IND vs CAN: ఫలించని గ్రౌండ్స్‌మెన్ శ్రమ.. భార‌త్- కెన‌డా మ్యాచ్ రద్దు

కెనడాతో జరగాల్సిన టీమిండియా చివ‌రి లీగ్ మ్యాచ్‌ తడి ఔట్‌ఫీల్డ్ కారణంగా రద్దయ్యింది. ఫ్లొరిడాలో భారీ వర్షాల కార‌ణంగా సెంట్రల్ బ్రోవార్డ్ రీజినల్ స్టేడియం ఔట్ ఫీల్డ్ చిత్తడిగా మారింది. దీంతో మ్యాచ్ నిర్వహణ సాధ్యపడకపోవడంతో అంపైర్లు ఆటను రద్దు చేశారు. ఈ నిర్ణయం మ్యాచ్ చూసేందుకు స్టేడియానికి వచ్చిన అభిమానులకు నిరాశ కలిగించింది.

మైదానాన్ని సిద్ధం చేయడానికి గ్రౌండ్స్‌మెన్ శాయశక్తులా ప్రయత్నించారు. తడిగా ఉన్న ప్రాంతాలను పెద్ద పెద్ద మెషిన్ల సాయంతో ఆరబెట్టే ప్రయత్నం చేశారు. అయినప్పటికీ, ప్రయోజనం లేకపోయింది. ఔట్‌ఫీల్డ్‌లో ఎలాంటి పురోగతి కనిపించకపోవడంతో అంపైర్లకు ఆటను రద్దు చేయడం తప్ప మరో దారి కనిపించలేదు. మ్యాచ్‌ రద్దవ్వడంతో ఇరు జట్లకు ఒక్కో పాయింట్ కేటాయించారు. దాంతో, రోహిత్ సేన ఏడు పాయింట్లతో గ్రూప్ ఏలో అగ్ర‌స్థానంలో నిలవగా.. మూడు పాయింట్లు సాధించిన కెన‌డా మూడో స్థానంతో స‌రిపెట్టుకుంది.