- రైతు సంఘం వినతితో స్పందించిన సర్కారు
హైదరాబాద్, వెలుగు: రాష్ట్రంలో త్వరలో పొద్దు తిరుగుడు కొనుగోళ్లు చేపట్టనున్నారు. పంటకొనుగోళ్లకు కేంద్రం గ్రీన్ సిగ్నల్ ఇవ్వడంతో రాష్ట్రంలో పొద్దు తిరుగుడు సాగు చేసిన ప్రాంతాల్లో కొనుగోలు చేయడానికి వ్యవసాయశాఖ సిద్దమవుతోంది. సన్ఫ్లవర్పంటను రైతులు తక్కువ ధరకే వ్యాపారులకు అమ్ముకొని నష్టపోతున్నారని.. వెంటనే కొనుగోళ్లు చేపట్టాలని రైతు సంఘం సహాయ కార్యదర్శి మూఢ్ శోభన్ ఆధ్వర్యంలో అగ్రికల్చర్ సెక్రటరీ రఘునందన్రావును కలిసి వినతిపత్రం అందించారు.
దీనికి స్పందించిన సెక్రటరీ త్వరలో కొనుగోళ్లు చేపడతామన్నారు. రాష్ట్రంలో 16,840 ఎకరాలల్లో రైతులు పొద్దుతిరుగుడు పంటను వేశారు. ఒక ఎకరాకు 8 నుంచి 10 క్వింటాళ్ల వరకు పొద్దు తిరుగుడు గింజలు వస్తాయి. ప్రభుత్వం క్వింటాలుకు రూ.7,280 మద్దతు ధరను ప్రకటించింది. వ్యాపారులు రూ.4,800 నుంచి రూ.5,200కు క్వింటాలు చొప్పున కొనుగోలు చేస్తున్నారు. దీంతో దాదాపు రూ.2 వేలు నష్టపోవాల్సిన పరిస్థితి రైతులకు ఏర్పడింది. ఈ నేపథ్యంలో రైతు సంఘం వినతితో స్పందించిన సర్కారు కొనుగోళ్లకు సిద్ధమవుతోంది.
