- నేర వ్యవస్థలోనే ఇలాంటి కేసును చూడలేదన్న బెంచ్
న్యూఢిల్లీ: ఇరవై ఎనిమిద ఏండ్ల కింది జరిగిన జంట హత్యల కేసులో రాష్ట్రీయ జనతాదళ్(ఆర్జేడీ) నేత, మాజీ ఎంపీ ప్రభునాథ్ సింగ్‌కు సుప్రీంకోర్టు శుక్రవారం జీవిత ఖైదు విధించింది. 1995లో తనకు వ్యతిరేకంగా ఓటు వేసిన ఇద్దరిని ప్రభునాథ్ సింగ్ కాల్చి చంపేశాడు. ఈ కేసును విచారించిన ముగ్గురు న్యాయమూర్తుల బెంచ్.. కింది కోర్టు ఇచ్చిన తీర్పులను కొట్టివేసింది. ఐపీసీ 302, 307 సెక్షన్ల కింద ప్రభునాథ్ను దోషిగా నిర్ధారించింది. శిక్షను అమలు చేయాలంటూ శుక్రవారం తుది తీర్పునిచ్చింది. మృతుల కుటుంబాలకు రూ.10 లక్షల చొప్పున ఎక్స్గ్రేషియా అందించాలని బీహార్ సర్కారును ఆదేశించింది. నేర వ్యవస్థలోనే ఇలాంటి కేసు ఎన్నడూ చూడలేదని కోర్టు పేర్కొంది.
ఓటు వేయలేదని ఇద్దరిని చంపిండు
ప్రభునాథ్ సింగ్ 1985 నుంచి 1995 వరకు రెండుసార్లు మస్రఖ్ అసెంబ్లీ సెగ్మెంట్ ఎమ్మెల్యేగా, 1998 నుంచి 2009 వరకు మూడుసార్లు మహారాజ్‌గంజ్ ఎంపీగా పనిచేశారు. ఆపై 2013లో జరిగిన ఉప ఎన్నికలోనూ గెలిచి 2014 వరకు ఎంపీగా కొనసాగారు. 1995లో బీహార్ అసెంబ్లీ ఎన్నికలు జరిగాయి. సరన్ జిల్లా చప్రా నుంచి బీజేపీ తరఫున బరిలోకి దిగిన ప్రభునాథ్.. తనకు వ్యతిరేకంగా ఓటు వేశారని ఇద్దరిని కాల్చి చంపేశాడు. ఈ కేసులో 2008 డిసెంబర్‌లో ట్రయల్ కోర్టు, 2012లో పాట్నా హైకోర్టు ప్రభునాథ్ను నిర్దోషిగా తేల్చాయి. ఆ తీర్పును సవాల్ చేస్తూ మృతుల కుటుంబ సభ్యులు సుప్రీం కోర్టుకు వెళ్లగా ప్రభునాథ్ దోషి అని తీర్పు వచ్చింది.
