రోడ్లెక్కిన సపోర్టర్స్
ఇటు ట్రంప్ వర్గం.. అటు బైడెన్ వర్గం పోటా పోటీ ఆందోళనలు
ఆరిజోనా, న్యూయార్క్ సహా పలుచోట్ల ఉద్రిక్తత
ఇండ్లపైకి రాళ్లు విసిరి.. వాహనాలకు నిప్పు పెట్టిన నిరసనకారులు
వాషింగ్టన్: అమెరికా అధ్యక్ష ఎన్నికల రిజల్ట్స్ అగ్గిరాజేస్తున్నాయి. ఇటు డొనాల్డ్ ట్రంప్ వర్గం.. అటు జో బైడెన్ వర్గం పోటా పోటీ నిరసనలతో మెయిన్ సిటీలు అట్టుడుకుతున్నాయి. పోలింగ్లో, కౌంటింగ్లో డెమొక్రాట్స్ అక్రమాలకు పాల్పడ్డారని, ప్రతి ఓటునూ కౌంట్ చేయాల్సిందేనంటూ ఆరిజోనాలో రిపబ్లికన్ పార్టీ సపోర్టర్స్ ఆందోళనలకు దిగారు. ట్రంప్ తీరును నిరసిస్తూ న్యూయార్క్, మిషిగాన్ వంటి చోట్ల బైడెన్ సపోర్టర్స్ ర్యాలీలు చేపట్టారు. కొన్ని చోట్ల ఆందోళనలు తీవ్ర ఉద్రిక్తతకు దారితీశాయి.
ఆయుధాలతో కౌంటింగ్ సెంటర్కు..
లక్షలాది ఓట్లను లెక్కించకుండానే బైడెన్కు ఆరిజోనాలోని 11 ఎలక్టోరల్ ఓట్లు ఎలా వేస్తారంటూ బుధవారం రాత్రి వందల మంది ట్రంప్ సపోర్టర్స్ ఆయుధాలతో మేరీకోపా కౌంటింగ్ సెంటర్కు చేరుకున్నారు. ఆరిజోనాలో 50.5 శాతం ఓట్లతో ముందు వరుసలో బైడెన్ ఉండగా.. ట్రంప్ 48.1 శాతం ఓట్లు సాధించారు. ముందు వరుసలో ఉన్న బైడెన్ గెలిచినట్లు వార్తలు వచ్చాయి. బైడెన్ 60 వేల ఓట్లతో ఫస్ట్ ప్లేస్లో ఉండగా.. ఇంకా లెక్కించాల్సిన 2.5 లక్షల ఓట్లతో ఫలితం ట్రంప్కు అనుకూలంగా రావొచ్చని, అన్ని బ్యాలెట్స్ను లెక్కించాల్సిందేనంటూ రిపబ్లికన్స్ ఆందోళనలకు దిగారు. డెమొక్రాట్స్ కుట్రపూరితంగా వ్యవహరిస్తున్నారని వారు మండిపడ్డారు. మరోవైపు మిచిగాన్లో ఓట్ల లెక్కింపును ఆపాలంటూ మొదటి నుంచి ట్రంప్ వర్గం పట్టుబడుతున్నది. ఇక్కడ 99 శాతం ఓట్ల లెక్కింపు పూర్తి కావడంతో లీడ్లో ఉన్న బైడెన్ను గెలిచినట్లు ఆఫీసర్లు ప్రకటించారు. బైడెన్కు ట్రంప్కు మధ్య మిషిగాన్లో 2.7 శాతం ఓట్ల తేడా మాత్రమే ఉంది. కౌంటింగ్లో అక్రమాలు జరిగాయని, రీ కౌంటింగ్ చేయాల్సిందేనని ట్రంప్ వర్గం డిమాండ్ చేసింది. విస్కాన్సిన్లోనూ ఇదే తరహాలో రిపబ్లికన్స్ రోడ్లమీదికి వచ్చి ట్రంప్కు అనుకూలంగా.. బైడెన్కు వ్యతిరేకంగా పెద్ద ఎత్తున నినాదాలు చేశారు. ప్లకార్డులతో ప్రదర్శనలు చేపట్టారు.
ర్యాలీలతో టెన్షన్.. టెన్షన్
పూర్తి ఫలితాలు తేలకముందే తానే గెలిచినట్లు ట్రంప్ ప్రకటించుకోవడాన్ని, ఎన్నికల్లో అక్రమాలు జరిగాయంటూ న్యాయ పోరాటం చేయడాన్ని నిరసిస్తూ బైడెన్ సపోర్టర్స్ పలు స్టేట్స్లో పెద్ద ఎత్తున నిరసనలకు దిగారు. ట్రంప్ తప్పుడు ప్రచారం చేస్తున్నారని మండిపడ్డారు. న్యూయార్క్ సిటీ, ఫిలాడల్ఫియా, లాస్ ఏంజెల్స్, మిషిగన్, వాషింగ్టన్, డెట్రాయిట్, సియాటెల్ లో ర్యాలీలు నిర్వహించారు. కొందరు ఇండ్లపైకి రాళ్లు విసిరారు. రోడ్ల మీద వాహనాలను తగులబెట్టారు. ఆధిక్యంలో బైడెన్ ఉన్నారని, ఆయనే అమెరికా అధ్యక్షుడని నినాదాలు చేశారు. తమకు అనుకూలంగా రాని ప్రాంతాల్లో రీ కౌంటింగ్ చేపట్టాలని ట్రంప్ వర్గం పట్టుబడుతోందని మండిపడ్డారు. భారీ సంఖ్యలో పోలీసులు మోహరించి ఆందోళనకారులను అదుపులోకి తీసుకున్నారు.
పోలీసుపై ఉమ్మేసిన ఇండియన్ ఆరిజిన్ యువతి
న్యూయార్క్ సిటీలో ట్రంప్కు వ్యతిరేకంగా డెమొక్రాట్స్ సపోర్టర్స్ చేపట్టిన నిరసనల్లో పాల్గొన్న ఇండియన్ ఆరిజిన్ యువతి ఒకరు.. పోలీసులను బండ బూతులు తిట్టింది. ఫాసిస్ట్స్ అంటూ విరుచుకుపడింది. అంతటితో ఆగకుండా ఓ పోలీస్ ముఖంపై ఉమ్మేసింది. అప్పటివరకు ఓపికగా ఉన్న పోలీసు.. యువతి ఉమ్మివేయగానే అరెస్టు చేశారు. ఆ యువతిని పెన్సిల్వేనియాకు చెందిన 24 ఏండ్ల దేవినా సింగ్గా గుర్తించారు. విధ్వంసానికి పాల్పడిన మరో 50 మందిని కూడా పోలీసులు అదుపులోకి తీసుకున్నారు.
For More News..
