చాలామంది నేటితరం యువతకి గవర్నెమెంట్ జాబ్ అనేది కల. దీనికోసం అహర్నిశలు కష్టపడుతుంటారు. ఈక్రమంలో తల్లిదండ్రులకు దూరంగా ఉంటూ కోచింగ్ సెంటర్స్ లో ఏళ్ళ తరబడి కోచింగ్ తీసుకుంటూ, అలాగే ఎక్కడో సిటీలలో పార్ట్ టైం జాబ్స్ చేస్తూ చదువుకుంటున్నవాళ్ళు కూడా లేకపోలేదు. కానీ కష్టపడి పని చేస్తే కచ్చితంగా ఫలితం దక్కుతుందని చెప్పడంలో ఎలాంటి సందేహం లేదు.
అయితే టాలీవుడ్ ప్రముఖ డైరెక్టర్ సుకుమార్ ఇంట్లో కేర్ టేకర్ గా పని చేస్తున్న దివ్య అనే యువతి ప్రభుత్వ ఉద్యోగం సాధించింది. దీంతో సుకుమార్ మరియు ఆయన సతీమణి తబిత సుకుమార్ దివ్య ని అభినందించారు. అలాగే ఈ విషయాన్ని సోషల్ మీడియా ద్వారా అభిమానులతో పంచుకున్నారు.
ఇందులోభాగంగా "ఈ రోజు మాతో ఉంటూ పని చెయ్యడానికి వచ్చిన అమ్మాయి తన చదువు పూర్తిచేసుకుని, ప్రభుత్వ ఉద్యోగానికి సెలక్ట్ అయినందుకు మాకు చాలా సంతోషంగా ఉందని పేర్కొన్నారు. ఇలాగే కష్టపడి పనిచేసి తాను అనుకున్నది సాధించాలని మనస్ఫూర్తిగా కోరుకుంటున్నామని తెలిపారు. అలాగే దివ్య ని చూస్తే మాకు గర్వంగా ఉందంటూ" ఆమెతో కలసి దిగిన ఫోటోని షేర్ చేశారు. దీంతో నెటిజన్లు దివ్య కి అభినందనలు తెలియజేస్తున్నారు. అలాగే పని చేస్తూ చదువు పూర్తి చేసి గవర్నమెంట్ ఉద్యోగం సాధించడమనేది అభినందనీయమని, దివ్య నేటితరం యువతకి ఆదర్శమని కామెంట్లు చేస్తున్నారు.
ఈ విషయం ఇలా ఉండగా ప్రస్తుతం సుకుమార్ ఐకాన్ స్టార్ అల్లు అర్జున్ హీరోగా నటించిన పుష్ప 2: ది రూల్ సినిమాకి దర్శకత్వం వహిస్తున్నాడు. ఈ సినిమా షూటింగ్ పూర్తి చేసుకుని రిలీజ్ కి సిద్ధంగా ఉంది. డిసెంబర్ 05న వరల్డ్ వైడ్ గ్రాండ్ గా రిలీజ్ కాబోతోంది. అయితే పుష్ప : ది రైజ్ బ్లాక్ బస్టర్ హిట్ అవ్వడంతో పుష్ప 2 భారీ అంచనాలు నెలకొన్నాయి. పుష్ప 2 లో జగపతిబాబు, ఫహద్ ఫాజిల్, రష్మిక మందాన, అజయ్, జగదీశ్, తదితరులు ప్రధాన తారాగణంగా నటించారు. ఇటీవలే పుష్ప 2 ట్రైలర్ రిలీజ్ కాగా మంచి రెస్పాన్స్ వచ్చింది.
