గచ్చిబౌలి, వెలుగు: గంజాయి అమ్ముతూ ఎన్నోసార్లు పోలీసులకు పట్టుబడి జైలుకెళ్లిన ఓ మహిళ.. బయటికి వచ్చిన తర్వాత మళ్లీ గాంజా అమ్మేది. పీడీ యాక్ట్ పై ఏడాది పాటు జైలులో ఉంచినా ఆమె తీరు మారలేదు. మరోసారి మహిళ ఇంట్లో భారీగా గంజాయి దొరకడంతో ఎస్వోటీ పోలీసులు ఆమెను అదుపులోకి తీసుకున్నారు. గచ్చిబౌలి పోలీసులు తెలిపిన వివరాల ప్రకారం.. నానక్ రాంగూడ ప్రాంతానికి చెందిన నీతూబాయ్(45) ఐటీ ఎంప్లాయీస్ టార్గెట్గా గంజాయి అమ్మేది.
గతంలో పోలీసులకు దొరికి జైలుకెళ్లినా.. ఆమె తీరు మారలేదు. సైబరాబాద్ సీపీ ఆదేశాల మేరకు గతంలో ఆమెపై పీడీ యాక్ట్ పెట్టినా మార్పు రాలేదు. బుధవారం రాత్రి నీతూబాయ్ ఇంటిపై దాడి చేసిన మాదాపూర్ జోన్ ఎస్వోటీ పోలీసులు 8 కిలోల గంజాయి, రూ.4 లక్షల 95 వేల క్యాష్ను స్వాధీనం చేసుకున్నారు. నీతూబాయ్ తో పాటు ఈ దందాలో ఉన్న సిమ్రాన్, మంతాబాయ్, సురేఖ, మనుసింగ్ను అరెస్ట్ చేసి గచ్చిబౌలి పోలీసులకు అప్పగించారు. నీతూబాయ్పై 6 కేసులున్నాయని.. ఒడిశా నుంచి గంజాయి తీసుకొచ్చి సిటీలో అమ్ముతోందని పోలీసులు తెలిపారు.
