- సంగారెడ్డి జిల్లా పటాన్చెరు మండలం ఇంద్రేశం గ్రామంలో విషాదం
- బాడీని తెప్పించాలని తండ్రి వేడుకోలు
పటాన్చెరు, వెలుగు: ఫిలిప్పీన్స్లో ఎంబీబీఎస్ మూడో సంవత్సరం చదువుతున్న సంగారెడ్డి జిల్లా పటాన్చెరు మండలం ఇంద్రేశం గ్రామానికి చెందిన స్నిగ్ద(20) అనుమానాస్పదంగా చనిపోయింది. వివరాల్లోకి వెళితే.. మెదక్ జిల్లాలో విద్యుత్ శాఖలో పని చేస్తున్న చింత అమృత్రావు పటాన్చెరు మండలం ఇంద్రేశంలో ఉంటున్నారు.
కూతురు స్నిగ్దను ఎంబీబీఎస్ చదివించేందుకు 2021లో పిలిప్పీన్స్ దేశం మనీలాలోని ఫర్ ఫెక్చువల్ హెల్త్ యూనివర్సిటీలో చేర్పించారు. ప్రస్తుతం ఆమె మూడో సంవత్సరం చదువుతోంది. గత ఏడాది మార్చిలో ఇంటికి వచ్చి ఏప్రిల్లో తిరిగి వెళ్లింది. కాగా, ఈ నెల 15న తన పుట్టిన రోజు సందర్భంగా విషెస్ చెప్పేందుకు పేరెంట్స్ ఫోన్ చేయగా ఆమె ఎత్తలేదు. ఆ తరువాత ఆమె స్నేహితులు ఫోన్ చేసి స్నిగ్ద చనిపోయిందని తెలిపారు.
బర్త్డే విషెస్ చెప్పేందుకు తన రూమ్కు వెళ్లగా, డోర్ తీయలేదని, డోర్ బద్దలు కొట్టి చూడగా అనుమానాస్పందంగా పడిఉందని తెలిపారు. అక్కడి వారి సాయంతో ఆసుపత్రికి తరలించగా అప్పటికే చనిపోయినట్లు వారు చెప్పారని తండ్రి అమృత్రావు వాపోయారు. తమ కూతురు ధైర్యవంతురాలని, ఆమె మరణంపై విచారణ జరపించాలని కోరారు. బాడీని త్వరగా అప్పజెప్పేందుకు ఇండియన్ ఎంబసీ చర్యలు తీసుకోవాలన్నారు.
