వాషింగ్టన్: అంతర్జాతీయ అంతరిక్ష కేంద్రంలో చిక్కుకుపోయిన నాసా వ్యోమగాములు సునీతా విలియమ్స్, బారీ విల్మోర్ ఎట్టకేలకు తిరిగి భూమి పైకి వచ్చేందుకు ముహూర్తం ఖరారు అయ్యింది. తొమ్మిది నెలలుగా స్పేస్లో చిక్కుకుపోయిన ఈ ఇద్దరూ ఆస్ట్రోనాట్లను భూమి పైకి తీసుకొచ్చేందుకు నాసా ఏర్పాట్లు ముమ్మరం చేసింది. ఈ మేరకు 2025, మార్చి 16న వీరిద్దరూ తిరిగి భూమికి వస్తారని నాసా అధికారులు వెల్లడించారు. బిలియనీర్ ఎలన్ మస్క్కు చెందిన స్పేస్‌ఎక్స్ డ్రాగన్‌లో సునీతా విలియమ్స్, బారీ విల్మోర్లను భూమి పైకి తీసుకురానున్నట్లు నాసా స్పష్టం చేసింది.
10 రోజుల మిషన్లో భాగంగా 2024, జూన్ 5న సునీతా విలియమ్స్, బారీ విల్మోర్ అంతరిక్షంలోకి వెళ్లారు. అయితే.. వీరు వెళ్లిన బోయింగ్ స్టార్‌లైనర్‌ షిప్కు అంతరిక్షంలో సాంకేతిక సమస్య తలెత్తింది. దీంతో సునీతా విలియమ్స్, బారీ విల్మోర్ స్పేస్ నుంచి తిరిగి రాలేక అక్కడే చిక్కుకుపోయారు. దాదాపు తొమ్మది నెలలు ఈ ఇద్దరూ అంతర్జాతీయ అంతరిక్ష కేంద్రంలో ఉంటున్నారు.
వీరిని భూమి పైకి తీసుకొచ్చేందుకు నాసా ప్రయత్నాలు చేయగా అవేవి ఫలించలేదు. దీంతో ఈ ఆస్ట్రోనాట్ల జోడీని భూమి పైకి తీసుకువచ్చే మిషన్ వాయిదా పడుతూ వస్తోంది. సునీతా విలియమ్స్, బారీ విల్మోర్ను తిరిగి తీసుకురావాలని ప్రభుత్వం ఆదేశించడంతో నాసా దూకుడు పెంచింది. ఈ క్రమంలోనే 2025, మార్చి 16న ఇద్దరిని భూమి పైకి తీసుకొచ్చేందుకు ఏర్పాట్లు చేసింది.
