- అభ్యర్థులను ప్రకటించని ప్రధాన రాజకీయ పార్టీలు
- అయోమయానికి గురవుతున్న ఆయా పార్టీల క్యాడర్
మెదక్, నర్సాపూర్, వెలుగు : ఎన్నికల షెడ్యూల్ వెలువడి వారం రోజులు గడుస్తున్నా నర్సాపూర్అసెంబ్లీ టికెట్లపై సస్పెన్స్ కొనసాగుతూనే ఉంది. ఇప్పటి వరకు అధికార బీఆర్ఎస్తో పాటు ప్రధాన రాజకీయ పార్టీలేవి అభ్యర్థులను ప్రకటించలేదు. దీంతో ఏ పార్టీ నుంచి ఎవరు ఎన్నికల బరిలో నిలుస్తారనే దానిపై అయోమయం నెలకొంది. ఎవరికి టికెట్వస్తుందో తెలియక ఆయా పార్టీల క్యాడర్ గందరగోళంలో ఉంది. బీఆర్‌‌ఎస్ఆగస్టు 21న రాష్ట్రంలోని 115 అసెంబ్లీ స్థానాల్లో పోటీచేసే అభ్యర్థులను ప్రకటించింది. మెజారిటీ చోట్ల సిట్టింగ్ఎమ్మెల్యేలకే టికెట్లు ఇచ్చినప్పటికీ నర్సాపూర్ సిట్టింగ్ఎమ్మెల్యే చిలుముల మదన్ రెడ్డికి మాత్రం టికెట్ఇవ్వకుండా పెండింగ్పెట్టింది. నాలుగు రోజుల్లో ఇక్కడ అభ్యర్థిని ప్రకటిస్తామని చెప్పి రెండు నెలలు గడుస్తున్నా ఇంకా ప్రకటించలేదు.
రాష్ట్ర మహిళా కమిషన్ చైర్పర్సన్ సునీతా లక్ష్మారెడ్డికి నర్సాపూర్ టికెట్ ఇచ్చేందుకే హైకమాండ్ నిర్ణయం తీసుకున్నట్లు సమాచారం. కానీ సిట్టింగ్ ఎమ్మెల్యే మదన్రెడ్డి టికెట్వదిలే ప్రసక్తే లేదని పలుమార్లు ప్రకటించారు. ఆయన మద్దతుదారులు హైదరాబాద్ వెళ్లి మంత్రి హరీశ్రావు ఇంటి వద్ద, ఆ తర్వాత నర్సాపూర్ లో నిరసన కార్యక్రమాలు చేపట్టారు. అయినా చాలా రోజుల వరకు హైకమాండ్ నుంచి ఎలాంటి రెస్పాన్స్ రాలేదు. ఇటీవల బీఆర్ఎస్ వర్కింగ్ ప్రెసిడెంట్, మంత్రి కేటీఆర్, మంత్రి హరీశ్ రావు మదన్ రెడ్డితో చర్చలు జరపగా తనకు టికెట్ ఇవ్వక పోవడంపై తీవ్ర ఆగ్రహం వ్యక్తం చేసినట్లు తెలిసింది. ఆ తర్వాత స్వయంగా పార్టీ అధినేత సీఎం కేసీఆర్ మదన్ రెడ్డిని ప్రగతి భవన్కు పిలిపించుకుని మాట్లాడి నచ్చజెప్పినట్టు సమాచారం.
దీంతో సునీతారెడ్డికి లైన్ క్లియర్ అయిందని అందరూ భావించారు. అయితే ఈ నెల 15న 69 మందికి, 16న 29 మందికి పార్టీ బీఫామ్లు అందించింది. ఈ లిస్టులో సునీతారెడ్డి పేరు లేకపోవడం గమనార్హం. మదన్ రెడ్డి ఒప్పుకుని నియోజకవర్గంలో పనిచేస్తేనే బీఆర్ఎస్ గెలిచే అవకాశం ఉందని, అందువల్ల ఆయనను ఒప్పించిన తరువాతే సునీతారెడ్డికి బీఫామ్ ఇవ్వనున్నట్టు సమాచారం.
కాంగ్రెస్ రేసులో అనిల్.. ఆవుల
కాంగ్రెస్టికెట్‌ కోసం నలుగురు నేతలు అప్లై చేసుకున్నప్పటికీ ప్రధానంగా ఇద్దరి మధ్య పోటీ నెలకొంది. టీపీసీసీ ఉపాధ్యక్షుడు గాలి అనిల్ కుమార్, టీపీసీసీ జనరల్ సెక్రటరీ ఆవుల రాజిరెడ్డి ఎవరి స్థాయిలో వారు ప్రయత్నాలు చేస్తున్నారు. ప్రతి పార్లమెంట్ నియోజకవర్గం పరిధిలో రెండు అసెంబ్లీ సీట్లు బీసీలకు ఇవ్వాలని పార్టీ హైకమాండ్ భావిస్తుండటంతో కచ్చితంగా తనకు అవకాశం వస్తుందని అనిల్ కుమార్ నమ్మకంతో ఉన్నారు. అయితే నియోజకవరవర్గంలో పార్టీ బలోపేతానికి తీవ్రంగా కృషి చేసినందున తనకు అవకాశం ఇవ్వాల్సిందేనని ఆవుల రాజిరెడ్డి గట్టిగా పట్టుబడుతున్నట్టు సమాచారం.
దీంతో గాలి అనిల్ కుమార్ కొద్ది రోజులుగా ఢిల్లీలోనే మకాం వేసి హైకమాండ్ పెద్దలతో సంప్రదింపులు జరుపుతున్నట్టు తెలిసింది. కాంగ్రెస్ 55 మంది పేర్లతో అభ్యర్థుల ఫస్ట్ లిస్ట్ రిలీజ్ చేయగా అందులో నర్సాపూర్ లేదు. దీంతో ఇక్కడ కాంగ్రెస్ టికెట్అనిల్ కుమార్కు వస్తుందా.. ఆవుల రాజిరెడ్డికి వస్తుందా అన్నదానిపై ఉత్కంఠ కొనసాగుతోంది.
బీజేపీలో ఛాన్స్ ఎవరికో..
బీజేపీ టికెట్ కోసం పార్టీ రాష్ట్ర కార్యవర్గ సభ్యుడు సింగాయిపల్లి గోపి, నర్సాపూర్ మున్సిపల్ చైర్మెన్ ఎర్రగొళ్ల మురళీ యాదవ్, గౌడ సంఘం రాష్ట్ర వర్కింగ్ ప్రెసిడెంట్ వాల్దాస్ మల్లేశ్ గౌడ్, రాష్ట్ర నాయకుడు రఘువీరారెడ్డి అప్లై చేసుకున్నారు. ఎవరికి వారు తమవంతు ప్రయత్నాలు చేస్తున్నారు. పార్టీ హైకమాండ్ మాత్రం ఇంకా బీజేపీ అభ్యర్థిత్వాలు ఖరారు చేయకపోవడంతో ఈ నలుగురిలో టికెట్ ఎవరికి లభిస్తుందన్న దానిపై సస్పెన్స్ వీడటం లేదు.
