- తెలంగాణ, ఏపీ పిటిషన్లను వేర్వేరుగా విచారించనున్న కోర్టు
- ఈ నెల 6 నుంచి 8 వరకు కృష్ణా వాటాపై కేడబ్ల్యూటీ2లో వాదనలు
హైదరాబాద్, వెలుగు: కృష్ణా ప్రాజెక్టుల పరిధిపై సుప్రీంకోర్టు విచారణ జరపనుంది. ఈ నెల 4న తెలంగాణ, ఏపీ పిటిషన్లను వేర్వేరు బెంచ్లు విచారించనున్నాయి. తెలంగాణ దాఖలు చేసిన పిటిషన్పై జస్టిస్ బీఆర్ గవాయ్, జస్టిస్ విశ్వనాథన్ ల ధర్మాసనం విచారణ జరపనుండగా.. ఏపీ వేసిన పిటిషన్ను జస్టిస్ అభయ్ ఎస్ ఓకా, జస్టిస్ అగస్గీన్ జార్జ్ మాసిల ధర్మాసనం విచారణ చేపట్టనుంది.
కృష్ణా బేసిన్పై ఉన్న నాగార్జునసాగర్, శ్రీశైలం ప్రాజెక్టులు ప్రస్తుతం కేఆర్ఎంబీ (కృష్ణా రివర్ మేనేజ్మెంట్ బోర్డు) అధీనంలో ఉన్న సంగతి తెలిసిందే. కేఆర్ఎంబీకి ప్రాజెక్టులను అప్పగిస్తూ 2021లో కేంద్రం ఇచ్చిన గెజిట్ను రద్దు చేయాలంటూ సుప్రీంకోర్టులో రాష్ట్ర సర్కారు పిటిషన్ వేసింది. అందుకు భిన్నంగా బోర్డుకు ప్రాజెక్టులను అప్పగించేందుకు ఏపీ సిద్ధపడింది.
ఈ కేసు గత నెల 18నే కోర్టులో విచారణకు వచ్చినప్పటికీ.. బెంచ్లో తెలుగు వ్యక్తి ఉండడంతో మరో బెంచ్కు బదిలీ చేయాలని సూచించారు. తాజాగా రెండు రాష్ట్రాల పిటిషన్లను వేర్వేరు బెంచ్లకు బదిలీ చేశారు. కాగా, కృష్ణా జలాల వాటాపై ఈ నెల 6 నుంచి కృష్ణా వాటర్ డిస్ప్యూట్స్ ట్రిబ్యునల్ 2 (బ్రజేశ్ కుమార్ ట్రిబ్యునల్) విచారణ చేపట్టనుంది. కృష్ణా జలాల్లో 555 టీఎంసీలకు మన రాష్ట్రం పట్టుబడుతున్నది. తెలంగాణకు అన్ని కేటాయింపుల్లేవని వాదిస్తున్నది. దీనికి సంబంధించి రెండు రాష్ట్రాలూ ఇప్పటికే ట్రిబ్యునల్లో స్టేట్మెంట్ ఆఫ్ కేస్, అఫిడవిట్లు, అదనపు డాక్యుమెంట్లను సమర్పించాయి. ఈ నెల 8 వరకు మూడు రోజుల పాటు ట్రిబ్యునల్ విచారణ కొనసాగనుంది.
