కోల్కతా స్టార్ స్పిన్నర్ సునీల్ నరైన్ ఐపీఎల్లో ఒకే మ్యాచులో రెండు రికార్డులు బ్రేక్ చేశాడు. శుక్రవారం (ఏప్రిల్ 11) చెన్నైతో జరిగిన మ్యాచులో 13 పరుగులు మాత్రమే ఇచ్చి 3 వికెట్లు పడగొట్టిన నరైన్.. స్టార్ స్పిన్నర్స్ అశ్విన్, రషీధ్ ఖాన్ల రికార్డులు బద్దలు కొట్టాడు. ఈ మ్యాచులో తన నాలుగు ఓవర్ల స్పెల్‌లో స్పిన్ మ్యాస్ట్రో ఒక్క బౌండరీ (ఫోర్ లేదా సిక్స్) కూడా ఇవ్వలేదు. ఐపీఎల్లో తన నాలుగు ఓవర్ల కోటాలో ఒక్క బౌండరీ కూడా ఇవ్వకపోవడం నరైన్కు ఇది 16వ సారి. గతంలో ఈ రికార్డ్ అశ్విన్, నరైన్ (15 సార్లు) పేరిట ఉండేది. చెన్నైతో జరిగిన మ్యాచులో ఈ రికార్డును నరైన్ బ్రేక్ చేశాడు. ఐపీఎల్లో 16 సార్లు ఒక్క బౌండరీ కూడా ఇవ్వని స్పిన్నర్ల జాబితాలో అగ్రస్థానంలోకి దూసుకెళ్లాడు.
ఈ మ్యాచులో అశ్విన్తో పాటు మరో స్టార్ స్పిన్నర్ రషీద్ ఖాన్కు సంబంధించిన ఓ రికార్డును కూడా నరైన్ బద్దలు కొట్టాడు. అదేంటంటే.. నరైన్ ఒక ఐపీఎల్ మ్యాచ్‌లో 15 కంటే తక్కువ పరుగులు ఇవ్వడం ఇది 13వ సారి. గతంలో ఈ రికార్డు రషీద్ ఖాన్, నరైన్ (12) పేరిట సంయుక్తంగా ఉండేది. కానీ చెన్నైపై అద్భుత ప్రదర్శన చేసిన నరైన్ కేవలం 13 పరుగులు మాత్రమే ఇచ్చి రషీద్ ఖాన్ను వెనక్కి నెట్టాడు. తద్వారా ఐపీఎల్ చరిత్రలో నాలుగు ఓవర్లలో 13 సార్లు 15 పరుగుల కంటే తక్కువ పరుగులు ఇచ్చిన తొలి బౌలర్గా రికార్డ్ సృష్టించాడు.
ఇక, మ్యాచ్ విషయానికొస్తే బంతితో అద్భుతంగా రాణించిన సునీల్ నరైన్.. బ్యాటింగ్లోనూ దుమ్మురేపాడు. ఓపెనర్గా బరిలోకి దిగి కేవలం 18 బంతుల్లో 44 పరుగులు చేశాడు. 104 పరుగుల స్వల్ప లక్ష్యంతో ఛేజింగ్కు దిగిన కేకేఆర్ నరైన్ దూకుడుతో కేవలం10.1 ఓవర్లలోనే విజయం సాధించింది. బ్యాటింగ్, బౌలింగ్ లో రాణించి జట్టు విజయంలో కీలక పాత్ర పోషించిన నరైన్ మ్యాన్ ఆఫ్ ది మ్యాచ్ అవార్డు గెల్చుకున్నాడు.
