ఉప్పల్, వెలుగు: ఉప్పల్ పోలీస్ స్టేషన్ పరిధిలోని రామంతపూర్ లో 12 క్వింటాళ్ల కల్తీ అల్లం వెల్లుల్లి పేస్ట్ని ఎస్వోటీ పోలీసులు పట్టుకున్నారు. నాంపల్లిలోని అగాపురాకు చెందిన మహమ్మద్ అఫ్తాబ్.. రామంతాపూర్ కేసీఆర్ నగర్ లోని బాలకృష్ణ నగర్ లో ప్లాట్ నంబర్ 5 లో పదేండ్లుగా న్యూ నేషనల్ అనే పేరుతో కల్తీ అల్లం వెల్లుల్లి పేస్ట్ తయారు చేస్తున్నాడు. కుళ్లిన ఆలుగడ్డలు, అరటి చెట్టు కాండం, టైటానియం కెమికల్, సిట్రిక్ యాసిడ్ (మోనోహైడ్రేట్) కలిపి పేస్టు తయారు చేసి అమ్ముతున్నాడు. ఎస్వోటీ పోలీసులు ఇప్పటికే ఇతడిని మూడు సార్లు అదుపులోకి తీసుకున్నారు.
సాధారణ కౌన్సెలింగ్ ఇచ్చి పంపిస్తుండడంతో బయటకు వచ్చి మళ్లీ అదే పని చేస్తున్నాడు. ఇప్పుడు నాలుగోసారి పట్టబడంతో మల్కాజ్గిరి ఎస్వోటీ పోలీసులు అతన్ని అరెస్ట్చేశారు. ప్రజల ప్రాణాలతో ఆడుకుంటున్న సదరు నిందితుడిపై రౌడీషీట్ ఓపెన్ చేయాలని, పీడీ యాక్ట్ పెట్టాలని స్థానికులు డిమాండ్ చేస్తున్నారు.
