటర్ ఫస్ట్ ఇయర్ ఆధారంగా సెకండ్ ఇయర్ స్టూడెంట్స్కు
మార్కులు కేటాయిస్తామన్నారు.
ఎక్కువ రేటుకి కొన్నాం
మా అమ్మాయి ఓ ప్రైవేట్ జూనియర్ కాలేజీలో ఎంఈసీలో జాయినైంది. ఫస్ట్ ఇయర్కి సంబంధించి పుస్తకాల కోసం కాలేజ్ మేనేజ్మెంట్ను అడిగితే బయటే తీసుకోవాలని చెప్పింది. షాపుల్లో అడిగితే ఎంఈసీ మెటీరియల్ షార్టేజ్ ఉందని చెప్పారు. తెలిసిన వాళ్ల ద్వారా తెప్పిస్తే
మెటీరియల్స్ కాస్ట్ రూ. 600 అయితే రూ.వెయ్యి తీసుకున్నారు. - రాము, పేరెంట్, సికింద్రాబాద్
బుక్స్ లేకుండనే ఆన్లైన్ క్లాసులు
మా అబ్బాయిని ఓ ప్రైవేట్ జూనియర్ కాలేజీలో ఎంపీసీ గ్రూప్లో జాయిన్ చేశాం. కాలేజ్ మేనేజ్మెంట్ ఫీజు రూ. 50 వేలని చెప్పి, అడ్మిషన్ ఫీజు రూ. 3 వేలు తీసుకుంది. ఈ నెల మొదటివారం నుంచే ఆన్లైన్ క్లాసులు ప్రారంభించారు. ఇంతవరకు ఎలాంటి మెటీరియల్ ఇవ్వలేదు. లెక్చరర్లు బోర్డ్ మీద చెప్తుంటే నోట్స్ రాసుకుంటున్నాడు. స్టడీ మెటీరియల్ బయట తీసుకుందామంటే, కాలేజీలోనే ఇస్తామని, ఓపెన్ అయ్యాకే తీసుకోవాలని చెప్పింది. మెటీరియల్ లేకుండా నోట్స్ రాసుకుని చదవడం అబ్బాయికి కష్టంగా ఉంది. - అనిత,పేరెంట్, కొత్తపేట్
