- నెలరోజుల్లో ఎన్నికలు నిర్వహించాలనే సంప్రదాయం
- మున్సిపల్ యాక్ట్లో ‘గడువు’ ప్రస్తావన లేదంటున్న ఆఫీసర్లు
- సర్కారు నోటిఫై చేస్తేనే రంగంలోకి ఈసీ
- పలుచోట్ల ఇన్చార్జీలు లేక అయోమయం
యాదాద్రి, వెలుగు : ఇటీవల అవిశ్వాసాల కారణంగా చైర్మన్లు, వైస్చైర్మన్లు గద్దె దిగిన మున్సిపాలిటీల్లో కొత్త చైర్మన్లు, వైస్చైర్మన్ల ఎన్నికపై సస్పెన్స్ నెలకొంది. వైస్చైర్మన్లు ఉన్న చోట్ల వాళ్లకు ఇన్చార్జి బాధ్యతలు అప్పగిస్తున్నప్పటికీ ఇద్దరూ లేని మున్సిపాలిటీల్లో అయోమయం నెలకొన్నది. నెలరోజుల్లో ఎన్నికలు నిర్వహించే సంప్రదాయం గతంలో ఉన్నప్పటికీ మున్సిపల్యాక్ట్లో టైం లిమిట్ ఏదీ లేకపోవడం సమస్యగా మారింది. ఖాళీ అయిన మున్సిపాలిటీలను సర్కారు నోటిఫై చేసి ఎన్నికల కమిషన్కు నివేదిస్తే, ఈసీ ఇచ్చే డేట్ల ప్రకారం ఎన్నికలు నిర్వహిస్తామని కలెక్టర్లు చెప్తున్నారు. రాష్ట్రవ్యాప్తంగా పలు మున్సిపాలిటీల్లో అవిశ్వాసాల ప్రక్రియ ఇంకా కొనసాగుతున్నందున ప్రభుత్వం వేచిచూసే ధోరణి అవలంబిస్తోందనే అభిప్రాయాలు వ్యక్తమవుతున్నాయి.
పెండింగ్లోనే మున్సిపల్యాక్ట్2019..
2020లో జరిగిన మున్సిపల్ఎలక్షన్లలో బీఆర్ఎస్కు అనేక చోట్ల పూర్తి స్థాయి మెజారిటీ రాలేదు. ఇతర పార్టీల కౌన్సిలర్లను పార్టీలో చేర్చుకొని ఎక్స్ అఫిషియో ఓట్లతో చైర్మన్, వైస్ చైర్మన్ పదవులను దక్కించుకుంది. అంతకు ముందే బీఆర్ఎస్సర్కారు తెలంగాణ మున్సిపాలిటీ చట్టం- 2019ను రూపొందించి గవర్నర్అమోదానికి పంపించింది. ఈ చట్టం ప్రకారం నాలుగేండ్ల వరకూ చైర్మన్, వైస్ చైర్మన్లపై అవిశ్వాసం పెట్టడానికి వీలులేదు. అయితే, కొత్త మున్సిపల్యాక్ట్ ఇప్పటికీ గవర్నర్ తమిళ సై సౌందర్రాజన్ వద్ద పెండింగ్లోనే ఉంది. దీంతో ఉమ్మడి ఆంధ్రప్రదేశ్మున్సిపాలిటీ చట్టం1965 ప్రకారం 2023 జనవరితో చైర్మన్ల పదవీ కాలం మూడేండ్లు ముగియడంతోనే రాష్ట్ర వ్యాప్తంగా అనేక మున్సిపాలిటీల్లో చైర్మన్లపై అవిశ్వాసాలు పెట్టారు. కానీ, అప్పటి బీఆర్ఎస్ప్రభుత్వం అవిశ్వాసంపై ముందుకు వెళ్లకుండా చూసుకున్నది. మరోవైపు యాదాద్రి జిల్లా యాదగిరిగుట్ట మున్సిపల్చైర్మన్ఎరుకల సుధ సహా పలువురు చైర్మన్లు హైకోర్టును ఆశ్రయించి స్టే తెచ్చుకున్నారు.
చైర్మన్ఎన్నికపై అస్పష్టత
తెలంగాణ మున్సిపల్యాక్ట్–2019లో చైర్మన్, వైస్ చైర్మన్లపై అవిశ్వాసం నోటీసు ఇచ్చాక నెల రోజుల్లోనే ప్రత్యేక సమావేశం నిర్వహించాలని ఉంది. అయితే స్టే కారణంగా అవిశ్వాసం వాయిదా పడినా కూడా అవిశ్వాసంపై ముందుకు సాగొచ్చని గతేడాది అక్టోబర్6న హైకోర్టు తీర్పు చెప్పింది. దీని ప్రకారం ఏపీ మున్సిపల్యాక్ట్1965 ఆధారంగా 2008లో జారీ చేసిన జీవో నంబర్835 ప్రకారం అవిశ్వాసంపై ముందుకెళ్లడానికి అవకాశం వచ్చింది. అయితే, డిసెంబర్లో అసెంబ్లీ ఎన్నికలు రావడంతో అవిశ్వాసం అంశం వెనుకబడింది. బీఆర్ఎస్ ఓడిపోయి కాంగ్రెస్పవర్లోకి రావడంతో అవిశ్వాసం అంశం మళ్లీ తెరపైకి రావడంతో దాదాపు ప్రతి జిల్లాలో ఎక్కడోచోట అవిశ్వాస సమావేశాలు నిర్వహిస్తున్నారు. దీంతో బీఆర్ఎస్ చైర్మన్లు, వైస్ చైర్మన్లు పదవులు కోల్పోతున్నారు. కానీ, చైర్మన్లు, వైస్చైర్మన్లను ఎన్ని రోజుల్లో ఎన్నుకోవాలనే దానిపై పాత మున్సిపల్యాక్టులో క్లారిటీ లేకపోవడంతో సర్కారు ఎప్పుడు స్పష్టత వస్తుందా అని అంతా ఎదురుచూస్తున్నారు.
