దేవరకొండ(కొండమల్లేపల్లి), వెలుగు: నల్గొండ జిల్లా కొండమల్లేపల్లిలో మద్యానికి బానిసైన సయ్యద్ రహమాన్ అలీ అనే వ్యక్తి బుధవారం తన భార్య సమీనా బేగం (30)ను రోకలి బండతో కొట్టి హత్య చేశాడు. పోలీసులు తెలిపిన వివరాల ప్రకారం.. కొండమల్లేపల్లికి చెందిన మహమూద్ అలీ, సమీనా దంపతుల కూతురైన సమీనాబేగాన్ని రంగారెడ్డి జిల్లా మన్నెగూడకు చెందిన రహమాన్అలీకిచ్చి పెండ్లి చేశారు. వీరికి ఇద్దరు కొడుకులు, ఒక కూతురు సంతానం. రహమాన్అలీ కొంతకాలంగా అత్తగారి ఊరైన కొండమల్లేపల్లి లో జేసీబీ డ్రైవర్గా పని చేస్తూ భార్యా పిల్లలతో దేవరకొండ రోడ్డులోని వెంకటేశ్వరనగర్ కాలనీలో ఉంటున్నాడు.
బుధవారం పిల్లలను స్కూల్కు పంపించిన తర్వాత ఇంట్లో ఉన్న ఇద్దరికి ఘర్షణ జరిగింది. దీంతో మద్యం మత్తులో ఉన్న రహమాన్అలీ కోపంతో రోకలి బండతో సమీనాబేగం తలపై బలంగా కొట్టడంతో ఆమె చనిపోయింది. రహమాన్ అలీ ఇంటి తలుపులు దగ్గర పెట్టి పరారయ్యాడు. సాయంత్రం స్కూల్ నుంచి ఇంటికి తిరిగొచ్చిన పిల్లలు ఇంట్లో తల్లి చనిపోయి ఉండడాన్ని గుర్తించి అమ్మమ్మ,తాతయ్యకు చెప్పారు. మృతురాలి తండ్రి మహమూద్అలీ ఫిర్యాదుతో మేరకు కేసు నమోదు చేసుకొని దర్యాప్తు చేస్తున్నట్లు ఎస్ఐ వీరబాబు తెలిపారు. ఘటనా స్థలాన్ని ట్రైనీ ఐపీఎస్ శేషాద్రిని రెడ్డి, డీఎస్పీ నాగేశ్వర్రావు సందర్శించి వివరాలు సేకరించారు.
