‘ఒకే ఒక లోకం నువ్వే...లోకంలోన అందం నువ్వే’..‘ఈ పాట వచ్చి చాలా నెలలైంది. కానీ, ఇప్పటికీ ఎక్కడో ఒక చోట కాలర్ట్యూన్గా, రింగ్టోన్గా వినిపిస్తూనే ఉంది. ఆటోల్లో, బస్సుల్లో ఈ పాటే ఎక్కువగా వినపడుతోంది. మ్యూజిక్ లవర్స్ని అంతలా ఇంప్రెస్ చేసిన ఈ పాట ‘శశి’ సినిమాలోది. ఈ పాటకి ట్యూన్స్ కట్టింది మన వరంగల్ అబ్బాయే.
పేరు అరుణ్ చిలువేరు. ఈ యంగ్ మ్యూజిక్ డైరెక్టర్ గిటారిస్ట్ కూడా. దాదాపు ఐదువందలకి పైగా సినిమాలకి గిటార్ వాయించాడు. ఎప్పుడూ తెర వెనక ఉండే ఈ మ్యుజీషియన్ మొదట్లో ఎ. ఆర్. రెహ్మాన్ని చూసి కీబోర్డు నేర్చుకున్నాడట. తన పదకొండేళ్లు మ్యూజిక్ జర్నీ గురించి ...
లైఫ్లో అనుకున్నవన్నీ వెంట వెంటనే జరిగిపోవు. కొన్నిసార్లు నెలలు..కాదు కాదు సంవత్సరాలు టైం పడుతుంది. దశాబ్దాలు కూడా వచ్చి పోవచ్చు. కానీ, ఆ చివరి నిమిషం వరకు ప్రయత్నించేవాళ్లే సక్సెస్ అవుతారు. ఆ కోవలోకే వస్తాడు అరుణ్ . తను అనుకున్న దానికోసం ఏకంగా పదకొండేళ్లు శ్రమపడ్డాడు ఈ యంగ్ మ్యూజిక్ డైరెక్టర్. ఇండస్ట్రీలో సస్టైన్ అవ్వడానికి వచ్చిన ప్రతి అవకాశాన్ని ఉపయోగించుకున్నాడు. అయినా సరే తన ప్రతిభకి తగ్గ గుర్తింపు రాలేదు అంటున్నాడు.
‘‘నేను పుట్టి, పెరిగిందంతా వరంగల్లోనే. మాది ఉమ్మడి కుటుంబం. ఉమ్మడి కుటుంబమంటే సిచ్యుయేషన్స్కి తగ్గట్టు పాటలు కంపల్సరీ. ఎప్పుడూ బ్యాక్గ్రౌండ్లో ఏదో ఒక పాట ప్లే అవుతూనే ఉండేది. అందరి నోట్లో ఏదో ఒక పాట ఉండేది. నేను కడుపులో ఉన్నప్పుడు అమ్మ గంటల తరబడి పాటలు వినేదట. అలా... తెలియకుండానే పాట పరిచయం అయింది నాకు. నేను చదువుకున్న స్కూల్లో ఎడ్యుకేషన్తో పాటు కల్చరల్ యాక్టివిటీస్కి ఇంపార్టెన్స్ ఇచ్చేవాళ్లు. అలా నా పాటలకి రెక్కలొచ్చినట్టు అయింది. బెంచ్లు, బల్లలపై డిఫరెంట్ ట్యూన్స్ కట్టేవాడ్ని. అవన్నీ విని టీచర్స్, ఇంట్లో వాళ్లు
మ్యూజిక్ డైరెక్టర్ అవ్వమనేవాళ్లు. ఆ మాటల్ని పట్టుకుని ఏడో క్లాస్లో వరంగల్లోని ‘పోతన మ్యూజిక్ కాలేజీ’కి వెళ్లా. కానీ, వాళ్లు నన్ను చేర్చుకోలేదు.
