- భద్రాది కొత్తగూడెం ఫారెస్ట్ ఆఫీసర్ హత్య కేసులో రాష్ట్ర ప్రభుత్వానికి సుప్రీంకోర్టు ఆదేశం
- విచారణ వచ్చే నెల 3కు వాయిదా
న్యూఢిల్లీ, వెలుగు: రాష్ట్రంలోని భద్రాద్రి కొత్తగూడెం జిల్లాలో సంచలనం సృష్టించిన ఫారెస్ట్ రేంజ్ ఆఫీసర్ (ఎఫ్ఆర్ఓ) సీహెచ్ శ్రీనివాస రావు హత్య కేసులో నిందితులు దాఖలు చేసిన పిటిషన్పై రెండు వారాల్లో కౌంటర్ దాఖలు చేయాలని రాష్ట్ర సర్కారును సుప్రీంకోర్టు ఆదేశించింది. నిరుడు నవంబరులో పోకలగూడెం ప్లాంటేషన్లో పశువులను మేపుతున్నారన్న సమాచారంతో అక్కడికెళ్లిన ఎఫ్ఆర్ఓ శ్రీనివాస రావును గుత్తికోయకు చెందిన మడకం తులా, పొడియం నంగాలు వేటకొడవళ్లతో దారుణంగా హత్య చేశారు. ఈ కేసులో నిందితులకు బెయిల్ మంజూరు చేయడానికి రాష్ట్ర హైకోర్టు నిరాకరించింది.
దీంతో హైకోర్టు ఆదేశాలను సవాలు చేస్తూ బెయిలు కోసం నిందితులు సుప్రీంకోర్టును ఆశ్రయించారు. ఈ పిటిషన్ను ఈ ఏడాది మే 29న విచారించిన సుప్రీం బెంచ్.. ఈ హత్య కేసులో తెలంగాణ సర్కారు తమ వైఖరి తెలపాలని నోటీసులు జారీ చేసింది. కాగా, జస్టిస్ అభయ్ ఎస్ ఓకా, జస్టిస్ సంజయ్ కరోల్తో కూడిన బెంచ్ ముందు ఈ పిటిషన్ గురువారం మరోసారి విచారణకు వచ్చింది. ఈ సందర్భంగా రాష్ట్ర ప్రభుత్వం తరపు న్యాయవాది వాదిస్తూ కౌంటర్ దాఖలుకు తమకు నాలుగు వారాల సమయం కావాలని బెంచ్కు విజ్ఞప్తి చేశారు. అయితే, రెండు వారాల్లోనే కౌంటర్ దాఖలు చేయాలని బెంచ్ ఆదేశించింది. కేసు విచారణను ఆగస్టు 3వ తేదీకి వాయిదా వేసింది.
