- పరిహారం రాక, పెండ్లి కుదరక నిర్వాసితుడి ఆత్మహత్య
- యాదాద్రి జిల్లా తిమ్మాపూర్లో ఘటన
- ఊరు ముంపుకు గురవుతున్నదని కుదరని సంబంధాలు
- మనస్తాపంతో ఇంట్లో ఉరేసుకున్న బాధితుడు
- ఇది ప్రభుత్వ హత్యే అంటూ బీజేపీ రాస్తారోకో
- 2 లక్షలు పరిహారం అందించిన ఆర్డీవో
యాదాద్రి, వెలుగు: బస్వాపురం రిజర్వాయర్ కారణంగా నిర్వాసితుడిగా మారిన ఓ యువకుడికి పెండ్లి కాకపోవడంతో చివరకు ఆత్మహత్య చేసుకున్నాడు. ఈ సంఘటన యాదాద్రి జిల్లా భువనగిరిలో జరిగింది. నిర్వాసితుడి కుటుంబానికి న్యాయం చేయాలని డిమాండ్ చేస్తూ బీజేపీ ఆందోళనకు దిగింది. యాదాద్రి జిల్లాలోని కాళేశ్వరం ప్యాకేజీలో భాగంగా నిర్మిస్తున్న బస్వాపురం రిజర్వాయర్ కారణంగా బీఎన్ తిమ్మాపూర్ గ్రామం ముంపుకు గురైంది. నిర్వాసితులకు పరిహారం ఇస్తామని చెప్పిన సర్కారు మాట తప్పింది. దీంతో పరిహారం కోసం నిర్వాసితులు కొన్నేండ్లుగా ఎదురుచూస్తున్నారు. నెల రోజులుగా ఆందోళన నిర్వహిస్తున్నారు. ఆ గ్రామానికి చెందిన వల్దాసు బాలస్వామి(25)కు ఇటీవల పెండ్లి సంబంధాలు వచ్చాయి. ఊరు మునిగిపోతుండడం, ఇల్లు కూడా లేకపోవడంతో సంబంధాలు కుదరలేదు.
దీంతో మనస్తాపానికి గురైన బాలస్వామి.. ఆదివారం రాత్రి తన ఇంట్లో ఉరేసుకొని ఆత్మహత్య చేసుకున్నాడు. ఈ విషయం బయటకు రావడంతో గ్రామంలో ఉద్రిక్త వాతావరణం ఏర్పడింది. దీంతో పోలీసులు సోమవారం బాలస్వామి డెడ్బాడీని భువనగిరి జిల్లా ఆస్పత్రికి తరలించారు. బీజేపీ యాదాద్రి జిల్లా అధ్యక్షుడు శ్యాంసుందర్రావు ఆధ్వర్యంలో హాస్పిటల్ ఎదుటే ఆ పార్టీ కార్యకర్తలు ఆందోళనకు దిగారు. ఇన్చార్జ్ అడిషనల్ కలెక్టర్, ఆర్డీవో భూపాల్రెడ్డి అక్కడికి చేరుకొని కాళేశ్వరం ఎస్ఈ శ్రీనివాస్కు ఫోన్ చేసి పరిస్థితిని వివరించారు. ఆయన వెంటనే రూ.2 లక్షలు నగదు పంపారు. చివరకు రూ.2 లక్షల పరిహారం అందించింది. ఆర్అండ్ ఆర్ ప్యాకేజీ కింద నిర్వాసితుడికి రావాల్సిన రూ.7.50 లక్షలు ఇస్తామని హామీ ఇచ్చారు..