అయిష్టంగానే గిటార్
బెంచీలు, బల్లలపై డప్పులు వాయిస్తేనే ఇంతమంది పొగుడుతున్నారు. అదే సినిమాలకి ట్యూన్స్ కడితే! ఆ ఆలోచనే భలే అనిపించింది. దాంతో గ్రౌండ్ వర్క్ మొదలుపెట్టా. హిందూస్తానీ మ్యూజిక్ నేర్చుకోవాలనుకున్నా. కానీ ‘పోతన’ మ్యూజిక్ కాలేజీలో టెన్త్ క్లాస్ పూర్తయిన స్టూడెంట్స్కి మాత్రమే ఎంట్రీ. దాంతో చేసేదేంలేక గిటారు నేర్చుకోవాలనుకున్నా. గిటారు ఎంచుకోవడం వెనుక ఫ్లాష్ బ్యాక్ ఉంది. ఏ. ఆర్. రెహ్మాన్కి వీరాభిమానిని నేను. ఆయన కీ బోర్డు వాయించడం చూసి నేనూ నేర్చుకోవాలనుకున్నా. అందుకోసం కష్టపడి ప్రీతమ్ సర్ని కూడా వెతికి పట్టుకున్నా. కానీ, తీరా క్లాస్కి వెళ్లాక ఆయన గిటారిస్ట్ అని తెలిసింది. దాంతో చేసేదేంలేక కొంచెం అయిష్టంగానే గిటార్ నేర్చుకున్నా. కానీ, అదే నా మ్యూజిక్ కెరీర్కి పునాది అవుతుందని ఎప్పుడూ ఊహించలేదు.
ప్రైవేట్గా చదువుతూనే...
టెన్త్ వరకు గిటార్ నేర్చుకుంటూనే స్కూల్కి వెళ్లా. ఆ తర్వాత పోతన కాలేజీలో హిందూస్తానీ మ్యూజిక్లో చేరా. ఒక పక్క గిటార్, క్లాసికల్ మ్యూజిక్ మరో పక్క చదువు. ఏది ఇంపార్టెంట్? అని నన్ను నేను క్వశ్చన్ చేసుకుంటే మ్యూజిక్ వైపు వెళ్లాలనిపించింది. దాంతో ఇంటర్, డిగ్రీ ప్రైవేటుగా చదువుకుంటూ మ్యూజిక్లోనే రేయింబవళ్లు గడిపా. సొంతంగా కీ బోర్డు కూడా నేర్చుకున్నా. నా ఇష్టానికి ఏరోజూ మా ఇంట్లోవాళ్లు అడ్డు చెప్పలేదు. నా విషయంలో నా కన్నా ఎక్కువ కాన్ఫిడెంట్గా ఉన్నారు. అలా అందరి ఎంకరేజ్మెంట్తో హిందూస్తానీ సంగీతంలో సర్టిఫికెట్ కోర్సు పూర్తిచేశా. వరంగల్ ఎన్ఐటీలో గిటార్,కీబోర్డు పాఠాలు కూడా చెప్పా. డిగ్రీ ఎగ్జామ్స్ అయ్యాక సినిమా కలతో సిటీకొచ్చా.