ఖాళీలు నోటిఫై అయితేనే..
రాష్ట్రంలోని మున్సిపాలిటీల్లో నెలకొన్న పరిణామాలపై ఆయా జిల్లాల కలెక్టర్లు ప్రభుత్వానికి నివేదికలు పంపించారు. వీటిని ప్రభుత్వం పరిశీలించి ఏఏ మున్సిపాలిటీల్లో చైర్మన్, వైస్చైర్మన్లేదా రెండు పోస్టులు ఖాళీగా ఉంటే వాటిని నోటిఫై చేయాల్సి ఉంటుంది. దాన్ని పరిశీలించిన తర్వాతే ఎన్నికల కమిషన్ రంగంలోకి దిగుతుంది. అయితే ఈ ప్రక్రియ జరడానికి టైం లిమిట్ అంటూ ఏదీ లేదని ఆఫీసర్లు చెబుతున్నారు. ప్రభుత్వం నుంచి నోటిఫై చేసినట్టు వస్తేనే ఎన్నికల కమిషన్ చైర్మన్, వైస్చైర్మన్ఎన్నిక కోసం తేదీ నిర్ణయిస్తుందంటున్నారు. సమావేశానికి 50 శాతం సభ్యులు హాజరైతే కోరం ఉన్నట్టుగా పరిగణించి ఎన్నికలు నిర్వహిస్తారని చెబుతున్నరు.
జనవరి 8న నల్గొండలో...
నల్గొండ మున్సిపాలిటీలో జనవరి 8న అవిశ్వాస మీటింగ్జరిగింది. బీఆర్ఎస్అసమ్మతి కౌన్సిలర్ల తిరుగుబాటు కారణంగా అవిశ్వాస తీర్మానం పెట్టగా మున్సిపల్చైర్మన్ మందడి సైదిరెడ్డి పదవి కోల్పోయారు. కొత్త చైర్మన్ ఎన్నికయ్యేంత వరకు ప్రస్తుత వైస్ చైర్మన్ అబ్బగోని రమేశ్చైర్మన్‌గా వ్యవహరిస్తున్నారు. 15 రోజలు గడిచినా ఇప్పటివరకూ చైర్మన్స్థానం ఖాళీ అయినట్టుగా నోటిఫై చేయలేదు.
మంచిర్యాల, భువనగిరిల్లో...
మంచిర్యాల మున్సిపల్చైర్మన్ పెంట రాజయ్య, వైస్ చైర్మన్ గాజుల ముఖేశ్పై అవిశ్వాసం ప్రకటించడంతో ఇద్దరూ రాజీనామాలు చేశారు. అయితే రాజీనామాలు ఆమోదించకపోవడంతో ముందుగా నిర్ణయించినట్టుగా జనవరి11న అవిశ్వాస తీర్మాన సమావేశం పెట్టారు. ఇందులో చైర్మన్, వైస్ చైర్మన్లు పదవులు కోల్పోయారు. దీంతో మంచిర్యాల మున్సిపాలిటీలో ఇన్చార్జి తతతతతతతతతకూడా లేని పరిస్థితి నెలకొంది. యాదాద్రి జిల్లా భువనగిరిలోనూ ఇదే జరిగింది. ఇక్కడ మున్సిపల్చైర్మన్ఎనబోయిన ఆంజనేయులు, వైస్ చైర్మన్ చింతల కిష్టయ్యపై అవిశ్వాసం ప్రకటించగా వీరు కూడా పదవులకు రాజీనామాలు చేశారు. రిజిగ్నేషన్ఆమోదించకపోవడంతో జనవరి 23న అవిశ్వాస తీర్మానం పెట్టగా నెగ్గింది. దీంతో చైర్మన్, వైస్ చైర్మన్లు పదవులు కోల్పోవడంతో భువనగిరికి ఇన్చార్జి కూడా లేకుండా పోయాడు.
నేరేడుచర్లలో..
సూర్యాపేట జిల్లా నేరేడుచర్ల మున్సిపల్చైర్మన్చందమల్ల జయబాబుపై అవిశ్వాసం ప్రకటించగా, జనవరి 23న అవిశ్వాసం నెగ్గింది. దీంతో జయబాబు పదవి కోల్పోయారు. అంతకు ముందే వైస్చైర్మన్గా ఉన్న చల్లా శ్రీలత పదవికి రాజీనామా చేయడంతో నేరేడుచర్లకు ఇన్చార్జి లేడు.
చైర్మన్, వైస్ చైర్మన్ల ఎన్నికపై గడువు లేదు
అవిశ్వాసం నెగ్గిన కారణంగా చైర్మన్లు, వైస్ చైర్మన్లు పదవులు కోల్పోయారు. అవిశ్వాసం జరిగిన తేదీ నుంచి ఇన్ని రోజుల్లోనే చైర్మన్ ఎన్నిక జరపాలని రూల్ఏమీ లేదు. చైర్మన్, వైస్ చైర్మన్ల పదవులు ఖాళీ అయినట్టు నోటిఫై చేసిన తర్వాతే ఎన్నికల కమిషన్ తేదీలు నిర్ణయిస్తుంది.
-
జీ వీరారెడ్డి, అడిషనల్ కలెక్టర్, యాదాద్రి
