చెత్త సేకరిస్తుండగా సెల్ఫీ తీసి యాప్ లో పెట్టాలట

• ఉదయం 7 గంటలకే డ్యూటీలో ఉండాలె
• చెత్త సేకరిస్తుండగా సెల్ఫీ తీసి యాప్ లో పెట్టాలని ఆదేశం
• ఆఫీసర్ల తీరుపై మండిపడుతున్న సెక్రటరీలు
• భద్రాద్రిలో ఫిబ్రవరి 7 నుంచి సమ్మెకు నిర్ణయం

మంచిర్యాల, వెలుగు: ఇప్పటికే పనిభారంతో పరేషాన్​ అవుతున్న పంచాయతీ సెక్రటరీలపై ఆ డిపార్ట్​మెంట్​ఆఫీసర్లు మరింత భారం మోపుతున్నారు. రోజుకో కొత్త రూల్​ తీసుకొస్తూ ఇబ్బందులకు గురిచేస్తున్నారు. దీంతో ఉన్నతాధికారుల తీరుపై సెక్రటరీలు మండిపడుతున్నారు. పంచాయతీ సెక్రటరీలు రోజూ పొద్దుగాల 7 గంటలలోపే అటెండెన్స్​ ఇవ్వాలని, ట్రాక్టర్​తో చెత్త సేకరిస్తుండగా ఇంజన్​పై డ్రైవర్ ​పక్కన కూర్చొని సెల్ఫీ తీసి పంచాయతీ సెక్రటరీల(పీఎస్)​ యాప్​లో అప్​లోడ్​ చేయాలని ఈ నెల 21న ఆర్డర్స్ జారీ చేశారు. ఇంతకుముందు వారానికి రెండు రోజులు 7 గంటలలోపు డ్యూటీకి వచ్చి అటెండెన్స్​ఇవ్వాలనే రూల్ ​ఉండేది. దీనిని క్యాన్సిల్ ​చేయాలని ఓవైపు సెక్రటరీలు డిమాండ్​చేస్తుంటే.. మరోవైపు ఉన్నతాధికారులు డెయిలీ 7 గంటలలోపే డ్యూటీలో ఉండాలని ఆర్డర్స్​ ఇవ్వడంతో షాక్​ తిన్నారు. చాలామంది సెక్రటరీలు కుటుంబ అవసరాలు, పిల్లల చదువుల దృష్ట్యా జిల్లా హెడ్​క్వార్టర్​లో లేదా దగ్గరలోని మండల హెడ్​క్వార్టర్స్​లో నివాసం ఉంటున్నారు. వీళ్లు పొద్దున్నే ఏడింటికి డ్యూటీలో ఉండాలంటే ఆరింటికే బయల్దేరాలి. ఇక లేడీస్​ పొద్దున్నే లేచి ఇంటి పనులు చేయడం, పిల్లలను రెడీ చేసి స్కూల్​కు పంపడం, ఇలా ఎన్నో పనులు ఉంటాయి. 

