కేటియా హెర్రెయా. మెక్సికన్ అయిన ఈమె ఫొటోగ్రాఫర్, వీడియోగ్రాఫర్, ఇండస్ట్రియల్ డిజైనర్... వీటన్నింటికీ మించి ఒక ఫైబర్ ఆర్టిస్ట్. ఆ ఆర్ట్ ద్వారానే దేశాలు, ఖండాలు దాటి గుర్తింపును సొంతం చేసుకుంది. ఫొటోగ్రఫీ పట్ల ఆమెకి ఉన్న ప్రేమను హ్యాండ్ ఎంబ్రాయిడరీతో కలిపి కొత్త ఆర్ట్ను ఆవిష్కరించింది. ఒక్క మాటలో చెప్పాలంటే మధురమైన జ్ఞాపకాలను తరాల తరబడి గుర్తు చేసే ఫొటోగ్రాఫ్లకు ఎంబ్రాయిడరీ ద్వారా ఆ ఫొటోలను వైబ్రెంట్ పీస్ ఆర్ట్గా మారుస్తోంది. ఆ ఎంబ్రాయిడరీతో ఒక పూల బొకే లేదా ఫొటో బ్యాక్గ్రౌండ్లో అందమైన చెట్లు ఏవైనా ఇమిడిపోతాయి. అలా ఒక్కో పాత ఫొటోలో కొత్త జీవాన్ని నింపుతోంది.
‘‘ఎంబ్రాయిడరీలో వాడే మెరిసే రంగులు, లోతైన ప్యాటర్న్స్కు స్ఫూర్తి నా మెక్సికన్ హెరిటేజ్. అందుకే నా వర్క్లో మీకు వైబ్రెంట్ కలర్స్, రిచ్ టెక్చర్, డైవర్స్ టెక్స్టైల్స్ ఉంటాయి. మెక్సికన్ కల్చర్లో పలురకాల రంగులు, ఫ్లేవర్స్, ట్రెడిషన్స్ ఉంటాయి. మామూలుగా కనిపించే ఫొటోలకు ఎంబ్రాయిడరీ చేసి అందమైన ఆకృతి ఇస్తున్నా. ఇండస్ట్రియల్ డిజైనర్, ఫొటోగ్రాఫర్, వీడియోగ్రాఫర్ అయిన నేను హ్యాండ్ ఎంబ్రాయిడరీని మిక్స్డ్ మీడియా ఆర్ట్గా మార్చా. నాకు ఈ ఐడియా వచ్చింది కరోనా ప్యాండెమిక్ టైంలో. అప్పుడే అనిపించింది పాత ఫొటోగ్రాఫ్లకు మరింత జీవం నింపి, ఆనందాల్ని జతచేయొచ్చు కదా అని.
ఆ ఆలోచన వచ్చిన వెంటనే ప్రయోగాలు చేయడం మొదలుపెట్టా. అప్పుడే ఎంబ్రాయిడరీ త్రెడ్స్ను అందులో భాగం చేశా. జ్ఞాపకాలను పట్టి ఉంచిన ఫొటోలకు ఎక్స్ట్రా డైమన్షన్ కలిపి మరింత అందంగా కనిపించేలా చేయడం మొదలుపెట్టా. ఫొటోగ్రాఫ్స్ జ్ఞాపకాలనే కాదు కొన్నిసార్లు మనలోని సెన్సరీ ఎక్స్పీరియెన్స్ని కూడా తట్టి లేపుతాయి అని చెప్పొచ్చు! కొన్ని ఫొటోలను చూస్తుంటే ఆ ప్లేస్కి సంబంధించిన వాసన ఫీలయిన సందర్భాలు ఉంటాయి. ఒకసారి గుర్తు తెచ్చుకోండి. మీరూ అలానే ఫీలై ఉంటారు. ఫొటోగ్రఫీని ఎంబ్రాయిడరీతో కలపడం వల్ల సహజంగానే ఆ ఫొటో బ్యూటీ, ఎమోషన్స్ మెరుగుపడతాయి.
ట్రెడిషనల్ ఆర్ట్ ఫామ్స్ను మోడర్న్ మీడియాతో కలపాలనే ఆలోచన నుంచి పుట్టిందే ఫొటో ఎంబ్రాయిడరీ ఆర్ట్. ఫొటోగ్రఫీ అంటే విజువల్ స్టోరీ టెల్లింగ్. ఎంబ్రాయిడరీతో ఎక్స్పరిమెంట్స్ నేను ఇంతకుముందు చేయలేదు. కాకపోతే ట్రెడిషనల్ ఫ్యాబ్రిక్ కుట్టును పేపర్ మీద పెట్టి, దాన్ని డెవలప్ చేశా. యునిక్ టెక్నిక్తో సృజనాత్మకతకు కొత్త దారులు వేశా. పని మొదలుపెట్టేముందు ఆ ఫొటోగ్రాఫ్ను విశ్లేషించి చూస్తా.
ఇంతకుముందు నేను వెడ్డింగ్ ఫొటోగ్రాఫర్ని కూడా కావడం వల్ల నేను వర్క్ చేయాలనుకున్న ఫొటోగ్రాఫ్ సబ్జెక్ట్లో ఎలిమెంట్స్ ప్రాముఖ్యత బాగా అర్థమవుతుంది. ఆ ఎలిమెంట్స్ను హైలైట్ చేస్తా. జ్ఞాపకార్ధంగా వర్క్ చేయించుకునేందుకు ఎవరైనా నా దగ్గరకు వస్తే... ఆ క్లయింట్ల కోసం నేను వెళ్తా. వాళ్ల నుంచి దూరమైన వాళ్ల ప్రియమైన వ్యక్తుల్లో ఉన్న ప్రత్యేకమైన విషయాలను తెలుసుకుంటా. వాటన్నింటినీ చేసే ఎంబ్రాయిడరీలో ఉంచాలని డిసైడ్ అవుతా. ఆ తరువాత ఏ ఎంబ్రాయిడరీ చేయాలి? దాన్ని ఎక్కడ ఉంచాలి? అనే విషయం ఛాలెంజింగ్గా ఉంటుంది. కానీ అదే చాలా కీలకం. అదే ఆ ఫొటోగ్రాఫ్ను అర్థవంతంగా మారుస్తుంది.
చాలావరకు పాత ఫొటోగ్రాఫ్లను ఆల్బమ్స్, బాక్స్ల్లో పెట్టి భద్రపరుచుకుంటారు. వాటిలో జీవం నింపుతా. ఫొటోలకు పాత కాలం నాటి అందమైన రోజుల్లోకి తీసుకెళ్లే శక్తి ఉంటుంది. అలాగే ఆ జ్ఞాపకాలను చాలా కాలం భద్రంగా నిక్షిప్తంగా ఉంచుతాయి కూడా. అలాంటి వాటికి ఎంబ్రాయిడరీని కలపడం వల్ల ఆ జ్ఞాపకాలను మెరుగుపరిచనట్టు అవుతుంది. అప్పుడవి స్పెషల్గా కనిపించడమే కాకుండా వాటితో ఎమోషనల్గా ఇంకాస్త గట్టిగా కనెక్ట్ అవుతారు” అని చెప్పింది కేటియా.
