ఫర్టిలైజర్ దుకాణాలను తనిఖీ చేసిన కలెక్టర్లు
వరంగల్సిటీ/ ములుగు/ స్టేషన్ఘన్పూర్/ హసన్పర్తి, వెలుగు: రైతులకు సరిపడా విత్తనాలు అందుబాటులో ఉన్నాయని వరంగల్, ములుగు కలెక్టర్లు ప్రావీణ్య, ఇలా త్రిపాఠి తెలిపారు. శుక్రవారం గ్రేటర్ వరంగల్, ములుగు జిల్లా కేంద్రంలోని పలు విత్తన విక్రయ దుకాణాలను వేర్వేరుగా తనిఖీలు చేశారు. ఈ సందర్భంగా వారు క్రయవిక్రయాలకు సంబంధించిన రిజిస్టర్, విత్తన ప్యాకెట్లు, స్టాకు వివరాలను తెలుసుకున్నారు. నాణ్యమైన విత్తనాలను అమ్మాలని, అధిక ధరకు విక్రయించవద్దని సూచించారు. రైతులకు విత్తన కొనుగోళ్లకు సంబంధించిన రసీదులను తప్పనిసరిగా ఇవ్వాలన్నారు. ములుగు కలెక్టర్ నేరుగా రైతులకు ఫోన్ చేసి విత్తన కొనుగోళ్లు ఎలా చేశారని అడిగి తెలుసుకున్నారు. వారివెంట వ్యవసాయ అధికారులు ఉషా దయాల్, విజయ చంద్ర, ఏడీ శ్రీపాల్, ఏడీఏ సురేశ్ తదితరులున్నారు.
జనగామ జిల్లా స్టేషన్ఘన్పూర్లోని పలు ఫర్టిలైజర్దుకాణాలు, ఆగ్రోస్ సేవా కేంద్రాన్ని కలెక్టర్ రిజ్వాన్బాషా షేక్తనిఖీ చేశారు. రిజిస్టర్లను పరిశీలించి, పత్తి విత్తనాలు కొన్న రైతులతో ఫోన్లో మాట్లాడారు. అనంతరం చిలపూరు మండలం రాజవరంలోని అన్నపూర్ణ ఏజెన్సీస్ను తనిఖీ చేశారు. ఆ తర్వాత ఎంపీపీఎస్ను సందర్శించి స్కూల్లో జరుగుతున్న పనులపై ఆరా తీశారు. కలెక్టర్ వెంట డీఏవో వినద్కుమార్, ఏవో చంద్రన్కుమార్, స్టేషన్ఘన్పూర్ తహసీల్దార్ వెంకటేశ్వర్లు, ఎంపీడీవో వేణుగోపాల్రెడ్డి ఉన్నారు. హనుమకొండ జిల్లా హసన్పర్తి మండల కేంద్రంలో మండల అగ్రికల్చర్ ఆఫీసర్ అనురాధ పలు ఫర్టిలైజర్ దుకాణాల్లో టాస్క్ఫోర్స్ టీంతో కలిసి తనిఖీలు చేశారు. ఆమె వెంట హసన్ పర్తి సీఐ సురేశ్, తహసీల్దర్ ప్రసాద్ పాల్గొన్నారు.