పని భారంతో సతమతం 
పంచాయతీ సెక్రటరీలు ఇప్పటికే పనిభారంతో సతమతమవుతున్నారు. పొద్దుటి నుంచి సాయంత్రం వరకు చేసినా ఒడవని పని చెప్తున్నారని వాపోతున్నారు. ఇంటింటా చెత్త సేకరణ, సేకరించిన చెత్తను డంపింగ్​యార్డ్​కు తరలించడం, తడి చెత్తతో కంపోస్టు తయారీ, పొడి చెత్తను వేరు చేసి అమ్మడం, డ్రైనేజీలు క్లీన్ చేయించడం, రోడ్లు ఊడ్పించడం, ట్యాక్స్​కలెక్షన్, వాటర్​సప్లై, అవెన్యూ ప్లాంటేషన్, నర్సరీ వర్క్స్​మానిటరింగ్​ చేయడంతో పాటు గవర్నమెంట్​ప్రోగ్రామ్స్, ఆఫీసర్ల మీటింగులతో పొద్దుపోయే వరకూ తీరిక ఉండడం లేదంటున్నారు. ఆయా పనులకు సంబంధించి రోజూ ఆరు ఫొటోలను యాప్​లో అప్​లోడ్​ చేయడం తప్పనిసరి. అలాగే ఈజీఎస్​పనులను సైతం ప్రభుత్వం సెక్రటరీలకే కట్టబెట్టింది. గ్రామంలో చేపట్టే పనులను గుర్తించడం, వాటిని పర్యవేక్షించడం, డెయిలీ 50 మంది కూలీలకు పని కల్పించడం వీళ్ల బాధ్యతే. కూలీల సంఖ్య తగ్గితే షోకాజ్​ నోటీసులు, సస్పెన్షన్లతో టెన్షన్​ పడుతున్నారు.ఇది చాలదన్నట్టు కొత్త రూల్​తో తమకు మరిన్ని కష్టాలు తప్పవని ఆవేదన వ్యక్తం చేస్తున్నారు. 

మల్టీపర్పస్​ వర్కర్లు ఏరీ?
పంచాయతీలో అన్నిరకాల పనులకు సెక్రటరీలను బాధ్యులను చేసిన ప్రభుత్వం అందుకు అవసరమైన వర్కర్లను మాత్రం నియమించడం లేదు. 2011 సెన్సెస్​ ప్రకారం 500 మంది జనాభాకు ఒక మల్టీపర్పస్​ వర్కర్​ను సర్కారు కేటాయించింది. గతంలో ఒక గ్రామంలో 2 వేల జనాభా ఉంటే ప్రస్తుతం 3వేలకు చేరింది. ఈ లెక్కన మరో ఇద్దరు వర్కర్లు అవసరమైనా ప్రభుత్వం పట్టించుకోవడం లేదు. ఒకరిద్దరు వర్కర్లు ఉన్న పంచాయతీల్లో శానిటేషన్​ పరిస్థితి దయనీయంగా తయారైంది. దీనికి సెక్రటరీలను బాధ్యులను చేయడం ఎంతవరకు సమంజసమని ప్రశ్నిస్తున్నారు. 

సమ్మెకు రెడీ 
ప్రభుత్వం రోజుకో రూల్​ తీసుకొస్తూ విపరీతమైన పనిభారం మోపడంపై సెక్రటరీలు మండిపడుతున్నారు. గతంలో డెయిలీ శానిటేషన్​ రిపోర్ట్(డీఎస్సార్​) ఉదయం 11 గంటలలోపు పూర్తి చేయాల్సి ఉండేది. ఇప్పుడు ఏడింటికే సెక్రటరీలు ట్రాక్టర్ మీద కూర్చుని ఫొటో దిగాలని చెబుతుడడంపై ఆందోళన వ్యక్తం చేస్తున్నారు. తాము ఎదుర్కొంటున్న సమస్యలను పరిష్కరించడంతో పాటు  7 గంటలకే డీఎస్సార్​ ఇవ్వాలనే నిర్ణయాన్ని వెనక్కు తీసుకోవాలని డిమాండ్​ చేస్తున్నారు. దీనికి నిరసనగా భద్రాద్రి కొత్తగూడెం జిల్లాలోని సెక్రటరీలు సమ్మెకు రెడీ అయ్యారు. ఫిబ్రవరి 7నుంచి డ్యూటీలు బహిష్కరించి నిరసన తెలుపుతామని ఆ జిల్లా సెక్రటరీల సంఘం ఇప్పటికే డీపీవోకు నోటీసు ఇచ్చింది. మిగతా జిల్లాల సెక్రటరీలు సోమవారం సమావేశమై తమ కార్యాచరణ ప్రకటిస్తామని పేర్కొంటున్నారు.