ఈషా ఫౌండేషన్ వివాదంపై పిటిషన్ కొట్టివేసిన సుప్రీంకోర్టు

•  ఇష్టపూర్వకంగానే ఉంటున్నట్లు కోర్టుకు చెప్పిన యువతులు

కొయంబత్తూరు : తన ఇద్దరు బిడ్డలను ఆధ్యాత్మిక గురువు జగ్గీ వాసుదేవ్​కు చెందిన ఈషా యోగా సెంటర్ నిర్వాహకులు బ్రెయిన్ వాష్ చేసి బందీగా ఉంచారని పేర్కొంటూ ఓ తండ్రి దాఖలు చేసిన హెబియస్ కార్పస్ పిటిషన్​ను శుక్రవారం సుప్రీం కోర్టు కొట్టేసింది. యోగా నేర్చుకునేందుకు వెళ్లిన తన కూతుళ్లు గీత, లత అక్కడే ఉండిపోయారని రిటైర్డ్ ప్రొఫెసర్‌‌ కామరాజ్‌‌ తన హెబియస్ కార్పస్ పిటిషన్​లో పేర్కొన్నారు. ఇద్దరినీ గదిలో బంధించి హింసిస్తున్నట్లు తెలిసిందని తెలిపారు. 

దీనిపై విచారించిన సీజేఐ డీవై చంద్రచూడ్ నేతృత్వంలోని జస్టిస్ జేబీ పార్దివాలా, జస్టిస్ మనోజ్ మిశ్రాతో కూడిన ధర్మాసనం కీలక వ్యాఖ్యలు చేసింది. ‘‘గీత, లత ఇష్టపూర్వకంగానే ఈషా యోగా సెంటర్​లో ఉంటున్నారు. వాళ్లిద్దరూ మేజర్లు. నచ్చిన చోట ఉండే హక్కు వాళ్లకు ఉంటది. సేఫ్​గానే ఉన్నామని చెప్పారు. ఎలాంటి ఇబ్బందుల్లేవన్నరు. గీత, లత ఎక్కడున్నారో కూడా ఆచూకీ తెలిసింది. అందువల్ల హెబియస్ కార్పస్ పిటిషన్​ను కొట్టేస్తున్నం. ఇక, ఈ కేసులో మద్రాస్ హైకోర్టు నుంచి ఎలాంటి ఆదేశాలు ఇవ్వాల్సిన అవసరం లేదు’’అని సీజేఐ డీవై చంద్రచూడ్ నేతృత్వంలోని బెంచ్ స్పష్టం చేసింది.

అసలు కేసు ఏంటి?

కొయంబత్తూరుకు చెందిన గీత, లత యోగా నేర్చుకునేందుకు ఈషా యోగా సెంటర్​కు వెళ్లారు. తర్వాత వాళ్లు అక్కడే ఉండిపోయారు. తల్లిదండ్రులు ఎంత కోరినా.. ఇంటికి వచ్చేందుకు నిరాకరించారు. దీంతో వాళ్ల తండ్రి రిటైర్డ్ ప్రొఫెసర్‌‌ కామరాజ్‌‌ మద్రాస్ హైకోర్టులో హెబియస్ కార్పస్ పిటిషన్ దాఖలు చేశారు. ఈషా యోగా సెంటర్​పై సంచలన ఆరోపణలు చేశారు. తన ఇద్దరు కూతుళ్లను బ్రెయిన్ వాష్ చేసి తమ నుంచి దూరం చేశారంటూ పేర్కొన్నారు.