బలమైన కారణంతోనే ఇంటికి తిరిగొచ్చా
మళ్లీ యూఏఈకి వెళ్లొచ్చు
నోరు విప్పిన సీఎస్కే వైస్‌ కెప్టెన్‌ రైనా
న్యూఢిల్లీ: చెన్నై సూపర్కింగ్స్(సీఎస్కే) బ్యాట్స్మన్ సురేశ్ రైనా ఎట్టకేలకు మౌనం వీడాడు. బలమైన కారణాలు ఉండటంతోనే తాను లీగ్ నుంచి తప్పుకున్నానని చెప్పాడు. ‘ఈ నిర్ణయం నా వ్యక్తిగతం. నా ఫ్యామిలీ కోసమే తిరిగొచ్చా. నేను దగ్గరుండి చూసుకోవాల్సిన పనులు చాలా ఉన్నాయి. సీఎస్కే కూడా నా ఫ్యామిలీయే. మహీ బాయ్ నాకు చాలా ముఖ్యమైన వ్యక్తి. నేను తీసుకున్న నిర్ణయం కఠినమైనదే.. కానీ తప్పలేదు. నాకు, సీఎస్కేకు మధ్య ఎలాంటి వివాదం లేదు. చిన్నచిన్న విషయాలకు రూ.12.5 కోట్లు వదిలేసి బయటకు రాలేం కదా. బలమైన రీజన్ ఉంది కాబట్టే అలాంటి డెసిషన్ తీసుకున్నా. నేను ఇంటర్నేషనల్‌ క్రికెట్కు గుడ్బై చెప్పా. ఇంకా యంగ్గానే ఉన్నా. మరో నాలుగైదేళ్లు సీఎస్కేకు ఆడతా’ అని రైనా స్పష్టం చేశాడు. అన్నీ అనుకూలిస్తే మళ్లీ యూఏఈకి తిరిగివెళ్లి టీమ్తో కలిసినా ఆశ్చర్యం లేదన్నాడు.
ఫ్యామిలీయే ముఖ్యం..
బయోసెక్యూర్ ఎన్విరాన్మెంట్ తనకు నచ్చలేదని వచ్చిన కథనాలను రైనా తోసిపుచ్చాడు. ఐపీఎల్ కోసం బీసీసీఐ, ఫ్రాంచైజీలు చాలా కష్టపడుతున్నాయన్నాడు. అయితే తనకు ఫ్యామిలీ చాలా ముఖ్యమని చెప్పాడు. ‘ఈ కష్టకాలంలో నా ఫ్యామిలీతో ఉండాలని అనుకున్నా. నా పిల్లలను చూడక 20 రోజులైంది. తిరిగి వచ్చినా నేను క్వారంటైన్లోనే ఉన్నా. పఠాన్కోట్లో మా ఆంటీ వాళ్ల ఫ్యామిలీపై జరిగిన దాడి నన్ను మానసికంగా దెబ్బతీసింది. అది తట్టుకోలేకపోయా. నా కుటుంబాన్ని కాపాడుకోవాల్సిన బాధ్యత నాపై ఉంది’ అని రైనా చెప్పుకొచ్చాడు.
శ్రీని.. తండ్రి లాంటివాడు..
సీఎస్కే ఓనర్ శ్రీనివాసన్.. తనకు తండ్రిలాంటి వాడని రైనా అన్నాడు. ‘శ్రీనివాసన్.. నా హృదయానికి చాలా దగ్గరి వ్యక్తి. నన్ను కొడుకులా చూసుకుంటాడు. ఆయన మాటలను మరో కోణంలోనే అర్థం చేసుకున్నారని నేనూ అనుకుంటున్నా. తండ్రి తన కొడుకును మందలించినట్లు నన్ను అని ఉండొచ్చు. మొదట మాట్లాడినప్పుడు ఆయనకు విషయం తెలియదు. ఆ తర్వాత మేమిద్దం చర్చించుకున్నాం. ఈ వివాదానికి ముగింపు పలుకుతున్నాం’ అని రైనా స్పష్టం చేశాడు.
For More News..
