- కొరడా ఝలిపిస్తున్న యాదాద్రి కలెక్టర్
- బడులు.. హాస్పిటల్స్.. హాస్టల్స్ లో ఆకస్మిక తనిఖీలు
- నిర్లక్ష్యంపై సీరియస్
- తాజాగా నలుగురు అంగన్ వాడీ టీచర్లు సస్పెండ్
యాదాద్రి, వెలుగు : యాదాద్రి కలెక్టర్ హనుమంతరావు పాలనలో తనదంటూ ముద్ర వేసుకున్నారు. కలెక్టర్గా వచ్చిన వెంటనే పాలనను గాడిలో పెట్టే పనిలో ముందుకు సాగుతున్నారు. విధి నిర్వహణలో నిర్లక్ష్యం వహిస్తున్న వారికి షోకాజ్ నోటీసులు ఇవ్వడం.. సీరియస్ ఇష్యూ అయితే సస్పెండ్ చేస్తున్నారు. తాజాగా నలుగురు అంగన్వాడీ టీచర్స్ను సస్పెండ్ చేస్తూ ఆదేశాలు జారీ చేశారు. 8.50కే డ్యూటీ డాక్టర్లతో గూగుల్ మీట్లో మాట్లాడుతున్నారు. ఎప్పుడు ఏ రివ్యూ చేస్తారో..? ఎవరిపై వేటు పడుతోందనని అధికారులు అలెర్ట్గా పని చేస్తున్నారు.
హైదరాబాద్కు యాదాద్రి జిల్లా సమీపంలో ఉంది. అందుకే కొందరు తప్ప చాలా మంది హెచ్వోడీలు మొదలుకొని క్లర్క్ వరకూ అప్ అండ్ డౌన్ చేయడం అలవాటుగా మారడంతో సమయపాలన లేకుండా పోయింది. విధుల నిర్వహణలో ఎంప్లాయీస్ నిర్లక్ష్యం కొట్టొచ్చినట్టుగా కన్పిస్తోంది. కలెక్టర్గా హనుమంతరావు బాధ్యతలు స్వీకరించిన వెంటనే.. ఈ అంశంపైనే దృష్టి సారించారు. నిత్యం రివ్యూలు చేయడంతో పాటు విద్య, వైద్యం, సంక్షేమం డిపార్ట్మెంట్లపై ఆయన ప్రధానంగా ఫోకస్ పెట్టారు.
ఆకస్మిక తనిఖీలు
జిల్లా వ్యాప్తంగా కలెక్టర్ ఆకస్మిక తనిఖీలు నిర్వహిస్తున్నారు. ఆఫీసు నుంచి బయటకు వెళ్తే ఎక్కడికి వెళ్తున్నది ఎవరికీ తెలియడం లేదు. వెహికల్ రోడ్డుపైకి వచ్చిన తర్వాతే ఏవైపు వెళ్లాలో చెబుతున్నారు. రెండు రోజుల క్రితం కలెక్టరేట్కు కూతవేటు దూరంలో ఉన్న రాయగిరి హైస్కూల్ను మధ్యాహ్న భోజన సమయంలో ఆకస్మికంగా విజిట్ చేశారు. వంటలు స్టూడెంట్స్కు సరిపోని విధంగా ఉండడంతో హెచ్ఎం సహా మరో ఇద్దరికి షోకాజ్ నోటీసులు జారీ చేశారు. అంతకు ముందు వరుసగా రెండు రోజులు ఒకే రెసిడెన్షియల్ స్కూల్కు వెళ్లి.. కేర్ టేకర్ను సస్పెండ్ చేయడంతోపాటు ప్రిన్సిపాల్కు షోకాజ్ నోటీసులు ఇచ్చారు.
సంస్థాన్ నారాయణపురంలోని ఎస్సీ హాస్టల్లో రాత్రి నిద్ర కూడా చేశారు. సర్వేల్ గురుకులంలోని ఓ స్టూడెంట్పై జావా పడడంతో గాయాలయ్యాయి. దీంతో ప్రిన్సిపాల్ను సస్పెండ్ చేశారు. జిల్లాసుపత్రిలో ల్యాబ్ టెక్నిషియన్ను సస్పెండ్ చేశారు. రామన్నపేట సీహెచ్సీకి వెళ్లి దీర్ఘాకాలికంగా సెలవులో ఉన్న డాక్టర్ను విధుల నుంచి తొలగించే విధంగా ఆర్డర్స్ రెడీ చేయాలని ఆదేశించారు. హెల్త్ స్టాఫ్లో 60 శాతం మందికి సెలవులు ఇచ్చిన సూపరింటెండెంట్కు షోకాజ్ నోటీసు ఇచ్చారు. ప్రజావాణికి హెచ్వోడీలు అందరూ హాజరుకావాలని ఆదేశాలు జారీ చేశారు. రాకుండా కింది స్టాఫ్ను పంపిన వారికి ఫోన్ చేసి ఎందుకు రాలేదని ప్రశ్నిస్తున్నారు.
అంగన్వాడీలు సస్పెండ్
బాలామృతం పక్కదారి పడ్తున్న విషయంలో సీరియస్ అయిన కలెక్టర్ నలుగురు అంగన్వాడీ టీచర్లను మంగళవారం రాత్రి సస్పెండ్ చేశారు. ఎస్వోటీ పోలీసులు ఇటీవల భువనగిరిలోని ఓ పశువుల షెడ్లో 150 కిలోల బాలమృతం పట్టుకున్నారు.విచారణలో ఆలేరు ప్రాజెక్ట్ పరిధిలోని మంతపురి, పుట్టగూడెం, యాదగిరిగుట్ట 3వ సెంటర్, మోత్కూరులోని 7వ సెంటర్లకు సంబంధించినవిగా తేలింది. దీంతో ఆయన సెంటర్లకు చెందిన అంగన్వాడీ టీచర్లను సస్పెండ్ చేశారు.
డాక్టర్లతో 8.50కి గూగుల్ మీట్
హాస్పిటల్స్లో విధులకు డాక్టర్లు డుమ్మా కొడ్తుండడం, ఆలస్యంగా వస్తున్న విషయం దృష్టికి రావడంతో ఓపీకి ముందే కచ్చితంగా హాస్పిటల్లో ఉండాలని ఆర్డర్స్ జారీ చేశారు. సరైన సమయానికి వస్తున్నారా..? లేదా..? అన్నది తెలుసుకోవడానికి గూగుల్ మీట్ నిర్వహిస్తున్నారు. ఈ మీట్లో డ్యూటీలో ఉన్న ప్రతి డాక్టర్ పాల్గొనాలని ఆదేశించారు.
ఆ సమయంలో డ్యూటీలో ఉన్న డాక్టర్తో మాట్లాడుతూనే ట్రీట్మెంట్ తీసుకుంటున్న పేషెంట్తో మాట్లాడించాలని వారికి సూచిస్తున్నారు. ఈ పరిణామంతో డాక్టర్లు కచ్చితంగా ఉదయం 8.30 గంటలకే హాస్పిటల్కు చేరుకుంటున్నారు. ట్రీట్మెంట్ విషయంలోనూ జాగ్రత్తగా వ్యవహరిస్తున్నారు. ఈ పరిణామాలతో అన్ని డిపార్ట్మెంట్ల స్టాఫ్ అలర్ట్గా ఉంటున్నారు.