గంటలో ఆయనముందున్నా
మా ఇద్దరు అన్నయ్యలు తప్పించి సిటీలో తెలిసినవాళ్లెవరూ లేరు. ఇండస్ట్రీలోనూ పరిచయాలు లేవు. దాంతో ఎక్కడ్నించి మొదలుపెట్టాలో అర్థం కాలేదు. ఆ కన్ఫ్యూజన్లోనే మూడు నెలలు గడిచిపోయాయి. ఏదైనా ఇనుస్ట్రుమెంట్ నేర్చుకుంటే మ్యూజిక్ కెరీర్ హెల్ప్ అవుతుంది అనిపించింది. పియానో క్లాస్లో చేరా. ఆ టైంలోనే ‘ఆర్కుట్’ సోషల్ మీడియా ప్లాట్ఫాంలో సింగర్ నిహాల్ ప్రొఫైల్ కనిపించింది. ‘నేను గిటార్ ప్లేయర్’ని అని మెసేజ్ చేస్తే.. ‘మేము కొత్తగా బ్యాండ్ స్టార్ట్ చేస్తున్నాం. ఒకసారి కలవమ’ని రిప్లై ఇచ్చారు. ఆ మెసేజ్ వచ్చిన గంటకే ఆయన ముందున్నా. వాళ్ల బ్యాండ్లో గిటారిస్ట్గా చేరా. నిహాల్ సినిమా ప్రాజెక్ట్స్కి అసిస్టెంట్ ప్రోగ్రామర్గా, గిటారిస్ట్గా కూడా పనిచేయడం మొదలుపెట్టా. ఆ ప్రాసెస్లోనే ఎమ్. ఎమ్. శ్రీలేఖ నా వర్క్ చూసి అసిస్టెంట్ ప్రోగ్రామర్గా అవకాశం ఇచ్చారు. ‘సూపర్ సింగర్–5’కి కూడా గిటారిస్ట్గా చేశా. ఆ తర్వాత మ్యూజిక్ ఇన్ఛార్జ్ల దృష్టిలో పడి వరుసగా సినిమాలకి గిటార్ వాయిస్తున్నా.
నా కల పక్కదారి పడుతోందని
ఇండస్ట్రీలో గిటార్ వాయించేవాళ్లు పెద్దగా లేరు. దాంతో తక్కువ టైంలోనే మంచి పేరొచ్చింది నాకు. నెలకి ఐదారు సినిమాలకి కూడా పనిచేశా. కీరవాణి, మణిశర్మ. అనురాగ్ కశ్యప్, తమన్ ఇలా దాదాపుగా మ్యూజిక్ డైరెక్టర్స్ అందరి దగ్గర వర్క్ చేశా. ‘బాహుబలి’, ‘మహానుభావుడు’, ‘నిన్నుకోరి’.. మొత్తం కలుపుకుని ఐదువందలకి పైగా సినిమాలకి గిటార్ వాయించా.‘కలర్ ఫొటో’,‘గుణ 369’,‘ఎస్ ఆర్ కళ్యాణ మండపం’ లాంటి చాలా సినిమాలకి మ్యూజిక్ ప్రోగ్రామర్గా చేశా. ఫైనాన్షియల్లీ సెటిల్ అయ్యా. ఇండస్ట్రీలో కాంప్లిమెంట్స్కి కొదవే లేదు. కానీ, సంతృప్తి లేదు. నేను ఇండస్ట్రీకి వచ్చింది మ్యూజిక్ డైరెక్టర్ అవ్వాలని. నా కల పక్కదారి పడుతోందని అర్థమైంది. అందుకని మళ్లీ ఇటుగా అడుగులేశా.
జనాల్లోకి వెళ్లలేకపోయా
పాట హిట్ అయితే మ్యూజిక్ డైరెక్టర్, సింగర్ల గురించే ఎక్కువగా మాట్లాడుకుంటారు. కానీ, ఆ పాటకి గిటార్ ఎవరు వాయించారన్న ప్రస్తావనే రాదు. ఈ విషయంలో చాలా సార్లు బాధపడ్డా. ఇండస్ట్రీలో గుర్తింపు వస్తున్నా..జనాల్లోకి వెళ్లలేకపోతున్నానే అనిపించింది. అయితే ఇది నా ఒక్కడి సమస్యే కాదు..నాలాంటి చాలామంది టెక్నీషియన్ల పరిస్థితి ఇదే. అందుకే మ్యూజిక్ డైరెక్టర్గా లేదా ఇండిపెండెంట్ ఆర్టిస్ట్గా పరిచయం అవ్వాలనుకున్నా. ఆ ప్రయత్నంలో కొంత సక్సెస్ కూడా అయ్యా. ‘శశి’ సినిమా ఆల్బమ్కి మంచి రీచ్ వచ్చింది. కానీ, ఆ తర్వాత కూడా మ్యూజిక్ డైరెక్టర్గా పెద్దగా
అవకాశాలైతే రాలేదు. నన్ను నేను నిరూపించుకున్నప్పటికీ గుర్తింపు రాలేదు. దానికి లాక్డౌన్ కూడా ఒక కారణం అనిపిస్తోంది. దానికి తోడు సినిమా పెద్దగా ఆడకపోవడం కూడా మైనస్ అయింది.
