- కొత్త సమస్యలు రాకుండా భూమాత పోర్టల్ రికార్డుల డిజిటలైజేషన్
- కొత్త రెవెన్యూ చట్టంలో ప్రధాన అంశాలివే..
- నెలాఖరులోగా అసెంబ్లీ సమావేశాలు పెట్టకపోతే ఆర్డినెన్స్ తేవాలని సర్కారు నిర్ణయం
హైదరాబాద్, వెలుగు: కొత్త ఆర్ఓఆర్–2024 చట్టాన్ని నెలఖారులోగా తీసుకొచ్చేందుకు రాష్ట్ర ప్రభుత్వం ప్రయత్నిస్తోంది. ఇప్పటికే ఆర్ఓఆర్ ముసాయిదాపై అభిప్రాయ సేకరణ పూర్తవగా.. కొన్ని మార్పులు, చేర్పులు చేయిస్తున్నది. నెలఖారులోగా ప్రత్యేక అసెంబ్లీ సమావేశాలు నిర్వహించినట్లయితే.. సభలో బిల్లు పెట్టి చర్చ అనంతరం చట్టంగా తీసుకురానున్నారు. ఒకవేళ అసెంబ్లీ సమావేశాలు జరగనట్లయితే, కేబినేట్ సమావేశంలో ఆమోదం తెలిపి.. ఆర్డినెన్స్ తేనున్నట్లు తెలిసింది. ఈ మేరకు నిర్ణయం తీసుకున్నట్లు సెక్రటేరియెట్ వర్గాలు వెల్లడించాయి. కొత్త ఆర్ఓఆర్ చట్టంలో 3 అంశాలను ప్రతిష్టాత్మకంగా తీసుకున్నారు. ఇప్పటి వరకు ధరణిలో తలెత్తిన సమస్యలేవీ కొత్త చట్టం తర్వాత రాకుండా భూమాత పోర్టల్ను తేవాలని నిర్ణయించారు. రిజిస్ట్రేషన్, మ్యుటేషన్ సమయంలో ఏమైనా అభ్యంతరాలు వస్తే.. దానిని హోల్డ్లో పెట్టి, ఎంక్వైరీ అనంతరం పూర్తి చేసేలా మార్పులు చేస్తున్నారు. తహసీల్దార్ లెవెల్లో భూ సమస్యకు పరిష్కారం దొరక్కపోతే ఆర్డీవో, కలెక్టర్ లెవెల్లో రెవెన్యూ కోర్టు అప్పిలేట్స్ ఏర్పాటు చేసి పరిష్కార మార్గం చూపనున్నారు.
ఇతరులు పట్టా మార్చకుండా లాక్ సిస్టమ్..
ప్రధానంగా రిజిస్ట్రేషన్, మ్యుటేషన్ టైంలో సర్వే మ్యాప్ తప్పనిసరి చేశారు. రిజిస్ట్రేషన్‌‌‌‌కు వెళ్లే వారు ఈ మ్యాప్ను ఖచ్చితంగా తీసుకెళ్లాల్సి ఉంటుంది. భవిష్యత్తులో వివాదాలు రాకుండా.. గతంలో లేని ఈ కొత్త నిబంధనను తెస్తున్నారు. అయితే, ప్రభుత్వం నిర్దేశించిన తేదీ తర్వాత (ఇందుకు అవసరమైన వ్యవస్థను తయారు చేసుకున్న తర్వాత ) మాత్రమే ఈ మ్యాప్ తప్పనిసరి అవుతుందని చెప్తున్నారు. ఇందుకు ప్రత్యేకంగా ఆన్లైన్లో ప్రతి గ్రామానికి సంబంధించిన సర్వే నెంబర్లవారీగా మ్యాప్ను సిద్ధం చేసి పెట్టనున్నారు. దాని ఆధారంగా రిజిస్ట్రేషన్, మ్యుటేషన్కు వెళ్లాల్సి ఉంటుంది. ఇక పహానీలకు ఏటా మాన్యువల్గా ఆన్లైన్లో పెట్టనున్నారు. 2016 నుంచి పహానీలు రాయడం లేదు. భూమి హక్కుల బదలాయింపు కోసం 18 రకాల పద్ధతులను గుర్తించి, ఈ 18 పద్ధతుల్లో ఏ రకంగా హక్కుల బదలాయింపు జరిగినా రికార్డ్‌ ఆఫ్ రైట్స్‌(ఆర్‌‌‌‌వోఆర్‌)లో నమోదు చేయనున్నారు. ప్రతి రికార్డు డిజిటైలైజ్ చేయనున్నారు. అసైన్డ్ భూముల దగ్గర నుంచి శిఖం జాగలదాకా అన్నింటికీ దేనికదే ఆన్లైన్లో, ఆఫ్లైన్లో రికార్డుల నిర్వహణ చేపట్టనున్నారు. ఎలాంటి ఆధారాలు లేకుండా ప్రభుత్వ భూములను ఇతరులు పట్టా భూములుగా మార్చకుండా లాక్ సిస్టంను వినియోగించనున్నారు.
