కామారెడ్డి జిల్లాలో అతి తక్కువ విస్తీర్ణంలో కూరగాయల సాగు
ఏడాది కింద శివాయిపల్లిని పైలట్ప్రాజెక్టుగా ఎంపిక చేసిన కలెక్టర్
రైతులకు అందని ప్రోత్సాహకాలు
ఎప్పట్లాగే ఇతర ప్రాంతాల నుంచి కూరగాయల దిగుమతి..
కామారెడ్డి , వెలుగు: కామారెడ్డి జిల్లాలో కూరగాయల సాగుకు అనువైన భూములు ఉన్నప్పటికీ రైతులకు ప్రోత్సాహం లేకుండా పోయింది. కూరగాయల సాగు విస్తీర్ణం పెంచాలని గతేడాది కలెక్టర్చేసిన ఆలోచన నేటికీ కార్యరూపం దాల్చలేదు. రాజంపేట మండలం శివాయిపల్లిని పైలట్ ప్రాజెక్టుగా ఎంపిక చేసినప్పటికీ వ్యవసాయాధికారులు మీటింగులు, సర్వేలతోనే సరిపెట్టారు. ఆధునాతన పద్ధతుల్లో కూరగాయల సాగుకు అవసరమైన సామగ్రి, టెక్నాలజీ తోపాటు మార్కెటింగ్ సౌకర్యం కల్పిస్తామన్న మాటలు కాగితాలకే పరిమితమయ్యాయి. లోకల్ అగ్రికల్చర్ ఆఫీసర్లు పంపిన ప్రపోజల్స్ హార్టికల్చర్ఉన్నతాధికారుల టేబుల్మీదే ఉండిపోవడంతో శివాయిపల్లిలోనూ కూరగాయల సాగువిస్తీర్ణం పెరగలేదు. పైలట్ ప్రాజెక్ట్పరిస్థితే ఇట్లా ఉండడంతో ఎప్పట్లాగే ఈసారి కూడా జిల్లాలో కూరగాయలకు కరువొచ్చింది. పక్క రాష్ట్రాల నుంచి ఇతర జిల్లాల నుంచి దిగుమతి చేసుకోవాల్సి రావడంతో కూరగాయల రేట్లు సామాన్యులకు చుక్కలు చూపుతున్నాయి.
8 వేల ఎకరాల్లో కూరగాయల సాగు
జిల్లాలో వ్యవసాయానికి అనుకూలంగా 5 లక్షల 40 వేల ఎకరాల భూమి ఉంది. ఇందులో 8 వేల ఎకరాల్లో (1.5 శాతం) కూరగాయలు సాగు చేస్తున్నారు. ప్రధానంగా టమాట, బెండ, బీర, పచ్చి మిర్చి, చిక్కుడు, ఉల్లి, వంకాయ, కాకర, క్యాబేజీ, క్యాలిప్లవర్, బిర్నీస్, ఆకుకూరలు పండిస్తున్నారు. అతి తక్కువ విస్తీర్ణంలో సాగు చేయడంతో దిగుబడులు జిల్లా అవసరాలు తీర్చలేకపోతున్నాయి. ఈ పరిస్థితుల్లో ఇతర జిల్లాలు, ఏపీ, మహారాష్ర్ట నుంచి దిగుమతి చేసుకోవాల్సిన పరిస్థితి ఉంది. రైతులను చైతన్య పర్చటం, కూరగాయల సాగు మెళకువలపై అవగాహన కల్పించే విషయంలో హార్టికల్చర్ శాఖ చొరవ చూపడం లేదనే విమర్శలు ఉన్నాయి. దీనికి తోడూ గవర్నమెంట్పరంగా ప్రోత్సహకాలు అందట్లేదు. ప్రస్తుతం మార్కెట్లో కూరగాయల రేట్లు కిలోకు రూ.60 నుంచి 80 పలుకుతున్నాయి. టమాట కిలోకు రూ.100, పచ్చి మిర్చి రూ.120 పలుకుతున్నాయి.
సాగు పెంపుపై నిర్లక్ష్యం
రాజంపేట మండలం బసన్నపల్లి, శివాయిపల్లి, కామారెడ్డి మండలం కొటాల్పల్లి, లింగాపూర్, సదాశివనగర్ మండలం కుప్రియాల్, మర్కల్, తాడ్వాయి మండలం బ్రహ్మన్పల్లి, దేవాయిపల్లి, కృష్జాజీవాడి, భిక్కనూరు మండలం గుర్జకుంట, రామేశ్వర్పల్లిల్లో కూరగాయల సాగు ఎక్కువగా ఉంది. ఇక్కడి రైతులు పండిస్తున్న కూరగాయలు జిల్లా అవసరాలను తీర్చలేకపోతున్నాయి. ఈ గ్రామాలు జిల్లా కేంద్రంతో పాటు, హైదరాబాద్కు సమీపంలో ఉన్నాయి. ఇక్కడి రైతులను ప్రోత్సహించి సాగు విస్తీర్ణం పెంచటంతో పాటు సరైన సాగు పద్ధతులు పాటించడం, మార్కెటింగ్ సౌకర్యాలు మెరుగు పర్చటం వంటి వాటిపై దృష్టి పెడితే దిగుబడి పెరిగే అవకాశముందని కలెక్టర్ జితేశ్ పాటిల్ భావించి కింద చర్యలు చేపట్టారు.
పైలట్ ప్రాజెక్టుగా శివాయిపల్లి
రాజంపేట మండలం శివాయిపల్లిని పైలట్ ప్రాజెక్టుగా సెలక్ట్ చేసి కూరగాయల సాగు పెంచాలని నిర్ణయించారు. ప్రస్తుతం ఈ ఊరిలో 50 ఎకరాల్లో కూరగాయలు పండిస్తున్నారు. గ్రామంలో రైతులతో కలెక్టర్ మీటింగ్ నిర్వహించారు. అగ్రికల్చర్ ఆఫీసర్ల ద్వారా పూర్తి వివరాలుసేకరించారు. వీరితో ఓ సారి ట్రైనింగ్కూడా ఏర్పాటు చేశారు. రైతులతో, నిపుణులతో ట్రైనింగ్ క్లాసులు నిర్వహించటం, తీగ జాతి కూరగాయల సాగుకు అవసరమైన పందిళ్లు, కూరగాయల నిల్వకు బుట్టలు , మల్చింగ్కవర్లు, సోలార్ సిస్టమ్, స్థానికంగా మార్కెటింగ్ సౌకర్యం కల్పించేందుకు ప్లాన్ తయారు చేశారు. హార్టికల్చర్ ఉన్నతాధికారులకు ప్రపోజల్స్ వెళ్లినప్పటికీ ఇప్పటి వరకు కార్యరూపం దాల్చలేదు. ప్రస్తుతం ఇక్కడ ట్రైనింగ్లు కూడా నిర్వహించటం లేదు. దీంతో ఈ గ్రామంలో కూరగాయల సాగు విస్తీర్ణం పెరగలేదు.
రైతులకు అవగాహన కల్పిస్తున్నాం
కూరగాయాల సాగు పెంచేందుకు రైతులకు అవగాహన కల్పిస్తున్నాం. శివాయిపల్లిని పైలట్ ప్రాజెక్టుగా ఎంపిక చేసి ప్రపొజల్స్ పంపాం. రైతులకు ట్రైనింగ్ ఇచ్చాం. ఉన్నతాధికారుల నుంచి ఆదేశాలు రాగానే పక్రియ షూరు చేస్తాం.
రాజు, హార్టికల్చర్ ఆఫీసర్, కామారెడ్డి డివిజన్
