న్యూఢిల్లీ, వెలుగు: గవర్నర్ కోటా ఎమ్మెల్సీల నియామకంపై తుదివాదనలు ఫిబ్రవరి 12న వింటామని సుప్రీంకోర్టు తేల్చిచెప్పింది. ఆ రోజుకు విచారణను వాయిదా వేసింది. గత కేసీఆర్‌ ప్రభుత్వ హయాంలో గవర్నర్ కోటా ఎమ్మెల్సీలుగా దాసోజు శ్రవణ్‌‌‌‌కుమార్‌, కుర్రా సత్యనారాయణ పేర్లను ప్రతిపాదిస్తూ నాటి రాష్ట్ర మంత్రివర్గం గవర్నర్‌‌‌‌కు సిఫారసు చేసింది. అప్పటి గవర్నర్ తమిళిసై ఆ సిఫారసులను తిరస్కరిస్తూ.. గతేడాది సెప్టెంబర్‌ 19న ఉత్తర్వులు జారీచేశారు. ఈ ఉత్తర్వులను దాసోజు శ్రవణ్, కుర్రా సత్యనారాయణ వేర్వేరుగా హైకోర్టులో సవాల్‌ చేశారు. ఆ తర్వాత తెలంగాణలో ప్రభుత్వం మారింది.
సీఎం రేవంత్‌‌‌‌రెడ్డి మంత్రివర్గం జనవరి 13న కోదండరాం, ఆమీర్‌ అలీఖాన్‌‌‌‌ను గవర్నర్ కోటాలో ఎమ్మెల్సీలుగా నియమిస్తూ సిఫారసు చేసింది. ఈ సిఫారసుకు గవర్నర్ ఆమోదించడంతో జనవరి 27న గెజిట్‌ నోటిఫికేషన్‌ జారీ అయింది. దీనిపై మరోసారి దాసోజు శ్రవణ్, కుర్రా సత్యనారాయణ హైకోర్టును ఆశ్రయించారు.
అనంతరం హైకోర్టు తీర్పుకు తగ్గట్టు ఎమ్మెల్సీ అభ్యర్థులగా కోదండరాం, అలీఖాన్ పేర్లను రాష్ట్ర మంత్రివర్గం మరోసారి సిఫారసు చేసింది. దీంతో ఆగస్టు 4న తమకు న్యాయం చేయాలని కోరుతూ దాసోజు శ్రవణ్ కుమార్, కుర్రా సత్యనారాయణలు సుప్రీంకోర్టును ఆశ్రయించారు. ఆ పిటిషన్ పై సోమవారం జస్టిస్ విక్రమ్ నాథ్, జస్టిస్ ప్రసన్న బి. వరాలేతో కూడిన బెంచ్ విచారించింది.
