- మన స్టార్టప్లకు అంతర్జాతీయ స్థాయిలో అవకాశాలు
హైదరాబాద్, వెలుగు: మన రాష్ట్రంలో ఏర్పాటు చేసే స్టార్టప్లకు అంతర్జాతీయ అవకాశాలు కల్పించేలా, వాటి అభివృద్ధికి తోడ్పడేలా రాష్ట్ర ప్రభుత్వం కీలక ఒప్పందం చేసుకున్నది. బ్రెజిల్కు చెందిన గోయాస్ హబ్తో టీహబ్ అవగాహన ఒప్పందం కుదుర్చుకున్నది. మంగళవారం హెచ్ఐసీసీలో గోయాస్ హబ్ ప్రతినిధులతో సీఎం రేవంత్ రెడ్డి, ఐటీ, ఇండస్ట్రీస్ శాఖ మంత్రి శ్రీధర్ బాబు సమావేశమయ్యారు. ఈ సందర్భంగా ఎంవోయూపై టీహబ్ సీఈవో సుజిత్, గోయాస్ స్టేట్ సైన్స్ టెక్నాలజీ అండ్ ఇన్నొవేషన్ సెక్రరీ జోస్ ప్రెడరికో లైరా నెట్టో సంతకాలు చేశారు.
ఈ ఒప్పందంతో రాష్ట్రంలోని స్టార్టప్లకు బ్రెజిల్లో అవకాశాలు దక్కనున్నాయి. అలాగే బ్రెజిల్కు చెందిన స్టార్టప్లకు మన రాష్ట్రంలో అవకాశాలు కల్పించనున్నారు. ఆర్టిఫిషియల్ ఇంటెలిజెన్స్, ఐటీ, అగ్రిటెక్, హెల్త్కేర్, బయోటెక్, మైనింగ్ రంగాల్లో పరస్పర సహకారాన్ని అందించుకోనున్నాయి. మార్కెట్ యాక్సెస్ తో పాటు కెపాసిటీ బిల్డింగ్ ఇంక్యుబేషన్, సాంకేతిక భాగస్వామ్యం, పెట్టుబడుల అవకాశాల మెరుగుదల వంటి కీలక అంశాలపై రెండు సంస్థలు కలిసి పని చేయనున్నాయి.