కెరీర్ మొదలైంది ఇప్పుడే..
చాలామంది ‘ఒకే ఒక లోకం’ పాటని తెలుగు వాళ్లతో ఎందుకు పాడించలేదని అడుగుతున్నారు. కానీ, సింగర్స్ సెలక్షన్ మ్యూజిక్ డైరెక్టర్ ఒక్కడి చేతిలో ఉండదు. డైరెక్టర్, ప్రొడ్యూసర్ ఛాయిస్ కూడా ఉంటుంది. అన్నింటికన్నా ముఖ్యంగా ఏ సింగర్ పాడితే సినిమాకి ప్లస్ అవుతుందని ఆలోచిస్తారు. అయితే ఇదే సినిమాలో మిగతా పాటల్ని తెలుగువాళ్లే పాడారు. కొత్త సింగర్స్తోనూ పాడించా. ప్రస్తుతం చేతిలో ‘మిస్టర్ వర్క్ ఫ్రమ్ హోం’ అనే సినిమాతో పాటు మరో సినిమాకు పని చేస్తున్నా. మొదటి ఆల్బమ్ హిట్ అవడంతో ఈసారి నానుంచి ఆ స్థాయి మ్యూజిక్నే ఎక్స్పెక్ట్ చేస్తారు. అందుకని కొంచెం స్పెషల్ కేర్తీసుకుంటున్నా. నా కెరీర్ ఇప్పుడే మొదలైందని నా అభిప్రాయం.
అందరూ ‘నో’ అన్నారు
నాలుగ్గోడల మధ్య ఉండటం అస్సలు నచ్చదు నాకు. అందుకే ఎంత టైట్ షెడ్యూల్ ఉన్నా రోజులో కాసేపయినా బయటికెళ్తా. కార్లు అంటే చాలా ఇష్టం. స్వీట్స్ బాగా తింటా. మనసుకి నచ్చిన అమ్మాయిలందరికీ ప్రపోజ్ చేశా. కానీ ఒక్కరు కూడా తిరిగి చూడలేదు (నవ్వుతూ). దాంతో అరేంజ్డ్ మ్యారేజ్ చేసుకుందామని ఫిక్స్ అయ్యా. నేను ‘శశి’ కన్నా ముందు ‘ఐతే 2.0’ సినిమాకి మ్యూజిక్ కంపోజ్ చేశా. యాక్టింగ్ ఇంట్రెస్ట్ ఉంది. ఫ్యూచర్లో మంచి అవకాశాలు వస్తే తప్పకుండా నటిస్తా.
మ్యూజిక్ మారుతోంది
ఆడియెన్స్ని బట్టి మ్యూజిక్ ఎప్పుడూ మారదు. వచ్చే మ్యూజిక్ని బట్టే ఆడియెన్స్ అభిరుచి మారుతుంటుంది. అయితే ఇప్పుడు మ్యూజిక్ ఫాస్ట్ ఫుడ్లా అయిపోయింది. ఇంతకుముందు ఒక హిట్ సాంగ్ రెండుమూడు సంవత్సరాలు వినపడేది. కానీ, ఇప్పుడు అలా వచ్చి ఇలా వెళ్లిపోతున్నాయి. మరీ సూపర్ హిట్ అయితే ఇంకొన్ని రోజులు నిలుస్తున్నాయి. ::: ఆవుల యమున
