గచ్చిబౌలి, వెలుగు: గణేశ్ ఉత్సవాల్లో ఎలాంటి అవాంఛనీయ సంఘటనలు జరగకుండా అన్ని శాఖల అధికారులు సమన్వయంతో పనిచేయాలని సైబరాబాద్ సీపీ అవినాశ్ మహంతి కోరారు. ఉత్సవాల్లో మహిళలు, చిన్న పిల్లల భద్రతకు ప్రాధాన్యత ఇవ్వాలని సూచించారు. గణేశ్ ఉత్సవాలపై గచ్చిబౌలిలోని సైబరాబాద్కమిషనరేట్ ఆఫీస్లో మేడ్చల్, రంగారెడ్డి జిల్లాల కలెక్టర్లు, జీహెచ్ఎంసీ, రెవెన్యూ, ఆర్అండ్ బీ, హెచ్ఎండబ్ల్యూఎస్ అండ్ ఎస్బీ, ఫైర్సర్వీసెస్, ట్రాన్స్పోర్ట్, ఆర్టీఏ, ఇతర శాఖల అధికారులు, భాగ్యనగర్ ఉత్సవ కమిటీ సభ్యులతో బుధవారం సమీక్షా సమావేశం నిర్వహించారు.
సెప్టెంబర్7 నుంచి 17 వరకు ఉత్సవాలు జరగనున్నాయన్నారు. కమిషనరేట్పరిధిలోని నిర్వహణ కమిటీల వివరాలను ఆయా పోలీస్ స్టేషన్లఅధికారులు, సిబ్బంది సేకరించుకోవాలని సూచించారు. భక్తులతో మర్యాదగా వ్యవహరించాలన్నారు. శాంతిభద్రతల విషయంలో అప్రమత్తంగా ఉండాలన్నారు. సోషల్ మీడియాలో వచ్చే తప్పుడు పోస్టులను ఎవరూ నమ్మవద్దని, అలాంటి పోస్టులు పెట్టిన వారిపై కఠిన చర్యలు తప్పవని హెచ్చరించారు.
ఉత్సవాలకు ముందే రోడ్ల రిపేర్లు, పారిశుధ్య పనులు పూర్తి చేయాలని మేడ్చల్- మల్కాజిగిరి కలెక్టర్ గౌతమ్ పోట్రు అధికారులను ఆదేశించారు. రంగారెడ్డి అడిషనల్ కలెక్టర్ ప్రతిమా సింగ్, సైబరాబాద్ ట్రాఫిక్ జాయింట్ సీపీ జోయల్ డేవిస్, డీసీపీలు, జీహెచ్ఎంసీ జోనల్ కమిషనర్లు, ఆర్అండ్బీ అధికారులు, ఫైర్, ఆర్టీఏ శాఖలు, వాటర్బోర్డు ఆఫీసర్లు, గణేశ్ఉత్సవ సమితి సైబరాబాద్ ఇన్ చార్జి మహిపాల్రెడ్డి పాల్గొన్నారు.
